Dagblaðið Vísir - DV - 23.03.2007, Blaðsíða 35

DV Sport föstudagur 23. mars 2007 35
Bjarki Sigurðsson er
þjálfari handboltaliðs
Aftureldingar sem
tryggði sér um síðustu
helgi sæti í úrvalsdeild-
inni. Liðið stefnir á að
komast í fremstu röð
meðal handboltaliða
landsins á nýjann leik.
Bjarki er ekki hrifinn af
mótafyrirkomulaginu
eins og það er nú og
segir 1. deildina alls ekki
nægilega sterka.
Afturelding tryggði sér um síðustu helgi sæti í
efstu deild handboltans með því að vinna tvo
stórsigra á Hetti á útivelli. Mosfellsbæjarliðið
er með átta stiga forystu í 1. deildinni og hefur
sýnt mikinn stöðugleika. Bjarki Sigurðsson,
fyrrum landsliðsmaður, er þjálfari Aftureld-
ingar og er að sjálfsögðu hæstánægður með
árangur liðsins í vetur. „Við höfum tapað ein-
um leik og það var gegn FH. Í þeim leik spiluð-
um við okkar versta leik á tímabilinu. En þetta
er nú þannig að maður fer ekki í gegnum heilt
tímabil án þess að tapa,“ segir Bjarki.
Hann er ekki nægilega sáttur við 1. deild-
ina í vetur og hefði viljað fá fleiri verðug verk-
efni fyrir lið sitt. „Ég tel deildina einfaldlega
ekki nægilega sterka og ekki hafa upp á mikið
að bjóða, það er leiðinlegt að segja það. Fyrir
tímabilið var ég á því að það yrðu þrjú til fjög-
ur lið sem yrðu í baráttunni um að komast
upp. Svo þegar á hólminn var komið þá gekk
okkur mjög vel og ég virtist vera með mestu
breiddina í mínu liði. Ég hefði viljað sjá fleiri
frambærilega leikmenn í þessari deild. ÍBV
fékk til sín mjög öfluga skyttu og þeirra lið
hefur verið að koma upp núna eftir áramótin
en önnur lið hafa verið að dala. Þar spilar ým-
islegt inn í, meðal annars hafa Selfyssingar
verið óheppnir með meiðsli hjá lykilmönn-
um.“ segir Bjarki. Allt stefnir í að það verði ÍBV
sem fylgi Aftureldingu upp.
Fyrir tímabilið ræddi Bjarki við um átta
leikmenn til að reyna að styrkja hópinn hjá
sér en enginn af þeim vildi koma. „Þeir fóru
allir í úrvalsdeildina, þar vilja menn spila,“
segir Bjarki.
Þarf að styrkja hópinn
„Ég er með stóran hóp, jafnan og breiðan.
Það er enginn sem á fast sæti í þessu liði þar
sem þetta eru flestir mjög jafnir leikmenn.
Þetta hefur bara verið spurning hvernig það
hentar hverjum og einum að spila á móti
hvaða liði,“ segir Bjarki um leikmannahóp
sinn. Hann segir þó að það þurfi að styrkja lið-
ið fyrir átökin í DHL-deildinni næsta vetur.
„Þessi hópur þyrfti að æfa töluvert bet-
ur til að halda sér í úrvalsdeildinni, það þarf
að styrkja hann. Munurinn á milli deilda er
einfaldlega það mikill. Að sjálfsögðu verða
flestir þessir strákar með á næsta ári en ég
veit alveg að það þarf að bæta við hópinn. Ég
gerði ákveðna tilraun í vetur og lét 2. flokkinn
æfa með meistaraflokknum. Eftir á að hyggja,
þegar maður er búinn að prófa það að skoða
þetta tel ég það ekki skynsamlega þjálfunarað-
ferð. Ungu strákarnir öðlast kannski einhverja
reynslu en á móti kemur að þeir sitja meira á
bekknum. Miðað við þennan hóp sem ég er
með þá tel ég ekki rétt að gera þetta svona og
mun hverfa til baka með það,“ segir Bjarki.
Afturelding er nú að snúa aftur í hóp þeirra
bestu og ætlar liðið sér stóra hluti. „Við höfum
sett okkur ákveðin framtíðarmarkmið, ætlum
að vera á ákveðnum stað eftir þrjú ár og svo
öðrum eftir fimm. Félagið verður hundrað
ára eftir tvö ár og við ætlum okkur stóra hluti,
það er ekki nokkur spurning. Ef Mosfelling-
ar þjappa sér saman þá getum við gert marga
góða hluti.“
Það hefur oft verið erfitt að fá fólk til að
starfa í kringum íþróttafélögin en Bjarki seg-
ir það ekki vera vandamál meðan vel gengur.
„Núna gengur allt vel og þá eru menn opnari
fyrir því að vinna með okkur. Þegar gengur illa
eiga menn til að pirrast og það bitnar á þeim
hlutum sem mega ekki við því.“
Breytinga er þörf
Mikið hefur verið rætt og ritað um keppn-
isfyrirkomulag Íslandsmótsins. Mætingin á
leiki er oft á tíðum sorgleg og flestir virðast
vera á því að breytinga sé þörf. Bjarki Sigurðs-
son hefur sínar hugmyndir.
„Mér fannst þessi úrslitakeppni í þessari
mynd sem hún var ekki eiga upp á pallborðið.
Fólk var áhugalaust og bara farið að bíða eftir
úrslitakeppninni. Það er ýmislegt sem hægt
er að gera til að reyna að jafna út þessi lið en
mér finnst hvorug deildin eiga rétt á sér eins
og þetta er í dag. Mér finnst það ekki sann-
gjarnt að 25% liða í úrvalsdeildinni falli eins
og þetta er í dag. Ég vil sjá mótafyrirkomulag-
ið þannig að það er spilað fyrir áramót og svo
muni deildin skiptast upp í 1. og 2. deild eins
og var einu sinni gert. Síðan vil ég sjá að gerð
verði úrslitakeppni út frá því.“
Fallið niður úr úrvalsdeildinni og í þá
fyrstu er gríðarlega stórt enda styrkleikamun-
urinn á deildunum gríðarlegur. „Fjárhagslega
er þetta mikil blóðtaka fyrir félögin og margir
leikmenn munu líklega hugsa sér til hreyfings
enda heillar þessi 1. deild ekki. Það er allavega
ljóst að þeir sem eru viðriðnir landsliðið fara
ekki að spila neitt í neðri deildinni, það þýðir
bara að þú ferð út úr myndinni,“ segir Bjarki.
„Ég get ekki séð að það þjóni neinum til-
gangi að spila fyrir tómu húsi eins og þetta
er núna. Þetta er pirrandi fyrir leikmenn sem
eru að stunda þessa íþrótt allt árið, koma sér
í form fyrir tímabilið og fá síðan þetta út úr
því. Það er verið að reyna að búa til stemn-
ingu fyrir liðum úti á landi en það er að ganga
illa. Maður veit ekki hvað verður um Hött og
ef ÍBV væri ekki að koma upp núna þá væri
þetta líklega í óvissu hjá þeim,“ segir Bjarki.
„Það þýðir ekki að hugsa bara um lands-
liðið. Það þarf að rækta grasið þar sem það
byrjar að vaxa og það er hjá liðunum í land-
inu. Þau eru að rembast við að halda úti ungl-
ingaflokkum og reyna að gera vel. HSÍ er sá
aðili sem þarf að breiða út boðskapinn fyrir
handboltann og þeir þurfa að koma betur að
þessu,“ segir Bjarki Sigurðsson. elvargeir@dv.is
Með stórar
framtíðaráætlanir
Bjarki sigurðsson og
félagar hans hjá
aftureldingu hafa
sett sér framtíðar-
markmið til næstu
fimm ára.Ætlum okkur stóra hluti