Frjáls verslun - 01.11.2007, Blaðsíða 144
Fólk
144 F R J Á L S V E R S L U N • 1 1 . T B L . 2 0 0 7
framkvæmdastjóri fjármálasviðs íslandspósts
HELGA SIGRÍÐUR BÖÐVARSDÓTTIR
Íslandspóstur veitir fyrirtækjum og ein-staklingum þjónustu á sviði dreifingar-, samskipta- og flutningalausna og er leiðandi
á Íslandi í bréfa- og vörudreifingu. Helga
Sigríður Böðvarsdóttir er framkvæmdastjóri
fjármálasviðs Íslandspósts. „Eftir að hafa
starfað hjá Íslandspósti í tvö ár við ýmis
verkefni í reikningshaldi félagsins bauðst mér
starf framkvæmdastjóra fjármálasviðs sem ég
tók við núna í október. Þessi tvö ár mín
hjá Íslandspósti hafa verið skemmtileg. Það
kom mér á óvart hversu líflegt félagið er og
starfsemin er töluvert flóknari en ég hafði áður
haldið. Ég hafði eins og örugglega margir séð
bara póstinn sem berst inn um lúguna hjá mér
án þess að hugsa mikið um leiðirnar sem hann
fer þangað. Póstfyrirtæki um allan heim starfa
í samræmi við alþjóðlega samninga, bæði
varðandi fyrirkomulag og gæði og það getur
oft verið heilmikið mál að koma þessu öllu
heim og saman, en það er nú einmitt það sem
gerir starfið skemmtilegt.“
Helga lauk viðskiptafræðinámi frá Há-
skóla Íslands og er löggiltur endurskoðandi.
„Áður en ég hóf störf hjá Íslandspósti vann
ég í mörg ár hjá KPMG endurskoðunar-
stofunni í Reykjavík og á Austurlandi. Ég
bjó í fimm ár á Egilsstöðum og hugurinn
leitar nú alltaf svolítið þangað. Síðasta
sumar varði ég loks hluta af sumarfríinu
fyrir austan en það hefur staðið til síðan ég
flutti þaðan árið 2001.
Sumarfríinu var sem sagt varið innan-
lands þetta árið, bæði á Austurlandi
og innanbæjar, því að ég átti frábært
frí í Reykjavík sem var nú ekki slæmt í
veðurblíðunni sem var hér í sumar. Eftir
þetta get ég hiklaust mælt með Reykjavík
sem ferðamannaborg (að minnsta kosti í
góðu veðri). Ég uppgötvaði t.d. ylströndina
í Nauthólsvík í fyrsta skiptið í sumar, fór
á söfn eins og sannur túristi og meira að
segja í verslunarleiðangra í borginni svo að
þetta var algjörlega hefðbundið sumarfrí. Í
febrúar fer stórfjölskyldan síðan í skíðafrí til
Sviss í tilefni af sextugsafmæli móðurbræðra
minna. Ég hef áður farið í svona skíðafrí
og held að það sé bara hið fullkomna frí,
alveg rétta blandan af puði, skemmtun
og afslöppun - algerlega óháð því hversu
góður maður er á skíðum.“
Nafn: Helga Sigríður
Böðvarsdóttir.
Fæðingarstaður: reykjavík,
4. maí 1968.
Foreldrar: Svala Helgadóttir og
Böðvar Guðmundsson.
Maki: Einhleyp.
Börn: Engin.
Menntun: Viðskiptafræðingur
og löggiltur endurskoðandi.
Helga Sigríður
Böðvarsdóttir: „Ég bjó í
fimm ár á Egilsstöðum
og hugurinn leitar nú
alltaf svolítið þangað.
Síðasta sumar
varði ég loks hluta
af sumarfríinu fyrir
austan.“