Frjáls verslun - 01.11.2007, Blaðsíða 43
F R J Á L S V E R S L U N • 1 1 . T B L . 2 0 0 7 43
ársinsMenn Útnefningar í 20 ár
Feðgarnir Þorvaldur Guðmundsson í Síld
og fiski og Skúli Þorvaldsson á Hótel Holti
voru valdir menn ársins í íslensku viðskiptalífi
árið 1991 af dómnefnd Stöðvar 2 og Frjálsrar
verslunar. Í forsíðuumfjöllun Frjálsrar verslunar
sagði meðal annars að það sem einkenndi þá
feðga væri, að þeir létu verkin tala. „Allt frá
því að Þorvaldur Guðmundsson hóf eigin
atvinnurekstur árið 1944 hefur hann náð
einstæðum árangri á hverju því sviði sem hann
hefur kosið að starfa á. Það á við um rekstur
smásöluverslana, svínaræktun, kjötvinnslu,
markaðssetningu iðnaðarvara og síðast en ekki
síst hótel- og veitingarekstur. Skúli Þorvaldsson
hefur annast rekstur Hótel Holts síðustu átján
árin og lengst af fyrir eigin reikning.“
Þegar feðgarnir fengu þessa viðurkenningu
var Þorvaldur rétt að verða áttræður og engan
bilbug á honum að finna. „Ég er enn í fullu
fjöri og hef engin áform um að leggja upp
laupana. Að vísu hef ég dregið ofurlítið úr
vinnu og tel mig vel hafa efni á því. En ég mun
áfram sinna því sem ég kann á meðan ég get.“
Þorvaldur lærði meðal annars niðursuðu
í Þýskalandi árið 1934 og veitti forstöðu
niðursuðuverksmiðju á vegum Sölusambands
félags fiskframleiðenda þar til hann stofnaði
Síld og fisk árið 1944 til þess að framleiða
og selja síldar- og fiskrétti, eins og nafnið
gefur til kynna. Um tíma voru verslanirnar
fjórar í bænum og gat fólk keypt þar tilbúna
rétti, sem var nýlunda. Einnig fór hann
fljótlega út í kjötframleiðslu á eigin vegum.
Þorvaldur var líka frumkvöðull á sviði hótel-
og veitingareksturs. Hann var ráðgjafi við
byggingu Hótels Sögu og Hótels Loftleiða og
rak á sínum tíma Þjóðleikhúskjallarann og Lídó
og fór loks út í byggingu Hótel Holts á eigin
vegum.
Skúli Þorvaldsson tók Hótel Holt á leigu
af föður sínum árið 1979 og hafði á þessum
tímapunkti rekið það af krafti í 18 ár.
Árið 1991: Þorvaldur Guðmundsson í Síld
og fiski og Skúli Þorvaldsson á Hótel Holti
Þorvaldur Guðmundsson
Þorvaldur Guðmundsson
lést í janúar árið 1998. Börn
Þorvaldar og konu hans,
Ingibjargar Guðmundsdóttur
lyfjafræðings, stóðu að rekstri
Síldar og fisks fram til ársins
2000 þegar Skúli og Katrín
systir hans seldu sinn hlut.
Geirlaug Þorvaldsdóttir átt þá
enn þriðjung í Síld og fiski.
Eigendaskipti urðu á Hótel Holti
árið 2004 er Skúli Þorvaldsson
og Katrín Þorvaldsdóttir seldu
Geirlaugu systur sinni hluti sína
í húsinu, en Skúli átti rekstur
hótelsins lengi vel. Skúli hefur
verið búsettur í Lúxemborg
um hríð og fjárfestir nokkuð í
skráðum félögum og ýmsum
prívatverkefnum, til dæmis landi
og fasteignum.
1991
Vissulega viður-
kenning á sínum tíma
„Þetta var vissulega
viðurkenning á sínum tíma,
ekki spurning,“ segir Skúli
Þorvaldsson, sem var maður
ársins í íslensku viðskiptalífi
árið 1991 ásamt föður
sínum heitnum. Hann átti
jafnframt sæti í dómnefnd
Frjálsrar verslunar í átta ár.
„Breytingarnar sem hafa orðið
á íslensku viðskiptalífi síðan
þá eru hins vegar orðnar það
miklar að reglulega er fjallað
um Ísland í Financial Times
og Wall Street Journal. Þetta
er ótrúlegur árangur hjá 300
þúsund manna þjóð.“