Fréttablaðið - 12.04.2008, Blaðsíða 35

HEIMILI HEILSA HÚS BÖRN NÁM FERÐIR MATUR BÍLAR TÍSKA GRÆJUR ATVINNA TILBOÐ VINNUVÉLAR O.FL.
Skrautlegur og skemmtilegur Volkswagen-bíll
bættist nýlega á götur borgarinnar. Þetta er
sögubíllinn Æringi sem fer á milli leikskóla
Reykjavíkur með ævintýrin innanborðs. Bílstjóri
er María Pálsdóttir leikkona.
„Ég keyri milli leikskólanna með einhvern úr
Borgarbókasafninu með mér. Við tökum tíu krakka
inn í bílinn í einu og upplifum þar ævintýrastund.
Sum börnin eru pínu smeyk en önnur voða spennt
og spyrja mig: „Hvenær ætlarðu að keyra af stað?
Þau skilja ekki alveg hvað við erum að hanga
þarna í sömu sporum. En það er ekki pælingin að
fara með þau á rúntinn heldur bara hlýða á góða
sögu.“ Þannig lýsir María starfi sínu á sögubílnum
Æringja.
En hvernig kom þessi sögubíll til sögunnar? Því
svarar María. „Hugmyndin kviknaði þegar
Borgarbókasafnsfólk fór á þing til Suður-Kóreu
árið 2006. Þar var líka bókasafnsfólk frá Dan-
mörku sem kynnti svipað fyrirkomulag þar nema
hvað um sögugám er að ræða sem er fluttur á milli
með dráttarvél. Þetta þótti snjallt og sniðugt og í
haust var ég ráðin í að setja þetta verkefni á
laggirnar hér. Þá var ákveðið að kaupa sendibíl og
hafa hann sem sögubíl sem gæti ekið á milli á eigin
hjólum. Það kom í ljós þegar grennslast var frekar
fyrir um danska gáminn að það var svolítið
fyrirtæki að flytja hann á milli svo stundum var
hann lengi á sama stað. Svo var farið að spara í
flutningsdeildinni og þá hætti dráttarvélin að
rúnta með hann.“
Það varð úr að keyptur var glænýr Volkswagen
Golf hjá Heklu og að sögn Maríu styrkti umboðið
þetta skemmtilega verkefni. „Við létum innrétta
bílinn sérstaklega fyrir okkur og stóðum fyrir
myndlistarsamkeppni um skreytingar utan á hann
sem Brian Pilkington vann,“ lýsir hún.
María hefur ekið á Æringja milli leikskólanna í
Grafarvogi frá því í febrúarbyrjun. „Þetta gefst
mjög vel og það er mikill spenningur hjá krökkun-
um að fá okkur. Við byrjuðum í Grafarvogi og
erum þar enn en færumst yfir í Grafarholt og
Árbæ í næstu viku. Bíllinn er samt ekki bara
bundinn leikskólunum heldur getur hann dúkkað
upp víða. Til dæmis nálægt bókasöfnunum og þar
sem eitthvað er um að vera, á námskeiðum ÍTR og
í Fjölskyldu- og húsdýragarðinum,“ segir María
áhugasöm. „Við erum auðvitað nýbyrjuð en svona
á þetta að rúlla ár eftir ár.“
gun@frettabladid.is
Um borð í sögubílnum
María bregður á leik í sögubílnum Æringja sem Borgarbókasafnið á og Brian Pilkington myndskreytti. FRÉTTABLAÐIÐ/GVA
LJÓN Í TRJÁNUM
Sigrún Þorsteinsdóttir fór
í ævintýralegt ferðalag til
Rúanda og Úganda þar sem
hún sá bæði ljón og górillur.
FERÐIR 4
RÓMANTÍSKAR RÓSIR
Rósótt verður í tísku í sumar
og lítið mál fyrir handlagna
að sauma fallegar sumar-
flíkur úr alls konar efnum.
TÍSKA 3