Tölvumál - 01.11.2009, Blaðsíða 9
T Ö L V U M Á L | 9
samstarfi við frumkvöðlasetur MIT háskóla. Markmiðið með keppninni er
að þetta ferli sem keppendur fara í gegnum, verði með tímanum ákveðinn
gæðastimpill á viðskiptahugmyndir og fyrirtæki – en þó fyrst og fremst
fólk, því að það eru einstaklingarnir sjálfir sem skapa góð fyrirtæki.
Fyrirmyndin MIT $100K frumkvöðlakeppnin er af mörgum talin sú fremsta í
heiminum og hefur verið vettvangur þjálfunar framúrskarandi einstaklinga
og byrjunarreitur fjölmargra fyrirtækja. Þannig hefur keppnin leitt af sér
þúsundir starfa og laðað að tugi milljarða í fjárfestingar. Þegar árangur allra
þeirra fyrirtækja sem stofnuð hafa verið af fyrrverandi nemendum við MIT
er það á við 20. stærsta hagkerfi í heimi. Þrátt fyrir það telur skólinn aðeins
um 10 þúsund nemendur. Þá ættum við einnig að horfa sérstaklega til vina
okkar í Finnlandi þar sem undirstöður nýsköpunar eru gríðarlega sterkar,
en þeir eru í efsta sæti á alþjóðlegum lista yfir árangur nýsköpunar (e.
Global Innovation Performance). Það er því að okkar mati hjá Innovit engin
fyrirstaða að Ísland sé lítið land, við höfum alla burði til þess að skapa eitt
fremsta stuðningsumhverfi nýsköpunar í heimi.
Alþjóðlegt tengslanet
Til viðbótar við öflugar stuðningsaðgerðir á Íslandi er lykilatriði fyrir
íslensk fyrirtæki og frumkvöðla að byggja upp alþjóðlegt tengslanet, enda
eru íslensk fyrirtæki oftar en ekki í samkeppni á alþjóðamörkuðum hvort
sem þau eru stór eða smá. Á síðasta ári var í fyrsta sinn haldin alþjóðleg
frumkvöðlavika í heiminum þar sem 78 lönd úr öllum heimsálfum tengdust
í gegnum fjölda viðburða sem tengjast nýsköpun og frumkvöðlastarfsemi.
Með tilstilli Innovit er Ísland nú orðið hluti af þessari alþjóðlegu viku og gefst
öllum skólum á Íslandi, frumkvöðlasetrum, félagasamtökum, fyrirtækjum,
opinberum stofnunum og öðrum tækifæri til að taka þátt í og skipuleggja
stóra sem smáa viðburði og leggja sitt af mörkum til frumkvöðlaviku
heimsins í nóvember á þessu ári. Gert er ráð fyrir að alls verði haldnir hátt
í 10 þúsund viðburðir um allan heim af því tilefni, auk þess sem lögð er
áhersla á rafræn samskipti og alþjóðlegt tengslanet. Það er því ljóst að
tækifærin eru mörg og það eru skemmtilegir tímar framundan.
Sprotafyrirtæki dagsins í dag geta orðið
stórfyrirtæki framtíðarinnar
Það er engin fyrirstaða að Ísland sé lítið
land, við höfum alla burði til þess að skapa
eitt fremsta stuðningsumhverfi nýsköpunar í
heimi