Kjarninn - 27.02.2014, Blaðsíða 73

06/06 pistill
livestream
Á Livestream-vefnum er boðið upp á að senda út efni í beinni
útsendingu á netinu, auk þess sem upptökur af slíku efni
eru þar sömuleiðis aðgengilegar. Lögreglan hefur einkum
nýtt sér þetta til að senda út fundi sem haldnir eru í einstaka
sveitarfélögum og hverfum á höfuðborgarsvæðinu, til að
tryggja að fleiri eigi þess kost að fylgjast með því sem þar er
í gangi. Jafnframt hefur þetta verið nýtt einu sinni fyrir al-
mennt netspjall undirritaðs, þar sem farið var yfir stöðu mála
og horfur og spurningum svarað frá þeim sem fylgdust með.
aðrir samfélagsmiðlar og fleira
Samfélagsmiðlarnar sem til eru eru mun fleiri en þeir sem
lögreglan hefur verið að nota undanfarin ár. Meðal vinsæl-
ustu miðla hér á landi má nefna Snapchat og Vine, en tveimur
erlendum unglingspiltum sem notið hafa mikilla vinsælda á
síðarnefnda miðlinum tókst að draga umtalsverðan fjölda ung-
menna í verslunarmiðstöð á höfuðborgarsvæðinu með litlum
fyrirvara fyrir stuttu. Ekki er hægt að útiloka að þessir vinsælu
miðlar gætu hentað lögreglunni með einhverjum hætti en þeir
hafa þó ekki formlega verið teknir í notkun af henni, hvað sem
síðar verður.
Um nokkurt skeið hefur verið í vinnslu sérstakt lögguapp
sem aðgengilegt verður fyrir allar helstu tegundir snjallsíma
og spjaldtölva fljótlega. Markmiðið með því er að draga saman
á einn stað alla virkni lögreglunnar á samfélagsmiðlum, auk
þess sem mögulegt verður að taka þar við áríðandi skilaboðum
frá lögreglunni. Er þetta einn liðurinn í því að nýta áfram
galdra samfélagsmiðlanna og auka enn frekar upplýsinga-
miðlun og gagnvirk samskipti lögreglunnar við þá sem búa,
starfa og dvelja á höfuðborgarsvæðinu. Allt miðar þetta að því
grundvallarmarkmiði lögreglunnar á höfuðborgarsvæðinu að
auka öryggi og öryggistilfinningu íbúa á svæðinu.