Fréttablaðið - 28.05.2010, Blaðsíða 72

40 28. maí 2010 FÖSTUDAGUR
sport@frettabladid.is
14 DAGAR Í HM
GOLF Golfvertíðin fer formlega af
stað um helgina en í gær voru und-
irritaðir styrktarsamningar þeirra
fyrirtækja sem koma að starfi
Golfssambands Íslands í sumar.
Keppnismótaröðin sem hefst um
helgina mun bera nafn Eimskips
en fjöldi annarra fyrirtækja
kemur að starfi GSÍ í sumar.
„Það var ekki erfitt að safna
styrkjum,“ sagði Hörður Þor-
steinsson, framkvæmdastjóri GSÍ,
í samtali við Fréttablaðið. „Það er
jákvæður tónn í þeim fyrirtækj-
um sem við reyndum að fá til liðs
við okkur. Kröfurnar eru aðrar nú
en þær hafa verið og menn hóf-
stilltari. Samstarfssamningarnir
eru því öðruvísi en áður. En þrátt
fyrir allt hefur golfíþróttin verið
að vaxa og dafna og margir vilja
taka þátt í uppvextinum,“ sagði
hann.
Samkvæmt tölum frá 2008 eru
næstflestir iðkendur skráðir hjá
GSÍ af öllum sérsamböndum ÍSÍ.
Knattspyrnan hefur flesta iðkend-
ur, tæplega tuttugu þúsund en
golfið kemur næst með tæplega
fimmtán þúsund iðkendur.
Hörður segir að þessi mikli
golfáhugi hafi ekki minnkað þrátt
fyrir fjármálakreppuna. „Síður en
svo. Sumir golfklúbbar hafa til að
mynda reynt að koma til móts við
sína félaga sem hafa orðið fyrir
tekjumissi með ýmsum leiðum.
Svo höfum við séð að það hefur
verið gríðarleg aukning í notkun
vallanna og oft eru rástímar full-
bókaðir frá klukkan sjö á morgn-
ana. Það er nú strax byrjað í upp-
hafi sumars,“ sagði Hörður.
Keppni á Eimskipsmótaröðinni
hefst svo um helgina en fyrsta mót
ársins fer fram í Vestmannaeyj-
um. - esá
Styrktarsamningar undirritaðir hjá Golfsambandi Íslands í gær:
Kreppan ekki dregið úr áhuga
SAMNINGAR UNDIRRITAÐIR Fjölmörg fyrirtæki styrkja starf Golfsambandsins. Hörður
Þorsteinsson framkvæmdastjóri er fyrir miðju. FRÉTTABLAÐIÐ/GVA
FÓTBOLTI Haukur Baldvinsson, leik-
maður Breiðabliks, er leikmaður
4. umferðar Pepsi-deildar karla að
mati Fréttablaðsins. Hann var val-
inn maður leiksins þegar Breiða-
blik vann sannfærandi 2-0 sigur
á Íslandsmeisturum FH á mánu-
dagskvöldið.
„Það sem var skemmtilegast
við þetta var að þetta var okkar
annar sigur í röð og við náðum
að afsanna að við kunnum ekki að
halda forskoti,“ sagði hann í létt-
um dúr. Breiðablik missti niður 2-
0 forystu gegn Fram í 2. umferð en
komst einnig í 2-0 gegn FH í þriðju
umferð mótsins í fyrra. FH vann
hins vegar leikinn á dramatískan
máta, 3-2.
„Sá leikur var ekkert sérstak-
lega rifjaður upp fyrir leikinn
gegn FH nú,“ sagði Haukur. „Við
vorum smá taugaóstyrkir í leikn-
um gegn Fram en við vissum sjálf-
ir að við getum vel haldið forystu í
leikjum enda höfum við klárað síð-
ustu tvo leiki mjög sannfærandi.“
Hann segir það þó vissulega
hafa verið ljúft að hafa náð að
hefna ófaranna frá því í fyrra.
„Það er alltaf ljúft að vinna FH,“
sagði hann og hló.
Sóknarlína Breiðabliks er
óárennileg með þá Hauk, Kristin
Steindórsson og Alfreð Finnboga-
son framarlega á miðjunni og Guð-
mund Pétursson á toppnum.
„Okkur líður mjög vel saman.
Ég, Kiddi og Alfreð spiluðum
allir saman í yngri flokkunum
og Gummi bættist svo við síðasta
sumar og spilaði frábærlega. Það
er því ekki hægt að kvarta mikið
undan þessu. Við erum allir frek-
ar ólíkir leikmenn en við náum vel
saman inni á vellinum og þetta
hefur gengið mjög smurt fyrir
sig,“ sagði Haukur.
Honum líst því vel á sumarið
og Blikarnir hafa greinilega sett
sér háleit markmið fyrir tímabil-
ið. „Ég er mjög ánægður með það
sem komið er. Við ætlum að vinna
næstu leiki og halda einfaldlega
áfram.“
Breiðablik mætir næst ÍBV á
útivelli en Eyjamenn hafa einn-
ig unnið tvo leiki í röð. Bæði lið
eru með sjö stig en þetta verður
þó fyrsti leikur sumarsins í Vest-
mannaeyjum. Hann fer fram á
sunnudaginn.
„Þeir hafa verið mjög heitir og
ég á von á hörkuleik. Það er alltaf
gaman að koma til Eyja og mikil
og góð stemning þar. Síðast unnum
við þar í miklum rokleik og von-
andi verður veðrið betra núna,“
sagði hann.
Þess má svo geta að Haukur
útskrifaðist úr Verslunarskólan-
um en fór ekki með í útskriftarferð
samnemenda sinna. „Þau fóru til
Costa del Sol á þriðjudaginn og ég
er búinn að fá nokkrar hringingar
þaðan síðan þá. En maður verður
að fórna ýmsu fyrir boltann og ég
sé ekki eftir þessu vali.“
eirikur@frettabladid.is
Ólíkir en náum vel saman
Haukur Baldvinsson er leikmaður 4. umferðar Pepsi-deildar karla að mati
Fréttablaðsins. Blikar unnu í umferðinni góðan 2-0 sigur á Íslandsmeisturum
FH þar sem að stórhættuleg sóknarlína Breiðabliks var í aðalhlutverki.
HAUKUR BALDVINSSON Átti stórleik gegn FH eins og fleiri í liði Breiðabliks.
FRÉTTABLAÐIÐ/STEFÁN
Ítalinn Paolo Rossi varð markakóngur HM 1982 á Spáni
þrátt fyrir að vera ekki enn búinn að skora þegar Ítalir
voru búnir að spila 365 mínútur í keppninni. Rossi skor-
aði aftur á móti sex mörk í síðustu þremur
leikjum liðsins, þrennu á móti Brasilíu í leik
sem tryggði liðinu sæti í undanúrslitunum
(3-2 sigur), bæði mörk liðsins í undan-
úrslitunum (2-0 sigur á Póllandi) og
síðan fyrsta markið í 3-1 sigri á Vestur-
Þjóðverjum í úrslitaleiknum.
*Frí heimsending gildir aðeins ef pantaðir eru 4 eða fleiri bakkar.
Pantaðu í síma
565 6000
eða á somi.is
*
Lið 4. umferðarinnar
Liðið spilar leikkerfið 3-5-2
Albert Sævarsson ÍBV
James Hurst ÍBV
Daníel Laxdal Stjarnan
Haraldur Freyr Guðmundsson Keflavík
Haukur Baldvinsson Breiðablik
Bjarni Guðjónsson KR
Andri ÓIafsson ÍBV
Kristinn Steindórsson Breiðabliki
Alfreð Finnbogason Breiðabliki
Hjálmar Þórarinsson Fram
Danni König Val
ANDRI ÓLAFSSON Skoraði tvö mörk í
3-0 sigri ÍBV á Val. FRÉTTABLAÐIÐ/STEFÁN
Gylfi Þór Sigurðsson hjá Reading og Birkir Bjarnason hjá Viking í
Noregi eru einu nýliðarnir í íslenska landsliðinu sem mætir Andorra á
Laugardalsvelli á laugardaginn. Þeir Gylfi og Birkir þekkjast vel úr yngri
landsliðum og eiga það sameiginlegt að hafa verið sjóðheitir með
liðum sínum það sem af árinu 2010.
Gylfi Þór Sigurðsson er kominn í landsliðshóp-
inn og eru margir búnir að bíða lengi eftir því „Ég
er einn af þeim,” segir Gylfi. „Það er fínt að vera
kominn í hópinn núna og það verður gott tækifæri
á móti Andorra til að sýna hvað maður getur,“
segir Gylfi. „Ég hef ekkert spjallað við Ólaf
um hvar hann vill að ég spili. Svo lengi sem
ég spila ekki í vörninni þá er ég sáttur.
Það skiptir ekki máli fyrir mig hvort ég er
á kantinum, á miðjunni eða frammi. Ég
er bara ánægður svo lengi sem ég fæ að
spila,” sagði Gylfi. Birkir Bjarnason hefur
aðeins meiri reynslu af landsliðinu. „Ég var í einum hóp í Skotlandi í
fyrra en ég vona að ég fái eitthvað að spreyta mig núna,“ segir Birkir
sem hefur spilað vel með Viking. Hann er þekktur fyrir að skora stór-
glæsileg mörk. „Ég skora ekki bara frábær mörk því ég
pota honum inn einstaka sinnum líka,“ segir Birkir. „Ég
vona að ég fái tækifæri til að sýna mig aðeins og spila
þá stöðu sem mér finnst best. Ég er að spila í þriggja
manna miðju hjá Viking og það er sú staða sem mér
finnst best,” segir Birkir. „Það verður spennandi að
sjá hvernig þetta verður enda bíða margir ungir
leikmenn eftir tækifærinu.“
Faðir Birkis er Bjarni Sveinbjörnsson sem
gerði garðinn frægan með Þór og ÍBV á
sínum tíma. „Ég held hann hafi spilað einn
landsleik og svo meiddist hann í næsta
leik. Ég vona að ég nái að spila lengur en
pabbi.“
GYLFI ÞÓR SIGURÐSSON OG BIRKIR BJARNASON: NÝLIÐARNIR Í LANDSLIÐSHÓPNUM Á MÓTI ANDORRA
Svo lengi sem ég spila ekki í vörninni þá er ég sáttur