Bændablaðið - 29.03.2012, Blaðsíða 16

16 Bændablaðið | fimmtudagur 29. mars 2012
„Við erum afskaplega ánægð
með að hafa tekið þetta skref
og sjáum langt í frá eftir því,“
segja þau Bryndís Óskarsdóttir
og Ólafur Aðalgeirsson, sem reka
ferðaþjónustu í Skjaldarvík. Þar
búa þau ásamt þremur dætrum
sínum, Klöru 17 ára, Katrínu 12
ára og Sunnevu 10 ára, sem þrátt
fyrir ungan aldur eru liðtækar í
rekstrinum. Starfsemi á vegum
Bryndísar og Ólafs hófst vorið
2010 og er þriðja sumarið í rekstri
nú handan við hornið. Áður var
rekið dvalarheimili fyrir aldraða
í Skjaldarvík, en þau Bryndís og
Ólafur starfrækja þar nú gisti-
heimili, matsölu og hestaleigu.
Herbergin eru 27 talsins og hægt
að taka á móti 50 til 60 manns í
einu.
Þau Dísa og Óli eins og þau eru
gjarnan kölluð bjuggu á Akureyri og
voru þar bæði í vinnu sem þeim lík-
aði, hún starfaði sem grafískur hönn-
uður hjá Ásprent Stíl og hann sem
rekstrarstjóri hjá Ferðamálastofu, en
hafði áður gegnt starfi framkvæmda-
stjóra Leikfélags Akureyrar.
„Við vorum bæði önnum kafin
við okkar störf og líkaði vel enda
vorum við að vinna við það sem við
höfðum menntað okkur til,“ segir
Dísa, en þau nefna að lengi vel hafi
blundað í þeim sá draumur að hefja
eigin rekstur á sviði ferðaþjónustu.
Löngunin ágerðist fremur en hitt eftir
því sem árin liðu og þau voru sí og æ
að skima eftir tækifæri á þessum vett-
vangi. Margoft var ekið um sveitir í
nágrenni Akureyrar, málin rædd og
horft eftir hugsanlegum tækifærum.
Vinir og ættingjar réttu
hjálparhönd
Eftir að Akureyrarbær lagði
niður starfsemi dvalarheimilis í
Skjaldarvík stóð húsið autt um tíma,
en Óli rakst á það fyrir tilviljun, bauð
Dísu í óvissubíltúr eitt hádegið og
þegar ekið var niður afleggjarann
og húsið blasti við vissu þau bæði
að þarna væri komið tækifærið sem
þau höfðu svo lengi leitað að. Þetta
var í desember árið 2009, en húsið
fengu þau afhent í byrjun febrúar
árið eftir. Strax var hafist handa
við lagfæringar og breytingar en
verkin voru mörg sem inna þurfti
af hendi áður en hægt var að opna
gistiheimilið. Bæði voru þau föst í
sinni vinnu en nýttu kvöldin, nætur
og helgar til að gera allt sem best úr
garði. Ættingjar og vinir réttu þeim
hjálparhönd og eins fengu þau mikið
af alls kyns dóti fyrir lítið eða gefins
frá vinum og kunningjum, en það er
yfirlýst stefna þeirra í uppbygging-
unni að Skjaldarvík að endurvinna
og endurnýta allt það sem að gagni
getur komið.
Fyrstu gestirnir komu áður en
opnað var!
Fyrstu gestirnir komu um páska
árið 2010, en formleg opnun var um
miðjan maí.
„Við vildum aðeins kanna hvernig
viðtökur yrðu og sjá hvað við þyrft-
um að laga fyrir sumarið, þannig að
við buðum upp á gistingu þó ekki
væri allt orðið klárt,“ segir Óli, en
skemmst er frá að segja að öll her-
bergin sem komin voru í gagnið voru
leigð út og gestir hinir ánægðustu.
Um vorið hófst gos í Eyjafjallajökli
svo sem menn rekur minni til og setti
ugg að ferðaþjónustufólki, enda varð
í kjölfarið nokkuð um afbókanir
erlendra ferðamanna. Skjaldarvík
fylltist hins vegar af gestum um
leið og fór að gjósa. Flugi var beint
norður til Akureyrar og starfsfólk á
vegum Icelandair fékk þar inni.
Geta tekið á móti allt að
60 manns
Fyrsta sumarið voru 19 herbergi
í boði í Skjaldarvík, sem er innan
vébanda Ferðaþjónustu bænda og
fá þau töluvert af bókunum þar í
gegn en eru að auki í tengslum við
aðrar ferðaskrifstofur og þá er hægt
að bóka beint á netinu. Yfir sumarið
eru útlendingar fjölmennastir meðal
gesta hótelsins, en Íslendingar yfir
veturinn. Hægt er að taka á móti allt
að 60 gestum í einu og er töluvert
um að hópar fólks sem á sameiginleg
áhugamál af ýmsu tagi; fuglaskoðun,
köfun eða prjónaskap svo dæmi séu
tekin, komi saman og eigi góða stund
yfir áhugamáli sínu í Skjaldarvík.
Bryndís Óskarsdóttir og Ólafur Aðalgeirsson reka ferðaþjónustu að Skjaldarvík:
Hafa náð að bræða hjörtu gestanna
með ríkri þjónustulund
Hestaleiga er í Skjaldarvík, boðið er upp á þrjár ferðir daglega og er farið með leiðsögn um nágrennið. Mynd / Rakel Ósk Sigurðardóttir.
Bryndís Óskarsdóttir og Ólafur Aðalgeirsson reka ferðaþjónustu í Skjaldarvík. Þar búa þau ásamt þremur dætrum
sínum, Klöru 17 ára, Katrínu 12 ára og Sunnevu 10 ára, en þær taka virkan þátt í starfseminni með foreldrum sínum.
Mynd / Heiða Guðmundsdóttir.