Morgunblaðið - 11.02.2006, Blaðsíða 18

18 LAUGARDAGUR 11. FEBRÚAR 2006 MORGUNBLAÐIÐ
ERLENT
ÁRLEGA velur dómnefnd á vegum
World Press Photo-samtakanna
fréttamynd ársins. Í gær var til-
kynnt hvaða mynd varð fyrir valinu
fyrir árið 2005. Kanadíski ljós-
myndarinn Finbarr O’Reilly, starfs-
maður Reuters-fréttastofunnar, tók
myndina sem sýnir magran fingur
ungbarns teygja sig í munn móður
sinnar. Var myndin tekin í Tahoua í
Afríkulandinu Níger í ágúst í fyrra,
en þar geisaði mikil hungursneyð.
James Colton, formaður dóm-
nefndarinnar, sagði myndina hafa
sótt á sig frá því hann sá hana fyrst.
„Þessi mynd hefur allt – fegurð,
hrylling og örvæntingu. Hún er ein-
föld, fáguð og hreyfir við manni.“
Reuters
Fréttamynd ársins valin
NOKKUÐ virðist hafa dregið úr
heift múslíma í Vestur-Evrópu
vegna skopteikninganna af Múham-
eð spámanni sem birtust í danska
blaðinu Jyllands-Posten og síðar í
fleiri miðlum. Enn voru þó mót-
mælagöngur í allmörgum löndum í
gær, víðast hvar friðsamlegar, en í
Egyptalandi og Tyrklandi voru
danskir fánar brenndir, einnig
brúður í líki Anders Fogh Rasm-
ussen, forsætisráðherra Danmerk-
ur.
Mörg þúsund manns söfnuðust
saman við sendiráð Dana í Kuala
Lumpur, höfuðborg Malasíu, eftir
föstudagsbænir og dreifðu samtök
heittrúarmanna út miðum þar sem
hvatt var til þess að danskar vörur
yrðu sniðgengnar.
Vebjørn Selbekk, ritstjóri norska
tímaritsins Magazinet, sem endur-
birti myndirnar úr Jyllands-Posten,
sneri í gær við blaðinu og baðst af-
sökunar á því að hafa af gáleysi
sært tilfinningar múslíma með
myndunum. Hann gekk þó ekki svo
langt að harma að hafa birt
myndirnar. Selbekk hefur fengið
fjölda morðhótana vegna mynd-
anna. Ráð norskra múslíma sagðist
taka afsökun Selbekk til greina.
„Selbekk á börn á sama aldri og
ég. Ég vil að börnin hans og börnin
mín geti alist upp saman, lifað sam-
an í friði og orðið vinir,“ sagði leið-
togi ráðsins, Mohammad Hamdam.
Sænskur flokkur fjarlægir
myndirnar af vefsíðu
Könnun í Noregi gefur til kynna
að 57% landsmanna álíti að fjöl-
miðlar hefðu átt að sleppa því að
birta myndirnar. Hægrisinnaður
stjórnmálaflokkur í Svíþjóð fjar-
lægði í gær teikningarnar af vef-
síðu sinni og lagði á hilluna hug-
myndir um samkeppni um
Múhameðsmyndir. Sænskir fjöl-
miðlar hafa ekki birt myndirnar
umtöluðu.
Talsmaður Venstre, stærri
stjórnarflokksins í Danmörku, var-
aði í gær menn við að halda að
vandamálið yrði senn úr sögunni.
„Margt getur enn gerst. Mikilvægt
er að menn tali varlega. Við viljum
að allt sé gert til að hindra að um-
ræðurnar fari út af sporinu,“ sagði
talsmaðurinn, Jens Rohde, að sögn
Jyllands-Posten. Könnun í Dan-
mörku gefur til kynna að meirihluti
Dana telji þarlenda múslímaklerka
hafa átt mestan þátt í að teikninga-
málið varð jafn ofbeldisfullt og
reyndin er orðin.
Abu Laban, ímam í Kaupmanna-
höfn, vísaði í gær á bug ásökunum
þess efnis að danskir múslím-
aklerkar hefðu ýtt undir deilur og
átök vegna teikninganna í löndum
íslams. „Við höfum ekki hellt olíu á
eldinn,“ sagði Laban. Í ljós hefur
komið að lítt þekkt egypskt blað,
El Fagr, birti sex af teikningunum
12 þegar í október í fyrra, en þær
voru fyrst birtar í Jyllands-Posten í
september. Myndirnar í El Fagr
vöktu litla athygli, það var ekki
fyrr en í janúar að mótmæli hófust
víða í múslímaríkjum.
Beðist afsök-
unar á teikn-
ingum í Noregi
Danskir fánar á ný brenndir í mót-
mælagöngum í múslímalöndum
Eftir Kristján Jónsson
kjon@mbl.is
London. AP. | Verkamannaflokkur
stjórnar Tony Blairs í Bretlandi
beið mikinn ósigur í aukakosning-
um um þingsæti í skosku kjör-
dæmi, Dunfermline og Fife West, í
gær. Frjálslyndi demókratinn Wil-
lie Rennie var með um 1.800 at-
kvæði fram yfir þingmannsefni
Verkmannaflokksins, Catherine
Stihler.
Kjósa þurfti aftur vegna þess að
Rachel Squire, þingmaður Verka-
mannaflokksins, er látin en hún
hlaut liðlega tvo þriðju atkvæða í
kosningunum í fyrra. Kjörsókn var
lítil að þessu sinni, aðeins um 49%.
George Brown fjármálaráðherra,
sem nær öruggt má telja að taki við
af Blair fyrir næstu kosningar, býr
í umræddu kjördæmi. Lagði hann
sig fram um að tryggja Stihler sig-
ur og kom fjórum sinnum fram á
fundum í kjördæminu. Niðurstaðan
þykir því vera áfall fyrir Brown.
Ekki bætir úr skák að Frjálslyndir
demókratar hafa átt undir högg að
sækja vegna alls kyns vandræða-
mála í kjölfar þess að leiðtogi
flokksins, Charles Kennedy, var
þvingaður til að segja af sér vegna
áfengisvanda. Kemur sigur þeirra
því enn meira á óvart en ella.
Verka-
manna-
flokkurinn
tapaði
♦♦♦
Jerúsalem. AFP, AP. | Embætt-
ismenn í Ísrael fóru í gær
hörðum orðum um þá ákvörð-
un Vladímírs Pútíns Rúss-
landsforseta að bjóða leiðtog-
um Hamas-samtakanna til
fundar í Moskvu. Mennta-
málaráðherrann, Meir Sheet-
rit, sagði ákvörðun Pútíns
„rýting í bak“ Ísraela og
spurði hvað forseti Rússlands
myndi segja ef ísraelsk
stjórnvöld byðu tétsenskum
skæruliðum til skrafs og
ráðagerða í Jerúsalem.
„Þetta frumkvæði er sann-
arlega rýtingur í bakið … því
að það felur í sér að hryðju-
verkasamtökum verði veitt alþjóðleg viðurkenning og við
verðum að mótmæla þessu af öllum kröftum,“ sagði
Sheetrit í samtali við ísraelska útvarpsstöð.
Fleiri ráðherrar og embættismenn tóku í sama streng.
„Þegar Tsjetsjenar standa fyrir árás í Moskvu þá kalla
Rússar það hryðjuverk en þegar árás er gerð í Jerúsalem
þá gera þeir það ekki. Er blóð ísraelskra borgara minna
virði en blóð Rússa?“ spurði háttsettur, ónafngreindur
embættismaður AFP-fréttastofuna.
Stjórnvöld í Moskvu hafa ekki skilgreint Hamas-
samtökin, sem unnu stórsigur í palestínsku þingkosning-
unum nýverið, sem hryðjuverkasamtök, ólíkt Evrópusam-
bandinu og Bandaríkjastjórn. Pútín Rússlandsforseti
greindi fréttamönnum frá því á fimmtudag að hann vildi
bjóða Hamas-mönnum til Moskvu til viðræðna, en nú er
þess beðið að leiðtogar Hamas hefji undirbúning að mynd-
un ríkisstjórnar í Palestínu.
Rússar eru aðilar að svokölluðum kvartett sem haft hef-
ur milligöngu í friðarviðleitni Ísraela og Palestínumanna –
en honum tilheyra, auk Rússa, Bandaríkjamenn, Samein-
uðu þjóðirnar og Evrópusambandið – og eiga Rússar því
hlut að ályktun kvartettsins sem lýsir Hamas sem ótæk-
um samstarfsaðila í ljósi endurtekinna hryðjuverka sam-
takanna gegn ísraelskum borgurum. Minnti Mark Regev,
talsmaður ísraelska utanríkisráðuneytisins, Rússa á þessa
staðreynd í fyrrakvöld. Fleiri var hvassyrtir.
„Þetta er tilraun til að friðþægjast við múslímaheiminn
á okkar kostnað,“ sagði Avigdor Lieberman, leiðtogi
Yisrael Beiteinu, harðlínuflokks rússneskra innflytjenda.
Pútín Rússlandsforseti
hart gagnrýndur í Ísrael
„Rýtingur í bak“ Ísraela að hann hyggist bjóða leiðtogum
Hamas til Moskvu til viðræðna
Reuters
Einn af leiðtogum Hamas-samtakanna í Palestínu,
þingmaðurinn Ismail Haniyeh, ræðir við stuðnings-
mann í Egyptalandi. Talið er að áhrifamestu leiðtogar
séu menn í útlegð í Líbanon og Sýrlandi.
Vladímír Pútín
Pristina. AFP. | Fulltrúar á þingi
Kosovo völdu sér í gær nýjan for-
seta í stað Ibrahims Rugova, en
hann lést 21. janúar sl. af völdum
lungnakrabbameins. Fyrir valinu
varð Fatmir Sejdiu, hófsamur
fulltrúi flokks Rugova, Lýðræðis-
bandalagsins (LDK).
Sejdiu er 54 ára gamall lagapró-
fessor og hefur verið formaður
LDK frá stofnun flokksins 1989 og
vann hann náið með hinum látna
þjóðhöfðingja Albana í Kosovo, en
Rugova hafði verið helsta sjálf-
stæðishetja Kosovo-Albana síð-
ustu sextán árin. Sejdiu hefur enn-
fremur setið á þinginu í Pristina
frá upphafi, þ.e. frá 2001.
Mikilvægt þótti að fylla skjótt og
vel það pólitíska tómarúm sem
myndaðist með fráfalli Rugova, en
framundan eru viðræður milli
Serba og Albana um framtíðar-
skipan mála í Kosovo. Kosovo er að
forminu til hérað í Serbíu en Alb-
anar, sem eru um 90% íbúanna,
vilja sjálfstæði og hefur þótt senni-
legt að niðurstaða viðræðnanna,
sem Sameinuðu þjóðirnar hafa
milligöngu um, yrði sú að þeir
fengju sjálfstæði að uppfylltum
ákveðnum skilyrðum og að tiltekn-
um tíma liðnum.
Fatmir Sejdiu nýr forseti Kosovo