Uppeldi og menntun - 01.07.2015, Blaðsíða 83

UPPELDI OG MENNTUN/ICELANDIC JOURNAL OF EDUCATION 24(2) 2015 83
GUNNHILDUR JAKOBSDÓTTIR, SNÆFRÍÐUR ÞÓRA EGILSON OG K JARTAN ÓLAFSSON
Framkvæmd
Matslistinn var settur upp rafrænt og hýstur á vef Rannsóknar- og þróunarmiðstöðvar
Háskólans á Akureyri (RHA) og var forritið Survey Monkey notað við uppsetningu
hans. GRR sá um öflun þátttakenda í rannsóknarhóp og veitti starfsfólki RHA upp-
lýsingar svo hægt væri að gera nákvæma pörun í samanburðarhóp. Öll samskipti við
þátttakendur voru í gegnum tengiliðina GRR (rannsóknarhópur) og RHA (saman-
burðarhópur).
Væntanlegir þátttakendur fengu kynningarbréf um rannsóknina auk vefslóðar og
kóða í pósti. Tveimur vikum síðar fengu þátttakendur símtal þar sem minnt var á
rannsóknina. Auk þess fengu þátttakendur í rannsóknarhópi ítrekun í tölvupósti. Þeir
þátttakendur sem svöruðu matslistanum samþykktu þar með þátttöku sína í rann-
sókninni. Öll gögn bárust RHA og voru ópersónugreinanleg, það er að segja nafnlaus
og án kennitölu. RHA sá um að dulkóða gögnin og gera þau þannig úr garði að auð-
velt væri að gera samanburð á hópunum út frá aldri, kyni og búsetu. Gagnasöfnun
stóð yfir frá nóvember 2013 til janúar 2014.
Tölfræðileg úrvinnsla
Við úrvinnslu gagna var notuð lýsandi tölfræði og ályktunartölfræði. Munur á
meðaltali hópanna var skoðaður með marktektarprófum (95% öryggismörk) og áhrifa-
stærðir reiknaðar. Útreikningur á heildarsummu stiga var skoðaður sem hrátala eða
sem hlutfall af ákveðnum svörum eða hæsta mögulega hlutfall (e. percent of maximum
possible (POMP)). Hæsta mögulega hlutfall er talið henta vel við útreikning heildar-
summu stiga í aðstæðum þar sem eðlilegt er að eyður séu í gögnunum (e. missing
values) vegna þess að sum atriði sem spurt er um eiga ekki við (Coster, Law o.fl.,
2011).
Við samanburð milli rannsóknarhóps og samanburðarhóps voru niðurstöður reikn-
aðar sem meðaltal heildarsummu stiga úr matslistanum. Niðurstöður voru skoðaðar
út frá aldri, kyni og búsetu barnanna og menntun foreldra.
Munur á meðaltali samanburðarhóps og rannsóknarhóps var kannaður með mark-
tektarprófum. T-próf óháðra úrtaka var notað til að kanna mun á milli hópanna þegar
hlutfallskvarðar voru notaðir (tíðni; hlutdeild) og kí-kvaðrat próf þegar kannað var
hvort tölfræðilega marktækur munur væri á hlutföllum hópanna þegar nafnkvarðar
voru notaðir (tekur aldrei þátt, þörf á breytingu og umhverfisþættir sem ýta undir eða
torvelda þátttöku).
Þar sem matslistinn byggist á mörgum ólíkum kvörðum og til að auðvelda saman-
burð á milli hópanna var heildarsumma stiga og skor allra þátta staðlað. Það var gert
með því að reikna út áhrifastærðir (e. partial eta square η²p). Með áhrifastærð er metið
hversu hátt hlutfall breytileikans má rekja til óháðu breytanna (Creswell, 2012) sem
í þessari rannsókn voru einhverfa og aldur. Við mat á áhrifastærðum var Cohens d
notað, en samkvæmt skilgreiningum Cohens má túlka áhrifastærðina 0,2 sem lítil
áhrif, 0,5 sem miðlungs áhrif og áhrifastærð ≥0,8 sem mikil áhrif (Cohen, 1988).