Dagblaðið Vísir - DV - 11.12.2009, Blaðsíða 32

32 föstudagur 11. desember 2009 helgarblað
„Það var úr vöndu að velja því mér finnst allir
viðmælendur mínir jafnspennandi,“ segir Anna
Kristine Magnúsdóttir fjölmiðlakona sem hefur
sent frá sér bókina Milli mjalta og messu. Bók-
in er unnin upp úr samnefndum útvarpsþátt-
um en í bókina valdi Anna Kristine fimm ólíka
viðmælendur til að bregða upp nærmyndum af
og fyrir valinu urðu prestur í Reykjavík, strúta-
bóndi í Suður-Afríku, miðill á Akureyri, kona
sem missti fjölskylduna í snjóflóði fyrir sextíu
árum og Ragnar Axelsson ljósmyndari.
Aftur komin í loftið
„Hugmyndin er reyndar gömul en Guðjón Ingi
Eiríksson hjá Bókaútgáfunni Hólum hafði haft
samband við mig árið 1998, en mér fannst ég
ekki hafa nægilegt efni svo ég afþakkaði. Þrem-
ur árum síðar, eða 2001, hafði bókaútgáfan
Edda samband við mig og þá gaf ég út tvær bæk-
ur. Ég hafði alltaf verið með sektarkennd gagn-
vart Hólum og hafði svo samband við Guðjón
Inga í vor. Þá hafði ég ekki fengið starf við upp-
lestur á bókum fyrir blinda og þar sem ég kann
afskaplega illa að taka höfnun vildi ég finna
mér eitthvað annað fljótt. Guðjón tók mjög vel
í hugmyndina svo á meðan aðrir voru úti í sól-
inni í sumar sat ég inni og skrifaði og saknaði
einskis.“
Anna Kristine hefur starfað á fjölmiðlum
í tæp 33 ár. Útvarpsþættinum Milli mjalta og
messu stjórnaði hún á Rás 2 í þrjú ár; síðar
á Bylgjunni í fjögur ár en hún var einnig með
þáttinn Messufall á Talstöðinni og Kvöldsög-
ur á Bylgjunni í stuttan tíma og hefur starfað í
sjónvarpi, á dagblöðum og tímaritum. „Milli
mjalta og messu hefur alltaf átt best við mig.
Það á bæði vel við mig og viðmælendur mína
að vakna svona snemma,“ segir Anna Kristine
brosandi en hún er byrjuð aftur með útvarps-
þáttinn, á Útvarpi Sögu í þetta skiptið.
Veiktist alvarlega
Árið 2007 veiktist Anna Kristine svo hún varð
að hætta að vinna. Eftir að hafa verið send
lækna á milli í eitt og hálft ár var hún greind
með Parkinsonsveiki núna í mars. Hún seg-
ir að þótt greiningin hafi verið mikið áfall hafi
henni einnig fylgt léttir enda hafði hún upplif-
að vítiskvalir sem enginn læknir virtist geta út-
skýrt. Hún hafi brotnað niður en ákveðið, eft-
ir nokkurra daga sorg, að berjast. „Mamma er
mjög veik af Parkinson en ég trúði því aldrei að
ég myndi fá þetta svona ung. Í nokkra daga grét
ég látlaust og sá enga framtíð, en eftir þá útrás
varð ég staðráðin í að láta ekki einhvern „Park-
inson“ kýla úr mér vonina,“ segir hún og bæt-
ir við að húmor geti gert ótrúlegustu hluti fyrir
mann þegar lífið virðist erfitt.
Spjallar í Bónus
Anna Kristine er hæstánægð með að vera kom-
in aftur í útvarp sem er hennar uppáhaldsfjöl-
miðill. „Að vera komin að hljóðnemanum er
eins og að hafa fengið 50 vítamínsprautur, ég
hef saknað þess lengi. Fyrir mig er þetta ekki
eins og vinna, ég veit ekkert skemmtilegra en
að ræða við fólk enda gríðarlega forvitin, en á
jákvæðan hátt,“ segir hún og bætir við að hún
gangi oft upp að ókunnugum í Bónus og ræði
innkaupin. „Ég vil vita af hverju fólk er að
kaupa hitt eða þetta og ég er líka dugleg við
að hrósa fólki sem ég sé úti á götu, rýk bara á
það og byrja að tala,“ segir hún og bætir við að
Íslendingar taki því yfirleitt vel og séu upp til
hópa viljugir í spjall.
Anna Kristine er ánægð með bókina en
þegar hún byrjaði að hlusta á upptökur af
þáttum til að velja viðmælendur var hún svo
veik að hún fékk vinkonur sínar til að vél-
rita fyrir sig. „Þetta eru englarnir Anna Rósa,
Guðrún og Þórunn – hefurðu aldrei heyrt
þær nefndar?“ spyr hún glaðlega. „Þær vél-
rituðu grunninn, ég hitti fólkið og byggði
ofan á þannig að úr útvarpsþáttum yrðu bók-
arkaflar.“
Flott bókajól
Anna segist hafa það mjög gott núna en hún
er, með hjálp lyfja og dvalar á Reykjalundi,
komin með krafta í hendurnar eftir að hafa
verið nánast lömuð af krömpum í hand-
leggjum og bjargarleysi. Um páskana 2008
var hún svo illa haldin af verkjum og vanlíð-
an að hún vildi helst fá að deyja og hún við-
urkennir að þá hefði aldrei hvarflað að henni
að ári síðar væri hún farin að skrifa bók. Hún
segir drauminn að skrifa fleiri bækur og að
barnabók sé næst í röðinni. „Þetta eru flott
bókajól, samkeppnin verður hörð,“ segir hún
brosandi og bætir við að hún sé heldur betur
komin í jólaskap. „Ég vaknaði síðasta laugar-
dagsmorgun í svo miklu jólaskapi að ég setti
jólalög á fóninn, missti mig í jólaskrautinu og
skreytti reyndar svo mikið að sunnudagurinn
fór að mestu í að pakka hluta þess niður aftur!“
indiana@dv.is
Fjölmiðlakonan Anna Kristine
Magnúsdóttir hefur sent frá sér
bókina Milli mjalta og messu sem
er unnin upp úr samnefndum
útvarpsþáttum hennar. Anna
Kristine lætur Parkinsonsveiki
ekki stoppa sig í að láta draumana
rætast og er mætt aftur í loftið
með þáttinn sinn vinsæla.
ÚtVArpSKonA „Að vera komin að hljóðnemanum er
eins og að hafa fengið 50 vítamínsprautur, ég hef saknað
þess lengi. Fyrir mig er þetta ekki eins og vinna, ég veit
ekkert skemmtilegra en að ræða við fólk enda gríðarlega
forvitin, en á jákvæðan hátt,“ segir Anna Kristine.
MYnD rAKEL ÓSK SIGUrÐArDÓttIr
eð a ki son
Skrifar bók