Tölvumál - 01.11.2009, Blaðsíða 20

2 0 | T Ö L V U M Á L
Reynslusaga:
Sprotalíf
Í sviðsljósinu
Fyrr á þessu ári var töluvert fjallað um leikjafyrirtækið Gogogic í fjölmiðlum,
aðallega vegna þess að á skömmum tíma gerðist margt jákvætt sem snerti
félagið. Það hlaut tilnefningu til norrænna verðlauna fyrir fyrsta iPhone
leikinn sinn, þá var það útnefnt til Vaxtarsprotans og samdi síðar sama
dag við Nýsköpunarsjóð atvinnulífsins um kaup á hlutafé í félaginu. Stuttu
seinna kom í ljós að það var einnig í hópi fyrirmyndarfyrirtækja í könnun VR
um fyrirtæki ársins. Allt var þetta árangur af mikilli vinnu, baráttu og margra
ára uppbyggingu.
Þetta unga sprotafyrirtæki hefur reyndar áorkað meiru á árinu. Snemma
vors tók það höndum saman við Háskólann í Reykjavík og stóð að keppni í
gerð örleikja. Leikirnir áttu að tengjast Facebook vefnum og vera spilanlegir
innan hans. Keppnin tókst í alla staði vel og niðurstaðan voru tveir leikir
sem sýndu klárlega getu íslenskra háskólanema til þess að sinna störfum
í þessum iðnaði.
Í framhaldi ákvað Háskólinn í Reykjavík að bjóða háskólanemum upp á
sérstakt námskeið í hönnun tölvuleikja. Skólinn fékk framkvæmdastjóra
Gogogic til liðs við sig og kennsla hófst á sumarönn. Þar að auki hafði hópur
nemenda unnið hjá fyrirtækinu frá áramótum, við lokaverkefni sitt, en það
snérist einmitt um að gera tölvuleik sem starfsmenn höfðu hannað. Tveir til
þrír þeirra nemenda sem tóku þátt í verkefninu eru starfsmenn fyrirtækisins
í dag.
Af þessu er ljóst að hér er dæmi um sprotafyrirtæki sem tengist
háskólasamfélaginu talsverðum böndum. Það er reyndar ekkert undarlegt
þar sem þrír af stofnendum fyrirtækisins stunduðu saman nám í Háskólanum
í Reykjavík og í raun var grunnurinn að fyrirtækinu lagður þar.
Upphafið
Á vormánuðum ársins 2006 varð Gogogic til og upphaflega taldi félagið tvo
starfsmenn en þeir deildu lítilli skrifstofu með öðru fyrirtæki og voru flestum
stundum staðsettir hjá viðskiptavinum, í útseldri vinnu. Þremur árum síðar
voru starfsmennirnir orðnir 16 og litla skrifstofan orðin að 420 fermetra
húsnæði þar sem nóg pláss er fyrir alla.
Að lifa af
Fyrirtækið hefur þó ekki látið af því að selja út vinnu til annarra, en það
hefur alltaf aflað þjónustutekna meðfram því að þróa eigin vörur. Í fyrstu
sinnti félagið forritunarverkefnum, í samræmi við þekkingarsvið stofnenda,
en smám saman færðist vinnan í farveg sem átti meira sammerkt með
leikjagerðinni, sem var ávallt aðal markmið fyrirtækisins. Undanfarin ár
hefur Gogogic búið til alls kyns netborða, auglýsingaleiki og vefherferðir
fyrir viðskiptavini sína.
Sú stefna, að sinna vinnu fyrir aðra meðfram þróun, hefur agað félagið
mikið. Það þurfti strax að koma sér upp grunnferlum, læra að skila af
sér vinnu til notenda og halda utan um verkefni frá byrjun til enda. Þetta,
ásamt því að stofnendur félagsins ákváðu snemma að stofna ekki til
langtíma skulda, varð sennilega til þess að fyrirtækið gat staðið af sér
versta storminn í kjölfar þess sem gerðist í íslenska viðskiptalífinu haustið
2008. Þó varð félagið fyrir talsverðum búsifjum vegna samdráttar í útseldri
vinnu en aginn og fjárhagsleg seigla skilaði af sér Kreppuspilinu, sem gefið
var út í desember þetta sama ár. Þannig snéri félagið verkefnaskorti upp
í framleiðslu á nýrri vöru og nýtti sér þá þekkingu og getu sem útselda
vinnan hafði myndað.
Niðurlag
En hvað felst í þessari stuttu grein? Sennilega lítil dæmisaga af rekstri
íslensks sprotafyrirtækis sem er stofnað í logni en rekið í stormi, þar sem
áherslan á góð gildi skilar mönnum heilum í höfn. Að svo stöddu er Gogogic
að ná ágætis árangri en auðvitað verður að hafa í huga að félagið er enn að
slíta barnskónum og því er töluverð áhætta enn til staðar. En hugsanlega
verður sú uppskera, sem þegar hefur náðst í hús, nægilegt veganesti til
þess að skila félaginu og starfsmönnum þess áframhaldandi árangri.
Jónas Björgvín Antonsson,
framkvæmdastjóri Gogogic
Snéri félagið verkefnaskorti upp í
framleiðslu á nýrri vöru og nýtti sér þá
þekkingu og getu sem útselda vinnan
hafði myndað
Félagið er enn að slíta barnskónum og
því er töluverð áhætta enn til staðar