Morgunblaðið - 31.05.2006, Side 14

14 MIÐVIKUDAGUR 31. MAÍ 2006 MORGUNBLAÐIÐ
ERLENT
KRÖFUR um afsögn John Presc-
otts, aðstoðarforsætisráðherra
Bretlands, verða sífellt háværari,
eftir að hann viðurkenndi skömmu
fyrir sveitastjórnarkosningarnar 4.
maí að hafa haldið framhjá með
einkaritara sínum. Til að gera illt
verra birtu bresku götublöðin um
helgina myndir af Prescott sem
sýndu hann leika sér í krokket,
þegar hann átti að vera að leysa af
Tony Blair forsætisráðherra í fjar-
veru hans í Washington.
Þessi fjarvera Prescotts frá
embættisskyldum sínum er kald-
hæðnisleg í ljósi þess að stjórn-
málaskýrendur segja að afsögn
hans myndi grafa undan stöðu
Blairs, sem sjálfur hefur neitað að
gefa upp um hvenær hann muni
láta af embætti.
Þá hefur Prescott verið gagn-
rýndur fyrir að halda himinháum
launum og ýmsum ráðherrafríð-
indum eftir að Blair stokkaði ræki-
lega upp í stjórn sinni eftir slæma
útreið í sveitastjórnarkosningun-
um, þótt ekki sé lengur sérstakt
ráðuneyti undir hans stjórn. Þess í
stað fer Prescott nú fyrir níu þing-
nefndum og leysir Blair af hólmi í
fjarveru hans, en hvorugt veitir
sérstök fríðindi umfram venjulega
þingmenn.
Hrekur frá atkvæði kvenna
Christine McCafferty, þingkona
og samflokksmaður Prescotts,
tjáði sig um stöðu hans í gær.
Sagði hún að Verkamannaflokk-
urinn gæti ekki endurnýjað
samband sitt við mikilvæga kjós-
endur úr röðum kvenna nema að
Prescott yrði refsað fyrir framhjá-
haldið með ritaranum.
„Ég tel að hann ætti að segja af
sér,“ sagði McCafferty í samtali
við breska útvarpið, BBC, í gær.
Prescott á sér hins vegar enn
sína bandamenn og sagði Des
Browne, varnarmálaráðherra, að
hann væri „ennþá mikilvægur
samstarfsmaður“ og að án hans
hefði flokkurinn ekki unnið þrenn-
ar kosningar í röð.
Á hinn bóginn birti dagblaðið
Daily Mirror frétt þess efnis að
Blair hygðist ræða við Prescott,
sem er 68 ára, um framtíð hans
næsta sunnudag, eftir að hann
snýr til baka úr fríi á Ítalíu. Þá
birtist um helgina frétt í breska
blaðinu Independent þess efnis að
þrír reyndir þingmenn hefðu
áhuga á stöðu Prescotts, en það er
talið geta komið flokknum til góða
að skipa konu í embætti hans.
Í samtali við breska útvarpið,
BBC, í gær sagði Colin Brown,
vinur Prescotts og höfundur ævi-
sögu hans, að ekki væri í spilunum
að Prescott hætti á undan Blair og
að þeir væru tengdir sterkum
böndum.
Ian Gibson, sem er háttsettur
þingmaður stjórnarinnar, var
ósammála og sagði helmingslíkur á
að Prescott mynda hætta innan
viku.
Segir Prescott af sér?
Vilji fyrir því að
kona taki við
embætti aðstoðar-
forsætisráðherra
Bretlands
Eftir Baldur Arnarson
baldura@mbl.is
John Prescott í gær.
Reuters
BRYNVARÐIR hervagnar og afg-
anskir hermenn voru við öllu búnir í
Kabúl, höfuðborg Afganistans, í gær
en til óeirða kom í borginni á mánu-
dag sem taldar eru hafa kostað fjór-
tán manns lífið. Ekki kom hins vegar
til frekari átaka og var minna um fólk
á götum og torgum borgarinnar en
venjulega og virtist útgöngubann,
sem stjórnvöld fyrirskipuðu í fyrra-
kvöld, skipta þar miklu.
Afganska þingið ræddi atburði
mánudagsins á fundi í gær og krafðist
þess að hinir ábyrgu yrðu handteknir,
bæði bandarísku hermennirnir sem
voru valdir að tólf bíla árekstrinum
sem varð til þess að óeirðirnar brut-
ust út, sem og þeir sem gengu ber-
serksgang í kjölfarið, rændu og rupl-
uðu, kveiktu í bílum og eyðilögðu
önnur verðmæti.
Sumir óttast að atburðir mánu-
dagsins séu til marks um að harðn-
andi átök milli talibanahreyfingarinn-
ar og Bandaríkjahers í suðurhluta
landsins séu að breiðast út; en Banda-
ríkjamenn réðust m.a. á vígi talibana í
Kandahar-héraði í fyrradag og segja
að hátt í fimmtíu hafi fallið þá.
Aðrir telja hins vegar að skýring-
anna sé að leita í því að reiði kraumi
undir niðri meðal Kabúl-búa vegna
aðstæðna þeirra, sem lítt hafa batnað
síðustu ár þrátt fyrir að alþjóðleg
samtök og erlend ríki hafi dælt pen-
ingum inn í landið.
„Menn höfðu svo miklar væntingar
2002 að það hefði alltaf verið útilokað
að uppfylla þær,“ hafði AFP-frétta-
stofan eftir Paul Barker, yfirmanni
hjálparsamtakanna CARE Inter-
national, en höfuðstöðvar CARE voru
eyðilagðar í óeirðunum.
Um tólf milljörðum Bandaríkja-
dala, um 850 milljörðum ísl. króna,
hefur skv. blaðinu The Guardian verið
beint til Afganistans til þróunarað-
stoðar síðustu fjögur árin en meiri-
hluti Afgana lifir þó enn án rafmagns
og góðs drykkjarvatns. Þá skortir um
sjö milljónir manna mat, skv. tölum
Sameinuðu þjóðanna, og 53% lands-
manna draga fram lífið á minna en
einum dollara, 72 krónum, á dag.
Á móti kemur að útlendingar í
borginni hafa flestir himinhá laun og
Afgönum er fullkunnugt um það.
Ungmennin eins og byssupúður
Aðrir telja reiði mótmælenda á
mánudag hins vegar fyrst og síðast
beinast gegn þeim hroka sem banda-
rískir hermenn hafi sýnt í Kabúl og
víðar í landinu. Var tilefni óeirðanna
enda tólf bíla árekstur sem banda-
rískur hervagn varð valdur að, líkt og
áður sagði, en Bandaríkjamenn hafa
tileinkað sér aksturslag í Kabúl sem
fullyrða má að skapi öðrum í umferð-
inni stórhættu.
Loks eru margir á því að mótmæl-
endur hafi flestir verið ótíndir glæpa-
menn, öfl eða einstaklingar sem
stjórnist af glæpahneigð. „Mörg ung-
mennanna í borginni eru eins og
byssupúður – þau þurfa bara eitthvað
til að kveikja í þeim og þegar það ger-
ist þá springa þau allrækilega,“ sagði
Afganinn Bahram Sarwary í samtali
við AFP.
Vonbrigði Afgana
kveikjan að óeirðunum
Eftir Davíð Loga Sigurðsson
david@mbl.is
Reuters
Afganskir hermenn á verði í Kabúl.