Saga - 2004, Qupperneq 75

þínu hér á jördu, svo eg lox fái ad deya sem þinn sannur læri-
svein! amen! amen!63
Á þessum tímamótum þakkaði Hálfdán föðurlega varðveislu og
miskunn Guðs við sig fram til líðandi stundar og einsetti sér að
vonast eftir henni og gleðja sig við hana í framtíðinni. Lífsafstaða
Hálfdánar á þessu skeiði var því jákvæð og byggðist á trúartrausti
hans. Honum varð þó einnig hugsað til þess hve nauðsynlegt hon-
um var að fá fyrirgefningu synda sinna. Sú mikilvæga staða sem
iðrun, syndajátning og bæn um fyrirgefningu fengu í afmælisfærsl-
unum á þessum tíma virðist til komin fyrir áhrif frá þeim eindregna
afturhvarfsboðskap sem fram kom í margnefndri afmælishugleið-
ingu Zschokkes.
Í þessum dagbókarfærslum kemst lesandinn einna næst því að
kynnast grunnþáttunum í trú og guðfræði Hálfdánar. Trú hans fólst
í gleðiríku trausti til föðurlegrar verndar Guðs og endurlausnar-
verks Jesú Krists sem einstaklingurinn öðlaðist hlutdeild í fyrir iðr-
un og trú og andi Guðs kom til leiðar. Hér er því um að ræða til-
finningalega, persónuhverfa trúartileinkun og andlegt samfélag við
Guð en ekki formlega aðild að trúarmenningu samfélagsins eða
samsinningu við utanbókarlærðar trúarkenningar þess. Í dagbók-
arfærslum Hálfdánar má því sjá þau hvörf „frá trúarmenningu til
trúarsannfæringar“ sem einkenndu upplýsingartímann.64 Auk þess
að lesa úr hugvekjum Heinrichs Zschokkes, sem var nú orðið að
föstum lið í trúaratferli Hálfdánar, kvaðst hann hafa sungið sálm-
inn á fæðingardegi manns úr sálmabókinni frá 1801. Minnir það á
venju hans á sumardaginn fyrsta.65 Í þessum sálmi var Guð lofað-
ur fyrir að hafa skapað afmælisbarnið og viðhaldið lífi þess til líð-
andi stundar þrátt fyrir synd þess og lítilmótleika. Honum lauk
með bæn um að Guð verndaði og blessaði það áfram ætti það að
öðlast áframhaldandi líf. Í sálminum ber mest á sköpunartrú upp-
lýsingarstefnunnar og trausti hennar á forsjón Guðs.66 Frá sálma-
söng í tilefni af afmæli segir ekki í annan tíma og kann að vera um
einstakan atburð að ræða vegna þess hversu sérstaklega stóð á við
þetta afmæli.
A F M Æ L I S H A L D O G S J Á L F S V I T U N D 75
63 Sama heimild, 28.2.1856.
64 Loftur Guttormsson, Frá siðaskiptum til upplýsingar, bls. 358–359.
65 Lbs. Lbs. 2729 8vo. Minnisbók, 21.4.1825, 19.4.1838 og 21.4.1842.
66 Evangelisk-kristileg Messu-saungs og Sálma-bók, bls. 257–258 (sálmur nr.
325).
Saga 2004 - NOTA 1.12.2004 9:40 Page 75