Morgunblaðið - Sunnudagur - 18.11.2012, Síða 6

6 MORGUNBLAÐIÐ SUNNUDAGUR 18.11. 2012
HEIMURINN
KÍNA
PEKING
Xi Jinping tók opinberlega við stöðu
leiðtoga kínverska
kommúnistaflokksins
af Hu Jintao á 18.
flokksþingi hans. Ný
sjö manna fastanefnd
stjórnmálaráðs
flokksins var kynnt
í lok þess. Í ræðu
á þinginu sagði Xi að „gríðarlegar
áskoranir“ biðu stjórnvalda.
SIERRA LEONE
FREETOWN
Íbúar Sierra Leone ganga í
dag, laugardag, þriðja sinni að
kjörborðinu eftir að blóðugri 11 ára
borgarastyrjöld lauk
2002. Líklegt er talið
að Ernest Koroma
forseti beri sigur
úr býtum, en Julius
Maada Bio, sem leiddi
herforingjastjórn í
landinu fyrir aldamót,
muni veita honum harða samkeppni.
Litið er á kosningarnar sem prófstein á
lýðræði í landinu.
BRASILÍA
BRASILÍA
Hæstiréttur Brasilíu dæmdi Jose Dirceu, starfsmannastjóra í
stjórn Luiz Inacios Lulas da Silvas, í tæplega 11 ára fangelsi fyrir
þátt hans í ráðabruggi um að kaupa atkvæði á þingi. Dirceu var
fundinn sekur í október. Hann ætlar að áfrýja dómnum og segir
að „stjórnkerfið“ í landinu sé að refsa sér fyrir að hafa verið
vinstrisinnaður uppreisnarmaður fyrir fjórum áratugum.
BRETLAND
LONDON
George Entwistle sagði af sér stöðu
yfirmanns breska ríkisútvarpsins, BBC, eftir
aðeins átta vikur í starfi vegna fréttar þar sem
stjórnmálamaður var ranglega bendlaður við
barnamisnotkun. Ákvörðun um að sýna ekki
þátt, sem hefði afhjúpað að Jimmy Savile, sem var
sjónvarpskynnir hjá stöðinni um árabil, misnotaði
börn, hefur valdið BBC álitshnekki.
Beiðni FBI um aðgang að
einkatölvupósti Davids Petra-
eusar er ein af 34.614 gmail-
netföngum, sem ríkisstjórnir
og einkaaðilar fóru fram á að-
gang að á milli janúar og júní
2012. Samkvæmt grein í
blaðinu The New Yorker
voru Bandaríkjamenn lang-
atkvæðamestir. Þeir báðu um
aðgang að 16.281 netfangi.
Póstur, sem geymdur er í
svokölluðu netskýi, nýtur
minni verndar en póstur
á harða drifinu í
heimatölvunni sam-
kvæmt bandarískum
lögum. Vart er
hægt að tala um
einkabréf lengur.
David Petraeus þótti hinnflekklausi leiðtogi, hers-höfðinginn, sem varð yfir-
maður bandarísku leyniþjónust-
unnar, CIA, eftir að hafa leitt heri
bandamanna í Írak og Afganistan.
Á föstudag fyrir viku féll hetjan af
stalli sínum. Þá sagði Petraeus af
sér og viðurkenndi að hafa haldið
fram hjá konu sinni.
Málið átti sér nokkurn aðdrag-
anda og er efni í vænan reyfara
með flókinni fléttu.
Petraeus hefur greint vinum sín-
um frá því að sjö mánaða samband
sitt við Paulu Broadwell hafi hafist
í nóvember 2011, skömmu eftir að
hann gekk úr hernum til að taka
við stjórn CIA. Hann er sextugur,
hún fertug. Þau hittust fyrst þegar
hann flutti fyrirlestur í Harvard-
háskóla 2006 þar sem hún var við
nám. Hann bauð henni að hjálpa
henni við námið. Tveimur árum
síðar tók hún hann á orðinu. Bæði
stunda líkamsrækt af kappi. Þau
fóru út að hlaupa og þegar hún
hafði betur á endasprettinum var
samkomulag um að hún fengi að
skrifa ævisögu hans innsiglað.
Ekki er hins vegar komið fram
hvað fékk Broadwell til þess að
senda hershöfðingjanum John Al-
len tölvupóst í maí til þess að vara
hann við Jill Kelley, sem í frétta-
skýringum er lýst sem áberandi
samkvæmisljóni í Tampa í Flórída.
Allen átti í vændum að verða
næsti yfirmaður herafla Atlants-
hafsbandalagsins, en Barack
Obama Bandaríkjaforseti hefur
slegið útnefningunni á frest vegna
málsins. Hjá Allen fundust þús-
undir tölvupósta til Kelley, 30 þús-
und síður í allt, sem ýmist eru
sagðir hafa verið „óviðeigandi“ eða
fullir af „daðri“.
Afdrifaríkar hótanir
Broadwell sendi umræddri Kelley
einnig tölvupósta með hótunum í
júní og júlí, gagnrýndi að hún
væri í slagtogi við Petraeus og Al-
len og spurði hana hvort maðurinn
hennar vissi af því. Þeir póstar
reyndust afdrifaríkir. Kelley fór
með þá til vinar síns, Frederick
Humphries, sem starfar hjá
bandarísku alríkislögreglunni,
FBI, við hryðjuverkarann-
sóknir. Síðar sá hún eftir því
og hugðist draga málið til baka,
en þá var það of seint.
FBI rannsakaði tölvupósta
Broadwell og komst að því
að hún hafði skipst á ástar-
bréfum við Petraeus auk
þess sem hún var með
trúnaðarskjöl. Fjórum
mánuðum síðar virðist
FBI hins vegar hafa komist að
þeirri niðurstöðu eftir að hafa rætt
við þá, sem hlut áttu að máli, að
öryggi hefði ekki verið stefnt í
hættu og glæpsamlegt athæfi hefði
ekki átt sér stað og því þyrfti ekki
að fara með málið lengra.
Þá tók Humphries til sinna
mála. Hann fékk á tilfinninguna að
FBI væri að þæfa málið af póli-
tískum ástæðum, enda stutt í
kosningar. Hann kom upplýsingum
til Erics Cantors, leiðtoga repú-
blikana í fulltrúadeildinni 27. októ-
ber. Cantor lét Robert Mueller,
yfirmann FBI vita af áhyggjum
sínum vegna málsins 31. október.
Töfin er útskýrð með fellibylnum
Sandy, en fréttaskýrendur velta
fyrir sér hvers vegna hann lét
John Boehner, forseta þingsins, og
aðra forustumenn repúblikana ekki
vita.
Petraeus var hins vegar orðið
ljóst að málinu yrði ekki haldið
leyndu mikið lengur og að ráði
James Clapper, yfirmanns leyni-
þjónustumála hjá Obama, sagði
hann af sér tveimur dögum eftir
kosningar, sagði hegðun sína óaf-
sakanlega og dómgreind brugðið.
Petraeus hefur verið kvæntur
Holly Petraeus í 38 ár og eiga þau
tvö uppkomin börn. Hann hafði
ávallt verið fyrirmynd í hernum,
þótt metnaðargirni hans og kapp-
semi hafi farið fyrir brjóstið á ein-
hverjum. Það er eðlilegt að falli
hans sé slegið upp, en tildrög
þessa máls eru ekkert síður at-
hygli verð. Petraeus er í raun
fórnarlamb þess eftirlitskerfis, sem
hann fór fyrir í starfi sínu hjá
CIA. Broadwell og Petraeus munu
hafa gert ýmislegt til að gera sam-
skipti sín órekjanleg. Ekki er ljóst
hvaða heimildum FBI beitti til að
skoða pósta þeirra, en eftir
hryðjuverkin 11. september 2001
hafa heimildir verið rýmkaðar það
mikið að lítið þarf til. Petraeus
virðist hafa fest í netinu, sem var
búið til í því skyni að stöðva
hryðjuverkamenn.
Petraeus
festist í eigin
njósnaneti
FRAMHJÁHALD OG TÖLVUPÓSTAR URÐU
HERFORINGJANUM DAVID PETRAEUS, FYRRVERANDI
YFIRMANNI CIA MEÐ GLÆSTAN FERIL, AÐ FALLI.
ER EFTIRLITSRÍKIÐ FARIÐ AÐ BORÐA BÖRNIN SÍN?
FBI gerir húsleit hjá
Paulu Broadwell.
ENGIN EINKAMÁL
David Petraeus stillir sér upp með Paulu Broadwell í Afganistan. Broadwell skrifaði ævisögu Petraeusar. Ástarsamband
þeirra og tölvupóstar urðu til þess að Petraeus sagði af sér stöðu yfirmanns bandarísku leyniþjónustunnar, CIA.
AFP
*Hreinskilnasta og frjálsasta afurð mannshugansog mannshjartans er ástarbréfið. Mark TwainAlþjóðamálKARL BLÖNDAL
kbl@mbl.is