Morgunblaðið - 01.08.2007, Blaðsíða 16

16 MIÐVIKUDAGUR 1. ÁGÚST 2007 MORGUNBLAÐIÐ
ERLENT
FRÉTTASKÝRING
Eftir Boga Þór Arason
bogi@mbl.is
ÓHÆTT er að segja að öll spjót
standi á Pervez Musharraf, forseta
Pakistans og yfirhershöfðingja.
Musharraf er í fyrsta lagi milli
steins og sleggju í baráttunni við rót-
tæka íslamista, það er múslíma sem
berjast fyrir stofnun íslamsks ríkis í
Pakistan. Íslamistarnir hafa sótt í
sig veðrið að undanförnu og
sprengjutilræði þeirra hafa kostað
um 200 manns lífið frá því að her-
menn réðust inn í Rauðu moskuna,
miðstöð íslamista í Íslamabad, eftir
vikulangt umsátur 10. júlí. Yfir 100
manns til viðbótar lágu í valnum eftir
þann hildarleik.
Íslamistum og stuðningsmönnum
afganskra talibana vex einnig ás-
megin í norðvesturhluta Pakistans,
við landamærin að Afganistan.
Bandarísk yfirvöld telja að foringjar
hryðjuverkanetsins al-Qaeda hafi
hreiðrað um sig þar og safnað liði að
nýju eftir að hafa flúið frá Afganist-
an.
Í nýlegri skýrslu bandarísku
leyniþjónustunnar kemur fram að
hún telur að liðsmenn al-Qaeda í
landamærahéruðunum séu að skipu-
leggja árásir á Bandaríkin og að að-
gerðir pakistanska hersins þar hafi
ekki borið árangur. The Washington
Post hafði eftir bandarískum emb-
ættismönnum í vikunni sem leið að
sérsveitir Bandaríkjahers kynnu að
ráðast inn í Pakistan til að afstýra
slíkum hryðjuverkum ef allt annað
brygðist.
Bandaríkjastjórn áréttaði þó
stuðning sinn við Musharraf sem
ákvað að styðja baráttu hennar gegn
hryðjuverkastarfsemi í heiminum
eftir hryðjuverkin í Bandaríkjunum
11. sept. 2001. Segja má að þetta hafi
verið ákvörðun eins manns því hún
naut ekki mikils stuðnings meðal
Pakistana. Flestir þeirra eru andvíg-
ir bandalaginu við Bush-stjórnina og
líta á hernaðinn sem „bandarískt
stríð“ á kostnað pakistönsku þjóðar-
innar. Um 600 pakistanskir hermenn
liggja í valnum í landamærahéruð-
unum og mannfallið hefur kynt undir
andstöðunni við hernaðinn meðal al-
mennings og í pakistanska hernum.
Fréttir um að Bandaríkjaher láti ef
til vill til skarar skríða gegn al-
Qaeda innan landamæra Pakistans
hafa því valdið miklu uppnámi þar í
landi og óttast er að slík árás hleypi
öllu í bál og brand.
Stjórnarandstaðan eflist
Musharraf á ekki aðeins í höggi
við íslamista, heldur einnig lýðræð-
issinna sem hafa sótt í sig veðrið frá
því að hæstiréttur Pakistans úr-
skurðaði 20. júlí að Musharraf hefði
brotið lög með því að víkja Iftikhar
Mohammed Chaudry úr embætti
forseta dómstólsins.
Hreyfingar pakistanskra lögfræð-
inga höfðu staðið fyrir fjögurra mán-
aða götumótmælum vegna brott-
vikningarinnar. Hreyfingarnar hafa
barist gegn stjórn forsetans og hers-
höfðingjans frá því að hann rændi
völdunum í október 1999 en brott-
vikningin varð til þess að þær
tvíefldust og sameinuðust í barátt-
unni fyrir réttarríki, sjálfstæði dóm-
stóla og lýðræði. Önnur baráttusam-
tök og stjórnarandstöðuflokkar tóku
höndum saman við lögfræðingana í
baráttunni við Musharraf og er talið
að hann hafi aldrei staðið eins höllum
fæti frá því að hann rændi völdunum
fyrir átta árum.
Margir telja að Musharraf hafi
vikið forseta hæstaréttarins frá til að
skipa auðsveipari mann í embættið
og tryggja að dómstóllinn hindri
ekki áform hans um að sækjast eftir
endurkjöri sem forseti á þingi lands-
ins og halda jafnframt stöðu sinni
sem yfirhershöfðingi. Lögfræðing-
arnir og stjórnarandstöðuflokkarnir
telja að hvort tveggja stangist á við
stjórnarskrána og líklegt er að
hæstirétturinn eigi síðasta orðið í
deilunni.
Herlög sett?
Úrskurður dómstólsins er því
mikið áfall fyrir Musharraf og gæti
orðið til þess að hann lýsti yfir neyð-
arástandi eða setti herlög til að leysa
upp hæstarétt landsins og aflýsa
þingkosningum sem eiga að fara
fram í byrjun næsta árs.
Hugsanlegt er þó að Benazir
Bhutto, fyrrverandi forsætisráð-
herra Pakistans, komi forsetanum til
bjargar.
Hermt er að Musharraf og Bhutto
hafi komið saman í Sameinuðu arab-
ísku furstadæmunum á föstudaginn
var til að ræða „pólitískt samkomu-
lag sem geri hófsömu öflunum kleift
að taka höndum saman og sigra
öfgamennina í komandi þingkosn-
ingum“, að því er fréttastofan AFP
hafði eftir pakistönskum ráðherra.
Bhutto var forsætisráðherra á ár-
unum 1988-90 og 1993-96 en er nú í
útlegð vegna ásakana um spillingu.
Hún hefur varað við því að leiðtogar
íslamskra öfgamanna séu að leggja á
ráðin um að steypa stjórn Musharr-
afs af stóli og kveðst vera tilbúin að
styðja hann sem forseta næstu fimm
árin að því tilskildu að hann segi af
sér sem yfirhershöfðingi. Hún setur
einnig það skilyrði að hún geti tekið
þátt í þingkosningunum og að af-
numið verði stjórnarskrárákvæði
um að ekki megi skipa neinn oftar en
tvisvar í embætti forsætisráðherra.
Musharraf milli steins og sleggju
Íslamistar og lýðræðissinnar í Pakistan sækja í sig veðrið og þjarma að forsetanum en hugsanlegt er
að Benazir Bhutto komi honum til bjargar gegn því að hún fái að verða forsætisráðherra aftur
Reuters
Ólga og blóðsúthellingar Konur í íslömsku hreyfingunni MMA mótmæltu
í gær mannskæðri árás pakistanska hersins á Rauðu moskuna í Íslamabad.
» Fréttir um að
Bandaríkjaher láti ef
til vill til skarar skríða
gegn al-Qaeda innan
landamæra Pakistans
hafa valdið miklu upp-
námi þar í landi og ótt-
ast er að slík árás hleypi
öllu í bál og brand.
NÝLEGA fæddust þrír kóalabjarnarhúnar í dýragarði í
Sydney. Á myndinni má sjá einn þeirra ásamt móður
sinni, Töru. Kóalabirnir eða pokabirnir lifa rólegu lífi
en þeir sofa í um 19 stundir á sólarhring. Líkt og ná-
grannar þeirra, kengúrurnar, bera þeir afkvæmi sín í
poka á maganum fyrstu vikurnar.
AP
Pokabjarnarmæðgin hafa það náðugt
MIKLIR skógareldar geisa nú á
tveimur eyjum í Kanaríeyjaklasan-
um, Tenerife og Gran Canaria. Um
11.000 manns hafa verið fluttar á
brott vegna eldanna, sem eru þeir
stærstu í tíu ár. Aðstæður til slökkvi-
starfa hafa verið mjög erfiðar, eyjarn-
ar eru þannig að besta leiðin til að
slökkva eldinn er úr lofti. Veðurskil-
yrði hafa verið mjög erfið, bæði mikill
lofthiti og mikill vindur, þannig að
einungis tvær þyrlur hafa verið þess
megnugar að taka þátt í slökkvistarf-
inu.
Alls brennur á fjórum stöðum en
slökkvistarfi er beint að tveimur
stærstu eldunum. Eldarnir hafa
breiðst yfir um 24.000 hektara. Í gær
hafði eldurinn skemmt um 65% af
Palmitos-garðinum, griðastað um 150
fuglategunda og fjölda pálmatrjáa.
Skógareld-
ar á Kan-
aríeyjum
Yfir 11.000 manns
fluttir á brott
CONDOLEEZZA Rice, utanríkis-
ráðherra Bandaríkjanna, hélt í gær
til Mið-Austurlanda ásamt Robert
Gates varnarmálaráðherra.
Bandaríkjamenn vilja með heim-
sókninni fullvissa bandamenn sína á
svæðinu um vilja sinn til þess að ró
komist þar á. Til að það megi verða
telja Bandaríkin sig verða að fá
bandamenn sína til þess að taka
höndum saman gegn Íran, Sýrlandi
og Hezbollah-samtökunum. Í fyrra-
dag tilkynnti Rice að 63 milljörðum
bandaríkjadala yrði varið í að vopna
ríki hliðholl Bandaríkjunum á
svæðinu.
Fyrsti fundurinn var í Egypta-
landi í gær þar sem Rice og Gates
ræddu við fulltrúa Egyptalands,
Jórdaníu og ríki í Samstarfsráði
ríkja við Persaflóa. Nokkur þessara
ríkja hafa verið sökuð um að eiga að-
ild að óöldinni í Írak, t.d. hefur Sádi-
Arabía legið undir grun um að
hleypa súnnískum vígamönnum inn í
landið. Eftir fundinn undirrituðu rík-
in samkomulag þar sem þau sóru að
hætta öllum afskiptum af Írak. Í dag
hyggst Rice halda til Sádi-Arabíu og
því næst til Ísraels og Palestínu.
Vopna bandamenn sína
í Mið-Austurlöndum
Bandarískir ráðherrar heimsækja Mið-Austurlönd
ÖRYGGISRÁÐ Sameinuðu þjóð-
anna samþykkti í gær að senda
26.000 manna friðargæslulið til
Darfur-héraðs í Súdan, þar sem
rúmlega 200.000 manns hafa fallið í
valinn í blóðugum bardögum síðast-
liðin fjögur ár. Herliðið verður hið
fyrsta sem Sameinuðu þjóðirnar og
Afríkusambandið mynda í samein-
ingu og gert er ráð fyrir að það
verði komið til Darfur eigi síðar en
um áramót og taki þar við störfum
mun minni hóps friðargæslumanna
á vegum Afríkusambandsins.
Aðalritari Sameinuðu þjóðanna,
Ban Ki-moon, sagði þetta „sögulega
og fordæmislausa lausn“.
Friðargæslulið
til Darfur
KANG Kek Ieu,
einnig þekktur
sem Duch, var
ákærður fyrir
glæpi gegn mann-
kyninu af kam-
bódískum dóm-
stól í gær. Duch
var yfirmaður
hins alræmda Tu-
ol Sleng fangelsis
á valdatíma Rauðu khmeranna á ár-
unum 1975-1979. Talið er að 16.000
manns hafi verið pyntaðir í fangels-
inu áður en þeir voru myrtir. Duch
verður fyrsti valdamikli maðurinn
úr röðum Rauðu khmeranna sem
dreginn er fyrir dómstóla, en Pol
Pot einræðisherra lést áður en rétt-
arhöld yfir honum hófust.
Réttað í
Kambódíu
Kaing Kek Ieu, líka
þekktur sem Duch.
GRUNNSKÓLI í Sydney hefur nú
ákveðið að sólgleraugu skuli vera
hluti af skólabúningi barnanna. Sól-
gleraugun verja augun gegn út-
fjólubláum geislum sólarinnar.
Sólgleraugu
skylda í skólum
YFIRVÖLD í Washington-ríki hafa
ákveðið að setja upp hátalara við al-
ræmda strætisvagnastoppistöð og
spila þar úrval af klassískri tónlist.
Ungir fíkniefnaneytendur og klíku-
meðlimir hafa vanið komur sínar á
stoppistöðina undanfarið og stunda
þar jafnvel vafasöm viðskipti.
Yfirvöld segja klassísku tónlistina
munu trufla glæpamennina við iðju
sína. Jacqueline Helfgott, sál-
fræðingur við Seattle-háskóla, segir
áætlunina byggjast á hefðbundnum
kenningum um fyrirbyggingu
glæpa. Í Kaupmannahöfn hefur
þessi aðferð verið notuð á lestar-
stöðvum með góðum árangri.
Klassísk
glæpavörn