Morgunblaðið - 01.08.2007, Qupperneq 19
Eftir Kristínu Heiðu Kristinsdóttur
khk@mbl.is
K
arl faðir minn hefur
starfað sem verkfræð-
ingur alla sína starfs-
ævi en hann hefur alla
tíð haft mikinn áhuga á
matargerð og alið með sér þann
draum að opna franskan veit-
ingastað í litlu landi og nú hefur það
loks orðið að raunveruleika,“ segir
Frakkinn Roman Guy sem tekur
fullan þátt í að láta draum föður síns,
Jean Francois, rætast og starfar á
veitingastaðnum ásamt honum, móð-
ur sinni og systur.
Fjölskyldan opnaði nýlega
veitingahúsið Le rendez vous við
Klapparstíg í Reykjavík í húsnæði
sem veitingastaðurinn Pasta basta
var eitt sinn í. Þar er frönsk mat-
argerð í hávegum höfð og þau fluttu
með sér tvo franska kokka til lands-
ins sem sjá um að reiða fram fransk-
ar krásir. „Íslenskt hráefni er frá-
bært og ein af ástæðunum fyrir því
að við völdum Reykjavík er sú að
borgin liggur við sjó og hér er því
hægt að fá fyrsta flokks ferskt
sjávarfang, en við leggjum mikið upp
úr ferskleika og gæðum hráefnis.
Við bjóðum til dæmis upp á villtan
lax og íslenskan ferskan hákarl.“
Ástfangin af Íslandi
„Önnur ástæða þess að við völd-
um Reykjavík er sú að hér er fá-
mennt og öll samskipti fólks eru
persónuleg, við kunnum vel að meta
það. Þetta er ólíkt því sem við
þekkjum úr stórborginni París þar
sem við bjuggum áður. Þar yrðir
fólk ekki á ókunnuga og andrúms-
loftið er allt annað enda er París tíu
milljón manna borg og þar eru
margir einmana. Okkur finnst
Reykjavík líka falleg borg og erum
mjög hrifin af Íslandi. Við höfðum
farið víða um heim til að leita að
rétta staðnum en ekki fundið hann.
Við kynntumst Íslandi í gegnum
bróður minn, sem er ljósmyndari og
hafði komið nokkrum sinnum hing-
að og tekið myndir. Hann var alltaf
að dásama þetta land í norðrinu,
fólkið og villta náttúruna. Hann
sýndi okkur myndir héðan og við
ákváðum að prófa að koma hingað í
frí fyrir einu og hálfu ári og þá varð
ekki aftur snúið. Við urðum ást-
fangin af landinu. Okkur finnst lífs-
gæði felast í að búa á litlum stað
eins og Reykjavík með sjó og fjöll
nálægt okkur.“
Roman segist ekki vita betur en að
veitingastaðurinn þeirra sé eini stað-
urinn sem er algjörlega franskur hér
í borg eða jafnvel á öllu landinu. „Við
búum allt til hér á staðnum í eldhús-
inu, líka súkkulaði, bökudeig og kök-
ur. Öll húsgögn, myndir á veggjum
og borðbúnað fluttum við með okkur
frá Frakklandi til að skapa franska
stemningu og hafa þetta alvöru
franskt veitingahús. Sumt er antík,
eins og barborðið, sem er frá 1927 og
hefur upplifað ýmislegt úti í París
þar sem það hefur staðið og þjónað
allan þennan tíma.“
Frönsk eplabaka
Tarte Alsacienne
Deig:
250 g hveiti
25 g púðursykur
5 g salt
125 g smjör
1 eggjarauða
5 cl vatn
Blandið hveitinu og smjörinu
hratt saman með höndunum, setjið
vatn, eggjarauðu, salt og sykur sam-
an við. Búið til kúlu úr deiginu og
setjið í ísskáp í 1 klst.
Fylling:
600 g epli
½ sítróna
Takið börkinn af eplunum, skerið
þau í sneiðar og kreistið sítrónu-
safann yfir. Stráið hveiti á borðið,
fletjið deigið út og leggið í eitt eld-
fast mót sem hefur verið smurt að
innan með smjöri (eða í 8 lítil form)
og stingið nokkur göt á deigið. Dreif-
ið eplasneiðunum yfir.
Kremið:
1 eggjarauða
2 egg
50 g púðursykur
20 cl mjólk
20 cl rjómi
2 dropar fljótandi vanilla
Þeytið þessu öllu saman og hellið
yfir eplin og deigið í forminu. Setjið í
240° C heitan ofn í nokkrar mínútur
en lækkið síðan hitann í 200° C og
bakið í um 40 mínútur (25-30 mín-
útur ef notuð voru 8 lítil form).
Morgunblaðið/Ómar
Fjölskyldufyrirtæki Jean François Guy ásamt konu sinni Véronique, dótturinni Claire og syninum Roman við hið forna barborð frá 1927 sem kemur frá París.
Franskt eldhús Franski kokkurinn Cedric einbeittur við matseldina.
Í matsalnum Sonurinn Roman spjallar við gesti.
Létu drauminn rætast
|miðvikudagur|1. 8. 2007| mbl.is
daglegtlíf
Fyrir rúmum hálfummánuði voru Lellurnar á
ferð um Vestfirði og buðu
mönnum sínum að vera með.
Sumar gistu í Bjarkarlundi og
var boðið í Kollabúðir,
sumarbústað Arnbjargar
Björgvinsdóttur og Jóhanns
Bergþórssonar. Nýveidd
bleikja var meðal þeirra
krása, sem fram voru reiddar.
Kollabúðir eru fyrir botni
Þorskafjarðar og Skógar utar
á ströndinni. Þar fæddist
Matthías Jochumsson. Halldór
Blöndal þakkaði fyrir sig með
þessari vísu:
Ilm af jörðu bleikjan ber.
Bjart er vín og tært í glasi.
Skógar eru utar hér
og mín sál hjá Matthíasi.
Í ágætri bók Þórunnar Erlu
Valdimarsdóttur, Upp á
Sigurhæðir, rifjar hún upp, að
13 ára hafi Matthías verið í
heimsókn í Skógum, meðan
vorþingið á Kollabúðum stóð
yfir, og átt erfitt með að
kveðja móður sína. Að því
víkur hann í erfiljóði um
hana:
Ég gekk svo erfiðan æsku-stig,
því ellefu vetra kvaddi ég þig,
og lítill var kjarkur og kraftur.
Ég man þau ár og ég man þau tár,
ég man þau brennandi hjarta-sár,
er kom ég og – kvaddi þig aftur.
Hér er vísað til þess, að í
kringum fermingaraldur var
Matthías í tvö ár á
Kvennabrekku hjá Guðmundi
presti Einarssyni
móðurbróður sínum. Séra
Árni Þórarinsson rifjar upp í
endurminningum sínum að
þar hafi hann ort um sjálfan
sig:
Matthías á merunum
mikill þykist vera.
Fáránlega fer honum
fæturna að bera.
pebl@mbl.is
VÍSNAHORNIÐ
Á Kolla-
búðum og
í Skógum