Muninn - 01.05.1997, Síða 27

Hverja telur þú framtíð eyjarinnar vera?
Ef þetta heldur svona áfram þá er hún ekki góð.
Kvótinn er alltaf að minnka hjá körlunum en ef eitthvað verður
gert til að laga það mál eins og þessir karlar á þingi eru alltaf að
lofa, þá ætti þetta alveg að bjargast. Þeir koma alltaf hérna annað
slagið rétt fyrir kosningar og halda fundi og koma með einhver
ægilega flott loforð en fara síðan bara aftur heim. Ég hef ekki of
mikla trú á að þetta eigi eftir að bjargast. En afi og gömlu karlarnir
sem kunna ekkert annað en að sækja sjóinn, myndu aldrei fara
héðan. Fólk sem á hús hér, yfirgefur ekki eyjuna svo auðveldlega.
Ef fólki heldur áfram að fækka verður t.d. mjög erfitt að reka
kaupfélagið. Ég vil alls ekki að þetta fari í eyði þó ég geri ekki ráð
fyrir að búa hérna sjálf í framtíðinni. Ef ég læri eitthvað er ekkert
að gera hérna fyrir mig en ég vil þó geta komið og hitt fólkið.
Hvernig eru Grímseyingar?
Þeir eru flestir mjög duglegir. Sjómennirnir reyna allt
til þess að komast á sjóinn og eru rosalega vinnuglaðir. Þeir eru
mjög stoltir af því að vera Grímseyingar og þola ekki þegar
einhver er að gagnrýna þá. Þetta er líka mjög gott fólk og allir
standa rosalega vel saman ef eitthvað gerist hérna t.d. þegar það
verða einhver slys. Þá verða allir eins og ein fjölskylda.
Viðtal við Önnu Dóru Grímseying