Ægir - 01.08.1998, Blaðsíða 5

Pétur Bjarnason, formaður Fiskifélags Islands:
SAMLEIÐ MEÐ ÍSLENSKUM SJÁVARÚTVEGI
Tímamót hjá
Fiskifélagi íslands
iskifélag íslands á sér mikla
og glæsta sögu. Það var
stofnað árið 1911 af helstu
framámönnum í íslensku
þjóðlífi, á tímum þegar
þörfin fyrir framfarasinnuð sjónarmið
var æpandi. Fiskifélagið var allt í senn:
framfarafélag, hagsmunagæslufélag,
stjórnsýslustofnun og hagsýslu-
stofnun. Umhverfi félagsins hefur
auðvitað breyst í tímans rás og
starfsemi félagsins hefur tekið mið af
þeim breytingum. Vitanlega sýnist sitt
hverjum um þær breytingar sem ráðist
hefur verið í á hverjum tíma, en upp
úr stendur að starfsemi félagsins þarf
að miðast við hvernig umhverfið er en
ekki hvernig mönnum finnst að það
ætti að vera.
Á auka Fiskiþingi sem haldið var í
mars s.l. voru gerðar viðamiklar
skipulagsbreytingar á aðild að
Fiskifélagi íslands. Þá var ákveðið að
einungis helstu hagsmunasamtök í
íslenskum sjávarútvegi skyldu kjósa
fulltrúa á Fiskiþing og hvaða hlutfall
skyldi vera á milli aðila. Fiskiþing í
þessari breyttu mynd endurspeglar
þannig íslenskan sjávarútveg betur en
nokkru sinni áður. Þá var einnig
ákveðið að umfjöllunarefni Fiskiþings
skyldu vera þau sem varða
sjávarútveginn í heild en ekki þau mál
sem aðilar innan hans eru að sækja
gegn hverjum öðrum. Að lokum var
ákveðið að verkefni Fiskifélagsins
skyldu vera mál sem varða
heildarhagsmuni sjávarútvegsins og
samstaða er um að sinna.
Síðan Fiskiþing var haldið hefur
umhverfið enn tekið breytingum. Ljóst
varð að ekki var lengur áhugi hjá
sjávarútvegsráðuneytinu á að
Fiskifélagið héldi áfram að vinna þau
verkefni varðandi gagnaöflun og
úrvinnslu, sem félagið hefur sinnt
mörg undanfarin ár. Verktöku fyrir
sjávaútvegsráðuneyti á þessu sviði
lýkur um næstu áramót. Þar sem sú
vinna hefur verið viðamesta verkefni
félagsins er ljóst að þessar breytingar
hafa víðtæk áhrif á starfsemi þess.
Á þessum tímamótum er vert að
hafa eftirfarandi í huga: Það er víðtæk
samstaða um að sjávaútvegurinn
þarfnist sameiginlegs vettvangs eins og
Fiskifélagið er. Það er líka fullur
skilningur á að mörg brýn verkefni
sjávarútvegsins eru þess eðlis að
samstöðu allrar greinarinnar þarf til að
þeim verði sinnt. Og að síðustu er ljóst
að Fiskifélagið býr yfir getu - bæði
fjárhagslegri og hvað mannafia snertir
- til þess að sinna nokkrum þeirra
verkefna, sem þörf er á að sinna.
Stjórn Fiskifélags íslands er þessa
dagana að taka ákvarðanir um næstu
skref félagsins í átt til breyttra tíma.
Það er ákveðið að Fiskistofa og
Hagstofa munu taka við flestum þeim
verkefnum á sviði gagnaöflunar og -
úrvinnslu, sem Fiskifélagið hefur
annast. Stjórnin hefur ákveðið að
leigja Fiskistofu húsnæði félagins í
Höfn við Ingólfsstræti og það er
nokkuð ljóst að þeim starfsmönnum
félagsins, sem ekki halda áfram í vinnu
hjá félaginu, verður boðið að starfa
áfram við sambærileg störf hjá nýjum
vinnuveitanda. Fiskifélagið mun byrja
á nýjum stað um áramót og
hugmyndir stjórnar félagsins miða við
að í upphafi verði starfsmenn fimm.
Helstu verkefni félagsins verða á sviði
umhverfismála, en virkari þáttaka
sjávarútvegsins í þeirri umræðu er
knýjandi. Auk þessa mun félagið sinna
útgáfumálum og öðrum verkefnum,
sem ekki er ástæða til að tilgreina
nánar hér.
Það er ekki óeðlilegt að upp komi
efasemdarraddir um réttmæti þeirra
leiða sem stjórn Fiskifélagsins og
aðstandendur þess eru að feta. Sem
betur fer eru þeir margir sem bera í
brjósti hlýjar tilfinningar til Fiskifélags
íslands og stendur ekki á sama um hag
þess. Hins vegar er rétt að benda á að
þær breyttu áherslur, sem standa fyrir
dyrum á starfsemi Fiskifélagsins, miða
frekar að því að færa markmið þess í
átt að viðhorfi frumherjanna fremur
en frá þeim. íslenskur sjávarútvegur
þarf á sameiginlegum
samstarfsvettvangi að halda til þess að
leggja grunn að framfarasinnuðum
hugmyndum, sem komið verði í verk.
Á þann hátt mun Fiskifélag íslands
áfram gagnast íslenskum sjávarútvegi
til langrar framtíðar.
mm 5