Morgunblaðið - 09.11.2007, Síða 22

22 FÖSTUDAGUR 9. NÓVEMBER 2007 MORGUNBLAÐIÐ
AKUREYRI
BRAGÐAREFIR sigruðu á fyrsta
krullumóti vetrarins hjá Krullu-
deild Skautafélags Akureyrar. Því
lauk í vikunni, en keppt er um hinn
svokallaða Gimli-bikar sem Vestur-
Íslendingarnir Alma og Ray Sig-
urdsson frá Gimli í Manitoba gáfu
deildinni þegar Skautahöllin var
vígð árið 2000. Fyrst var keppt um
þennan glæsilega bikar 2001 og er
þetta því í sjöunda skiptið sem ak-
ureyrskt krullufólk keppir um
hann. Tíu lið tóku þátt í mótinu sem
hófst í byrjun október og léku þau
einfalda umferð, allir við alla.
Bragðarefirnir fengu 13 stig, þeir
unnu 6 leiki, gerðu eitt jafntefli og
töpuðu tveimur. Bragðarefir höfðu
raunar tryggt sér efsta sætið fyrir
lokaumferðina. Í liðinu eru þau
Davíð Valsson, Heimir Jónasson,
Hólmfríður Þórðardóttir, Jóhann
Ingi Einarsson og Jón Einar Jó-
hannsson. Um komandi helgi verða
fimm krullumenn frá Akureyri á
faraldsfæti og taka þátt í móti í
Tårnby í Danmörku, sem hefst
reyndar í dag, annars vegar fjórir
saman í liði og svo einn sem myndar
lið með dönskum landsliðskonum
og sænskum þjálfara þeirra.
Bragðarefir
sleipastir
NÝ ævisaga Jónasar Hallgrímsson-
ar kemur út á 200 ára afmælisdegi
hans, eftir viku, á vegum menningar-
félagsins Hrauns í Öxnadal. Böðvar
Guðmundsson rithöfundur hefur
skrifað söguna og nefnir Jónas Hall-
grímsson – Ævimynd. Verður eintak
af bókinni afhent öllum nemendum í
tíunda bekk í grunnskólum landsins
að gjöf.
Að sögn Tryggva Gíslasonar,
magisters og formanns menningar-
félagsins Hrauns í Öxnadal ehf., rek-
ur Böðvar ævi og störf skáldsins,
náttúrufræðingsins og stjórnmála-
mannsins Jónasar Hallgrímssonar
og bregður ljósi á þá þætti í lífi hans
sem gerðu hann að skáldi. Inn í ævi-
söguna er fléttað kvæðum Jónasar
og brotum úr bréfum hans og dag-
bókum sem tengjast sérstaklega
þroskaferli hans sem manns og
skálds.
Minningarstofa á Hrauni
Sama dag, 16. nóvember, opnar
forseti Íslands minningarstofu um
Jónas Hallgrímsson á fæðingarstað
hans, Hrauni í Öxnadal.
Að Hrauni verður til frambúðar
sýning þar sem brugðið verður upp
svipmyndum úr ævi þessa fyrsta nú-
tímaskálds Íslendinga sem með ljóð-
um sínum fann fegurð íslenskrar
náttúru og hefur mótað íslenskar
bókmenntir og íslenska list í hart-
nær tvær aldir, eins og Tryggvi
kemst að orði.
Lýst er ljóðmáli og myndlíkingum
í kvæðum hans og gerð grein fyrir
nýyrðasmíð hans, bæði í ljóðum og
fræðiritum. Sýningin er gerð með
það fyrir augum að gestir komist í
snertingu við manninn Jónas Hall-
grímsson á ýmsum æviskeiðum
hans. Þjóðminjasafn Íslands lánar
skrifborð úr eigu Jónasar og líkan af
húsi því sem hann bjó síðast í í Kaup-
mannahöfn, við opnun sýningarinn-
ar. Minningarstofan er hluti af minn-
ingarsetri um Jónas sem komið
verður á fót á Hrauni í samvinnu við
ýmsar rannsóknar- og menningar-
stofnanir, skv. upplýsingum
Tryggva Gíslasonar.
Auk minningarstofunnar verður á
Hrauni rannsóknaraðstaða fyrir
fræðafólk í bókmenntum, náttúru-
vísindum og stjórnmálum, en Jónas
fjallaði um alla þessa þætti á stuttri
starfsævi sinni.
Annar hluti af minningarsetrinu
er fólkvangur í landi Hrauns sem
nefndur hefur verið Jónasarvangur
og opnaður var í sumar. Meginhluti
jarðarinnar var þá gerður að nátt-
úrulegu útivistarsvæði fyrir almenn-
ing. Innan fólkvangsins er m.a.
Drangafjall með hinum sérstaka
Hraundranga, sem kemur fyrir í
kvæði Jónasar Ferðalokum, sem
nefnt hefur verið fegursta ástarljóð
ort á íslenska tungu, en er um leið
óður til landsins og fegurðarinnar.
Ný ævisaga á 200 ára
afmælisdegi Jónasar
Morgunblaðið/Skapti Hallgrímsson
Jónas Séð heim að Hrauni í Öxnadal. Hraundrangi, sem skagar upp úr
hvassbrýndu Drangafjalli, hefur lengi verið tákn Jónasar Hallgrímssonar.
Í HNOTSKURN
»Forseti Íslands, ÓlafurRagnar Grímsson, mun að
morgni afmælisdags Jónasar
Hallgrímssonar, 16. nóv-
ember, afhenda fyrstu eintök
hinnar nýju ævisögu nem-
endum Þelamerkurskóla sem
minnast um leið drengsins
sem fæddist og ólst upp í sveit-
inni og varð skáld, listaskáldið
góða.
„ER þróunarsamvinna Íslands á
villigötum? Hvert stefnir?“ Þessar
spurningar mun Hilmar Þór Hilm-
arsson, lektor við viðskipta- og raun-
vísindadeild Háskólans á Akureyri,
gera að umfjöllunarefni á málstofu
deildarinnar í dag. Fyrirlesturinn
hefst kl. 12.15 í stofu K202 á Sólborg.
Í erindinu fjallar Hilmar um núver-
andi skipulag íslenskrar þróunar-
samvinnu og breyttar áherslur í al-
þjóðlegu þróunarstarfi. Hann mun
einnig fjalla um tengsl þróunarsam-
vinnu og útrásar íslenskra fyrir-
tækja. Hilmar svarar fyrirspurnum
að erindi loknu.
Hilmar starfaði áður sem sérfræð-
ingur hjá Alþjóðabankanum í Víet-
nam, Lettlandi og í Bandaríkjunum.
Hann gegndi starfi aðstoðarmanns
utanríkisráðherra á árunum 1995-
1999.
Er þróunar-
samvinnan
á villigötum?
HUGMYNDAFRÆÐIN á bak við
nýja verslun BYKO í Kauptúni í
Garðabæ er að hægt eigi að vera að
labba þaðan út með „heilt hús á bak-
inu“ ef svo má segja, að sögn Atla
Ólafssonar rekstrarstjóra. Versl-
unin verður opnuð í dag, föstudag.
Í versluninni er fáanlegt nánast
allt sem þarf til að gera hús íbúð-
arhæft. Skrúfur, naglar, plötur, inn-
réttingar, ljós og rafmagnsvörur,
svo fátt eitt sé talið. Auk þess eru
sýndar lausnir fyrir húsbyggjendur;
fullbúin baðherbergi, barna-
herbergi, eldhús o.s.frv. Innrétting-
arnar, eldhús-, bað- og þvottahús-
innréttingar, eru tilbúnar til
afhendingar, en þær eru dönsk
hönnun og heita Concepta. „Við sýn-
um hvernig hlutirnir eru gerðir frá
upphafi, rafmagnið, gipsplötuna,
innréttinguna og tækin,“ segir Atli
og hnykkir á því að þarna sé allt fá-
anlegt til að klára hús. Verslunin er
á 13.000 ferm. og er stærsta bygg-
ingavöruverslun á Íslandi á einum
gólffleti. Mjög gott aðgengi er að
versluninni og skipulag þannig að
fólk á að vera fljótt að versla.
„Kjarninn af starfsfólki sem hér
er er úr verslun BYKO í Hafn-
arfirði,“ segir Atli Ólafsson rekstr-
arstjóri, en hann hafði yfirumsjón
með þeirri verslun. Hann tekur sér-
staklega fram að í Hafnarfirði hafi
verið afar tryggur og góður við-
skiptamannahópur. „Við erum að
stórauka vöruúrvalið í Kauptúni, en
vorum fyrst og fremst í grófri vöru
og verkfærum í Hafnarfirði og mun-
um sinna því enn betur í Kauptúni,“
segir hann.
Góði andinn fluttur
frá Hafnarfirði
Víðir Atli Ólafsson verður versl-
unarstjóri hinnar nýju BYKO-
verslunar í Kauptúni. Hann hefur
verið viðloðandi BYKO í 13 ár, nú
síðast starfaði hann í BYKO í Kefla-
vík, en hefur þó „unnið í öllum versl-
unum BYKO á höfuðborgarsvæð-
inu“, eins og hann lýsir sjálfur.Víðir
Atli upplýsir að vörur sem ekki hafi
áður verið seldar hjá BYKO verði fá-
anlegar í versluninni í Kauptúni.
„Hér erum við að sameina alla bygg-
ingavöru undir einu þaki.“ Markhóp-
urinn er hvort sem er einstaklingar
og verktakar en Víðir Atli segir að
verslunin sé þó að hluta sniðin í
kringum verktaka og iðnaðarmenn.
„Versluninni hefur verið stillt þann-
ig upp að mjög gott aðgengi er fyrir
verktaka og iðnaðarmenn, meðal
annars er sér fagmannainngangur
og allt timbur er nú innandyra,“ seg-
ir Víðir Atli.
Víðir Atli og Atli lýsa því báðir að í
BYKO-versluninni í Hafnarfirði hafi
verið mjög sérstakur andi og iðn-
aðarmenn hafi, þegar þeir komu til
að versla, gjarnan sest niður og
fengið sér kaffi og spjallað við koll-
ega sína. Mikil áhersla hafi verið
lögð á að flytja þennan góða anda í
nýju verslunina og séð hafi verið fyr-
ir aðstöðu fyrir þá þar sem þeir geti
áfram sest niður með sinn kaffibolla
og hitt mann og annan. „Við fag-
mannainnganginn verða kunnugleg
andlit, sem taka á móti þeim og þar
er stutt í helstu deildir sem þeir
þurfa að fara í. Þó að búðin sé svona
stór er búið að brjóta hana upp í
minni einingar,“ segir Atli.
Spennandi tímar eru framundan í
byggingargeiranum og segir Atli
sóknarfæri vera fyrir hendi, m.a. sé
reiknað með að 1.000 íbúðir verði
byggðar á ári hverju á suðursvæðinu
á næstu tíu árum, „sem er einmitt
svæðið sem við erum að þjóna“, seg-
ir hann og bendir á að Urriðaholtið
sé aðeins steinsnar frá Kauptúni, en
þar er einmitt framundan mikil upp-
bygging.
Hægt að labba
út með „húsið
á bakinu“
BYKO opnar í dag 13 þúsund
fermetra verslun í Garðabæ
Morgunblaðið/Golli
Nokkurs konar Manhattan Breiðstræti og götur á milli. Skilti eru víða um
verslunina til að auðvelda viðskiptavininum að finna það sem þarf.
Morgunblaðið/Golli
Í framlínunni Víðir Atli Ólafsson verslunarstjóri, Guðrún Ragnarsdóttir, framkvæmdastjóri þróunarsviðs, og Atli
Ólafsson rekstrarstjóri. Í nýju versluninni verður boðið upp á alhliða heildarlausnir fyrir húsbyggjendur.
Í HNOTSKURN
»Hin nýja verslun Byko íKauptúni er 13.000 fer-
metrar að stærð.
»Áformað er að byggjaverslunarmiðstöð í Kaup-
túni, á svæðinu milli Max raf-
tækja og Bónuss.
»20.600 fermetra Ikea-verslun er í Kauptúni.
»LeikfangaversluninJust4Kids verður opnuð á
morgun í Kauptúni. Stærð
hennar er 6.000 fermetrar.
ÁKI Jónsson for-
stöðumaður veiði-
stjórnarsviðs
Umhverfisstofn-
unar, fjallar um
veiðistjórnun
hreindýra á mál-
stofu í auðlinda-
fræðum í Háskól-
anum á Akureyri
í dag kl. 11.00.
Málstofan verður í anddyri rann-
sóknarhússins Borga. Á undanförn-
um árum hefur hreindýrastofninn
vaxið og dafnað og jafnframt hefur
áhugi veiðimanna fyrir hreindýra-
veiðum margfaldast. Í fyrirlestrin-
um fjallar Áki um lög og reglur varð-
andi veiðarnar, stjórnun þeirra og
þróun málaflokksins undanfarin ár.
Veiðistjórnun
hreindýra
HÖFUÐBORGARSVÆÐIÐ