Læknablaðið - 15.09.1991, Síða 22

264
LÆKNABLAÐIÐ
athugavert við nafn deildarinnar?«, »Hvað á
svona deild að nefnast?«. Þar svöruðu 890
af 957 fyrri spurningunni og 798 af 957
þeirri seinni. Spurningin um hvort erfitt væri
að fá frí úr vinnu, féll niður um tíma en
einungis 17 svöruðu að svo væri og töldust
því niðurstöður þar ómarktækar.
UMRÆÐA
Húð- og kynsjúkdómadeild á
Heilsuvemdarstöð Reykjavíkur hefur lengi
verið útundan í fjárveitingum og hefur verið
erfitt að fá tæki til deildarinnar, svo sem
tölvu. Þetta gerir úrvinnslu gagna erfiða,
bæði í daglegum rekstri og í rannsóknum
sem þessari. Tilveruréttur sérhæfðrar deildar
sem þessarar hefur jafnvel verið dreginn í efa
og þá talið að starfseminni væri betur komið
annarstaðar svo sem á smitsjúkdómadeildum
eða jafnvel heilsugæslustöðvum. Hugsanlegt
er að slfk sjónarmið eigi þátt í hve erfið
starfsaðstaðan hefur verið. Með þetta í huga
var könnunin framkvæmd. Vegna eðlis
sjúkdómanna var ekki hægt að fá nákvæmar
persónulegar upplýsingar um sjúklingana svo
sem aldur og þá meðalaldur, því það hefði
í sumum tilfellum gert okkur kleift að vita
hvaða einstaklingur svaraði listanum.
í heild má segja að niðurstöðurnar hafi verið
ánægjulegar, þar eð meirihluta aðspurðra
fannst móttökumar góðar, (644 af 785 sem
svöruðu). En margs ber að gæta í slíkum
svörum. Margir sem koma á deildina eru
áhyggjufullir, en fá e.t.v. strax svör sem hafa
veruleg róandi áhrif sem síðan kemur fram
í svörum á spumingalista. A hinn bóginn fá
aðrir niðurstöður, sem valda áhyggjum, t.d. ef
maki þarf að koma til rannsókna!
Það sem flestum þótti bagalegt var löng bið.
Þar sem deildin er opin og engra tímapantana
er þörf, koma stundum upp þær aðstæður,
að margir koma í einu, og leiðir það til
langrar biðar. Einnig koma upp erfið tilvik
sem taka langan tíma, eins og annars staðar
í heilbrigðiskerfinu. Ef teknar eru upp
tímapantanir, verður nýting mótttökunnar
mun minni, og búast má við að einhverjir
þyrftu að bíða, jafnvel nokkra daga. Þetta
hefur ætíð þótt afleitur kostur því angistin sem
fylgir grun um kynsjúkdóm er mikil. Oftast er
biðin 5-20 mínútur, en getur orðið alltað 60
mínútum.
Þar sem biðin var stundum löng voru margir í
tfmaþröng og er það að hluta til orsök þess
að listum var fleygt ósvöruðum, sem lýsir
ennfremur óánægju með biðina. Svo virðist
sem fremur hljótt hafi farið um þessa deild því
flestir aðspurðra höfðu ekkert heyrt um viðmót
eða móttökur áður en komið var. Þeir sem
eitthvað höfðu heyrt, heyrðu oftast eitthvað
jákvætt enda ekki við að búast að þeir sem
heyrðu eitthvað neikvætt kæmu!
Oft hefur heyrst að sjúklingur með grun um
kynsjúkdóm vilji helst ekki gefa upp nafn,
en þetta er ekki reyndin hér, því einungis
3.1% svöruðu þar um játandi. Einnig mætti
segja hér að þeir sem ekki vilja gefa upp nafn
komi ekki. Margir kvarta yfir því að erfitt sé
að fá frí úr skóla og virðist sem sumir skólar
hleypi ekki nemendum til læknis nema með
því að þeir gangi á það frí sem þeir hafa til
heildarumráða, og er þetta afleitt. Eitt helsta
verkefni kynsjúkdómadeildar er að rekja smit.
Mikill tími og vinna fer í þetta og skilar það
oft ánægjulegum árangri. I þessari könnun má
sjá, að a.m.k. 252, eða 19.9% komu að beiðni
okkar (súlurit I, liðir 2,3 og 4).
Svo virðist sem margir komi á deildina
vegna ráðlegginga kunningja eða vegna
þess að starfsfólk deildar hafi beðið þá að
koma (súlurit I, liðir 5 og 6). Athyglisvert
er að einungis 4% eða 51 af 1266 kom
frá heimilislækni en heldur fleiri eða 6.9%
frá öðrum læknum. Af þessu má sjá, að
vísanir lækna eru ekki miklar en við skoðun
sjúklinganna sjáum við að þær mættu vera
fleiri!
Svör við spurningu um nafn deildarinnar eru
áhugaverð. Miklum meirihluta aðspurðra
fannst ekkert athugavert við nafnið.
Spurningunni svöruðu 890 af þeim 957 sem
hana fengu. Af þessum 890 svöruðu 88% því
að ekkert athugavert væri við nafnið, en 81.8
ef reiknað er af öllum sem fengu spuminguna
eins og gert er í töflunni.
I spurningunni um hverjar mótttökumar
hefðu verið svöruðu 79.9% að þær hefðu
verið góðar, en í næstu spumingu á eftir
kemur fram að 41.1% fannst biðin löng, auk
annarra athugasemda. Þetta kann að hljóma
mótsagnakennt en svo er þó ekki þegar betur
er að gáð. Móttökur geta verið góðar þótt
sjúklingur hafi athugasemdir, svo sem að biðin
hafi verið löng!