Morgunblaðið - 26.01.2008, Blaðsíða 23

MORGUNBLAÐIÐ LAUGARDAGUR 26. JANÚAR 2008 23
SUÐURNES
Eftir Svanhildi Eiríksdóttur
Reykjanesbær | „Mér fannst leiðinlegt að geta
ekki þakkað fyrir gistinguna og matinn á ís-
lensku svo ég hét því að ég skyldi læra þetta
tungumál,“ sagði Englendingurinn Sarah Bo-
wen í samtali við Morgunblaðið, en hún er nú
stödd hér á landi sem skiptinemi við Háskóla
Íslands og nemur íslensku. Hún býr í nem-
endaíbúð á Vallarheiði.
Íslenskuáhugi Söruh Bowen er um margt
sérstakur. Hann kviknaði þegar hún var að-
eins 12 ára gömul og þremur árum síðar hafði
hún samband við Háskóla Íslands í því skyni
að nema íslensku. Henni var hins vegar tjáð að
hún þyrfti að klára framhaldsskóla og grunn-
nám í háskóla áður en hún gæti sótt um inn-
göngu. Það dró ekki úr henni og nú 35 árum
síðar er draumurinn að stórum hluta orðinn að
veruleika.
Hvernig er hægt að búa þarna?
„Þegar ég var 12 ára las ég bók sem heitir
Avalon og er eftir bresku skáldkonuna Anya
Seton. Sagan gerist að hluta til á Englandi og
að hluta til á Íslandi. Ég varð forvitinn um
þetta land sem ég vissi ekkert um. Ég náði í
landakort og sá að það var lengst í norðri. Ég
hugsaði með mér, hvernig getur einhver búið
þarna? Pabbi sagði mér að hringja í sendiráð
Íslands í London og þar fékk ég ýmsar upplýs-
ingar.“
Sarah óskaði í framhaldi eftir pennavinum í
gegnum Morgunblaðið og fékk svör frá 22
börnum á Íslandi. Hún sagði hafa valið tvö úr
hópnum, dreng sem átti foreldra sem áttu slát-
urhús og Sarah fannst spennandi og stúlku,
Sigrúnu Magnúsdóttur, Sissí sem hún er enn í
sambandi við. Pennavináttan við drenginn
varði hins vegar stutt. Sissí heimsótti Söruh til
Englands og heimsóknina endurgalt Sarah
þegar hún var 15 ára. „Ég man að flugferðin
var mjög dýr og mamma var lengi að vinna
fyrir henni.“ Dvölin líkaði henni vel sem og
gestrisni Sissíar og foreldra hennar. Þegar
kom að kveðjustund og þökkum fyrir við-
urgjörninginn fannst Söruh leiðinlegt að geta
ekki þakkað fyrir sig á tungumáli heimamanna
en varð staðráðin í að það skyldi hún læra, í
þakklætisskyni fyrir allt.
Kurteisin kom á óvart
Eftir að hafa fengið þær upplýsingar frá Há-
skóla Íslands að hún þyrfti að ná sér í Bache-
lor-gráðu gekk Sarah menntaveginn i New-
castle og útskrifaðist með BA-gráðu í
málvísindum. Tungumálin sem Sarah nam
voru norska og rússneska, auk ensku. Hún
sagði í samtali við blaðamann að ekki hefði
verið byrjað að kenna nútímaíslensku á Eng-
landi fyrr en á 10. áratug síðustu aldar.
„Eftir háskólanámið kynntist ég manninum
mínum. Ég vissi strax að þetta yrði maðurinn
sem ég myndi giftast. Við eignuðumst síðan 3
dætur og allar áætlanir mínar með íslenskuna
fóru út um gluggann. Samhliða uppeldinu
lærði ég táknmálsfræði og útskrifaðist árið
2000. Nokkrum árum síðar þegar yngsta dótt-
ir mín var orðin 11 ára og mátti ganga ein í
skólann fór ég að hugsa, hvað var það sem ég
ætlaði að gera? Jú, læra íslensku.“
Sarah innritaði sig í University College í
London í íslenskufræði. Auk íslenskunnar hef-
ur hún lært forníslensku, norsku og færeysku.
Námið hefur hún stundað með vinnu og er nú
nemi á þriðja ári. Dvöl hennar hér er í gegnum
Erasmus-samstarf og hún býr í nemendaíbúð
á Vallarheiði í Reykjanesbæ. „Þetta er skyldu-
ár og ég verð að standa mig. Mér finnst það
frábært og sjaldgæft tækifæri fyrir konu á
mínum aldri að geta gert svona.“
Söruh líkar dvölin á Íslandi vel og segir fólk
vingjarnlegt og hjálpfúst, meira að segja full-
trúa ríkisins. „Það sem kom mér á óvart er að
fólk er ekki mjög brosmilt og kannski alvar-
legra í framan en við erum en maður á ekki að
láta það trufla sig. Lífið á höfuðborgarsvæðinu
er á enn hraðari braut en í London og mér sýn-
ist fólk kannski ekki hafa nægan tíma fyrir sig
sjálft – nákvæmlega eins og heima hjá mér!“
Eftir að hafa hrósað landinu fyrir fegurð hrós-
aði hún líka íslenskum unglingum, sem hún
segir mun kurteisari en þá bresku. Hún hafði
hins vegar heyrt að Íslendingar væru ekki
mjög kurteisir. „Mér finnst það líka kostur að
landið er lítið og mér sýnist allir vera mik-
ilvægir hér. Lífið er ekki ópersónulegt á Ís-
landi – þú ert einhver hér.“
Íslenskunám í laun fyrir sjálfboðavinnu
Eftir að blaðamaður hefur hælt Söruh fyrir
góða íslensku segir hún tungumálið búa yfir
góðum kosti sem auðveldi námið. Hún við-
urkenndi þó að orðaforði íslenskunnar væri
mjög erfiður. „Kosturinn við íslenskuna er að
orðin eru svo gagnsæ. Þegar maður hefur náð
sér í grunnþekkingu, og það tekur langan
tíma, þá er þetta ekki svo erfitt,“ sagði Sarah
og nefndi sem dæmi orð eins og tannlæknir og
víðáttufælni. Hún segir orðin „dentist“ og
„agoraphobia“ ekki búa yfir þessu gagnsæi.
Hún sagðist líka nota hvert tækifæri til þess
að æfa sig í íslenskunni. „Ég les íslenskan
texta, hlusta á útvarp og tek þátt í félagslífinu í
Reykjanesbæ. Ég fer á bókaspjall á Bókasafni
Reykjanesbæjar einu sinni í mánuði, prjóna-
klúbb hjá Katrínu Sigurðardóttur á Prjóna-
stofu Katrínar á miðvikudögum sem er mjög
skemmtilegt og orðið að hápunkti vikunnar, ég
hjálpa til í Hjálpræðishernum sem er nýbúið
að stofna og er heimsóknarvinur hjá Rauða
krossinum.“
Eins og sönnum Breta sæmir langar hana
nú að komast í sjálfboðavinnu í maímánuði, þar
sem hún hefur náð ects-markmiðum námsins
og þarf því ekki í próf í vor. „Það myndi hjálpa
mér svo mikið í að tala íslensku ef ég gæti unn-
ið innan um Íslendinga í einn mánuð. Auðvitað
gæti ég alveg farið heim til Englands en mig
langar að vera hér og læra meira,“ sagði Sarah
að lokum vongóð um að vinnuframlag hennar
yrði þegið og launin betri íslenska.
Þú ert einhver hér á Íslandi
Í HNOTSKURN
»Sarah Bowen vildi geta þakkað fyrirmatinn og gistinguna á máli heima-
manna og hét því að læra íslensku.
» Íslenskuáhuginn kviknaði við lesturbókarinnar Avalon eftir Anya Seton en
þá var Sarah 12 ára. Síðan eru liðin tæp
fjörutíu ár.
»Sarah vill komast í sjálfboðavinnu í maítil að æfa sig í að tala íslensku.
Íslenskunámið hafði
fjörutíu ára aðdrag-
anda hjá Söruh Bowen
Morgunblaðið/Svanhildur Eiríksdóttir
Íslenskunemi Sarah Bowen lét drauminn
um íslenskunám rætast. Það hafði verið á
stefnuskrá hennar frá fimmtán ára aldri.
Hornafjörður | Í Hafnarskóla á
Höfn í Hornafirði eru meiri hreysti-
menni en víðast annars staðar. Í
gærmorgun buðu þeir þorra vel-
kominn í garð með hefðbundnum
hætti.
Strákarnir hlupu í kringum skól-
ann berleggjaðir og sumir berfætt-
ir og berir að ofan. Sumir fóru úr
annarri buxnaskálminni og drógu
hana á eftir sér að fornum sið en
flestir voru þó á nærbrókum. Þessi
siður hefur verið við lýði í Hafn-
arskóla á bóndadaginn.
Morgunblaðið/Sigurður Mar
Fagna þorra berleggjaðir
Sandgerði | Bæjarráð Sandgerðis
hefur samþykkt bókun þar sem eig-
endur fasteigna í bæjarfélaginu eru
beðnir um að hafa varann á þegar
þeir leigja eða selja fasteignir og
gæta þess að óæskilegir hópar flytji
ekki starfsemi sína þangað með
þeim hætti. Tilefnið er fréttir um að
mótorhjólaklúbburinn Fáfnir MC sé
á leiðinni til Sandgerðisbæjar.
Í bókun bæjarráðs er vitnað til
varnaðarorða löggæslumanna á
Suðurnesjum vegna umrædds fé-
lags og bæjarbúar beðnir um að
hafa þau í huga. „Bæjarráð telur
eðlilegt að vara við hvers konar
starfsemi sem getur haft neikvæð
áhrif á þá byggðaþróun og upp-
byggingu sem er í samfélaginu en
Sandgerðisbær leggur áherslu á
góða samfélagslega þjónustu við
bæjarbúa sem og heilbrigt umhverfi
fyrir börn og unglinga,“ segir í bók-
uninni.
Biðja húseigendur
að selja ekki Fáfni
LANDIÐ
Styrkir úr Forvarnasjóði 2008
Lýðheilsustöð auglýsir eftir umsóknum um styrki úr Forvarnasjóði.
Tilgangur sjóðsins er að stuðla að forvörnum á sviði áfengis- og
vímuvarna og eru styrkir veittir til verkefna eða afmarkaðra rannsókna.
Sérstök áhersla er lögð á að verkefnin séu samstarfsverkefni og að þau
tengist börnum og ungmennum á mismunandi skólastigum eða ungu fólki
utan skóla. Að þessu sinni er auglýst sérstaklega eftir verkefnum sem taka
til forvarna í framhaldsskólum. Mikilvægt er að í umsókninni sé gert grein
fyrir mati á verkefninu.
Lýðheilsustöð metur umsóknirnar í samstarfi við áfengis- og vímuvarnaráð.
Áskilinn er réttur til að senda umsóknir til umfjöllunar fagaðila, óska eftir
nánari upplýsingum um verkefni, framkvæmdaaðila og fjármögnun. Einnig
áskilja styrkveitendur sér rétt til að skilyrða styrkveitingar og ákveða að
styrkir verði greiddir út í samræmi við framvindu verkefnis. Sé sótt um styrk
til framhaldsverkefna þarf framvinduskýrsla að liggja fyrir.
Umsóknarfrestur er til 18. febrúar 2008 og skal sótt um á eyðublöðum
sem eru á heimasíðu Lýðheilsustöðvar, www.lydheilsustod.is. Styrkir,
sem veittir eru á árinu, skulu sóttir fyrir 31. desember 2008.
Nánari upplýsingar fást í síma 5 800 900, johann@lydheilsustod.is eða á heimasíðunni
www.lydheilsustod.is en þar er sótt rafrænt um styrkinn. Umsóknum skal skila rafrænt á netfangið
johann@lydheilsustod.is