Tölvumál - 01.11.2009, Blaðsíða 50
5 0 | T Ö L V U M Á L
16. október 2008 Lausnir til framtíðar var heitið á ráðstefnu um
upplýsingatækni í heilbrigðisþjónustu sem haldin var á Hótel Loftleiðum
í samvinnu Fókus - félags um upplýsingatækni í heilbrigðisþjónustu og
Skýrslutæknifélags Íslands. Á ráðstefnunni var m.a. fjallað um ýmis konar
verkefni þar sem m.a. er verið að nota upplýsingatæknina til að bæta
aðgengi að þjónustu í heilbrigðiskerfinu og auka gæði meðferðar sjúklinga.
Einnig hvernig nota má tæknina til að vinna þekkingu úr heilbrigðisgögnum
og auka samfellda þjónustu.
30. október 2008 Í tilefni af 40 ára afmæli Skýrslutæknifélags Íslands
var opnuð sýning á eldri tölvubúnaði í Þjóðarbókhlöðunni sem öldungadeild
félagsins stóð fyrir. Búnaðurinn er frá því um 1978 - 1998 eða frá síðustu
2 áratugum liðinnar aldar. Boðið var upp á léttar veitingar í boði Nýherja og
Vigor ehf. og mættu um 130 – 150 manns. Við viljum þakka af heilum hug
Sigurði Bergsveinssyni og hans fyrirtæki og samstarfsfólki fyrir að halda
sýninguna svona myndarlega. Þjóðarbókhlaðan var flott umgjörð og eigum
við henni einnig þökk að gjalda.
6. nóvember 2008 stóð Skýrslutæknifélagið fyrir stuttu örnámskeiði
sem kallað var „CRM námskeið á leið heim úr vinnu“ og var nýjung og
haldið milli kl. 16:30 og 18. Þetta var fyrir félaga sem vilja fá hnitmiðaða
kynningu á CRM en hafa lítinn tíma. Örnámskeiðið var haldið í salnum á
neðstu hæðinni hjá Ský að Engjateigi 9. Það tókst afar vel og var ákveðið að
halda þessu áfram.
20. nóvember 2008 Tími tækifæra – Hugbúnaður í nýsköpun var
heiti á hinni árlegu hugbúnaðarráðstefnu Ský um möguleika nýsköpunar
í hugbúnaðargeiranum, nýjungar í aðferðarfræði. Sem aldrei fyrr er þörf á
fjölbreytni og nýjum tækifærum í atvinnulífinu. Upplýsingatækni er kjörinn
vettvangur fyrir nýsköpun m.a. vegna þess að efniskostnaður þarf ekki
að vera mikill og leiðin til markaðarins getur verið bein og kostnaðarlítil.
Á þessari ráðstefnu var fjallað um tækifærin sem felast í hugbúnaðargerð,
með áherslu á nýjungar í aðferðarfræði og þróunarumhverfi sem
sérstaklega styðja við lítil fyrirtæki og þá, sem ekki geta kostað miklu til.
Sjónum var beint að nýrri og spennandi þjónustu á netinu og í símum.
Nokkur verðlaunuð nýsköpunarfyrirtæki, sem eru við það að markaðsetja
vöru sína, kynntu afurðir sínar. Niðurstöður áhugaverðra þróunar- og
rannsóknaverkefna á sviði hugbúnaðargerðar voru krufnar.
Nokkrir atburðir féllu niður. Þrír aðrir atburðir voru skipulagðir
á haustdögum 2008 en varð því miður að fella þá niður vegna ónógrar
þáttöku sem rekja má væntanlega til fjármálaáfalls í þjóðfélaginu og voru
það eftirtaldir atburðir:
3. október Grilluð upplýsingatækni - Unga fólkið og eldhússtörfin, með
léttum veitingum og rappari ætlaði að mæta á staðinn
21. október Upplýsingatækni og tónlist: Ný viðskiptamódel? Hádegisfundur.
5. desember Jólaráðstefna um hvernig fólk og fyrirtæki í upplýsingatækni
getur mætt nýjum aðstæðum og byggt sig upp til framtíðar.
16. janúar 2009 Atvinnumál einhverfra í upplýsingatækni var
nafnið á hádegisverðarfundi sem Ský hélt í samvinnu við Umsjónarfélag
einhverfra í tilefni af útgáfu heimildarmyndarinnar „Sólskinsdrengurinn“
um stöðu einhverfra í atvinnulífinu. Aðalfyrirlesari var danski frum-
kvöðullinn Thorkil Sonne en hann hefur hlotið heiðursverðlaun danska
Upplýsingatæknifélagsins á árinu 2008 fyrir störf sín í þágu einhverfra.
Thorkil hefur með góðum árangri nýtt, þjálfað og skapað verðmæt störf
fyrir fólk með einhverfu í upplýsingatækni. Mikill fengur var, sérstaklega
nú í kreppunni, að fá einstakling sem finnur tækifæri þar sem aðrir sjá
aðeins vandamál. Hann kemur fram í íslensku heimildarkvikmyndinni
Sólskinsdrengurinn sem frumsýnd var 9. janúar 2009.
22. janúar 2009 Tíu pyttir sem þú þarft að forðast var nafnið á
örnámskeiði um gagnagrunna á leið heim úr vinnu og var það vel sótt.
Síðan
síðast...
Yfirlit yfir fundi og atburði hjá Skýrslutæknifélagi
Íslands seinni hluta árs 2008 og fyrri hluta árs 2009.