Tölvumál - 01.11.2009, Blaðsíða 10
1 0 | T Ö L V U M Á L
Ný sprotafyrirtæki eða önnur fyrirtæki sem sinna
nýsköpun af einhverju tagi þurfa að huga að mörgu.
Í þessari grein er gerð tilraun til þess að fara yfir það
sem flest sprotafyrirtæki rekast á þegar þau eru að
hefja rekstur. Eftirfarandi eru þeir þættir sem flestir
velta fyrir sér við stofnun nýs sprotafyrirtækis.
Styrkumsóknir
Flest ný sprotafyrirtæki fara þá leið að skoða hvaða styrki þeir geti fengið
til að geta framfleytt sér fyrstu mánuðina, þ.e. þessa mánuði sem verið er
að þróa nýja tækni eða þjónustu. Styrkumsóknirnar eru í flestum tilvikum
nokkuð tímafrekar og passa þarf vel upp á að skilgreina vel nýnæmi
þjónustunnar og hvernig samkeppnisumhverfið fyrir hana lítur út. Að auki
hafa styrkveitendur horft svolítið til þess hvaða vörur og þjónusta koma til
með að auka komu gjaldeyris inn í landið.
Dæmi um styrkveitendur eru Rannís, Nýsköpunarmiðstöð Ísland, Atvinnumál
kvenna og Nýsköpunarsjóður. Einnig er möguleiki á að ná í styrk með því að
taka þátt í frumkvöðlakeppni Innovits, Gullegginu. Taka ber fram að aldrei
hafa eins margar styrkumsóknir borist og nú, þannig að aðeins lítill hluti
þeirra sem sækja um fá styrk.
Gerð viðskiptaáætlunar
Til að geta sótt um styrk eða til að ná í fjárfesta þarf viðskiptaáætlun að liggja
fyrir. Þeir sem bjóða sprotafyrirtækjum aðstoð við gerð viðskiptaáætlanna
eru t.d. Innovit, Klak og Nýsköpunarmiðstöð Íslands og alveg tilvalið að
skoða hvaða námskeið og ráðgjöf þau hafa að bjóða. Að auki er hægt að
finna nokkra ráðgjafa sem aðstoða við gerð viðskiptaáætlanna.
Í viðskiptaáætluninni er mikilvægt að fara ofan í sem flesta þætti sem við
koma vörunni eða þjónustunni sem verið er að þróa. Í áætlunni er t.d. farið
ofan í saumana á þróuninni, markaðurinn skoðaður ítarlega, samkeppnin
kyrfilega greind og gert er eins nákvæmt arðsemismat og mögulegt er. Það
fer oft töluverður tími í gerð áætlunarinnar en því betur sem hún er gerð því
betri er undirbúningurinn.
Skipulagning
Þó að flest sprotafyrirtæki byrja aðeins sem eins til tveggja starfsmanna
fyrirtæki er ekki þar með sagt að ekki þurfi að skipuleggja sig. Við gerð
viðskiptaáætlunarinnar kemur yfirleitt í ljós að það er fullt af verkliðum sem
þarf að skoða. Gott er að skrá það vandlega hjá sér og gera hjá sér einfalt
plan sem allir sem koma að verkefninu treysta sér að fara eftir. Ef þetta er
gert getur maður betur áttað sig á því hvað verkefnin taka langan tíma og
auðveldara að setja sér markmið um tímasetningar.
Gott er að skoða vöruþróunina eða þróun þjónustunnar sem verið er að
skapa út frá fleirum sjónarhornum en bara tækniþróuninni sjálfri. Aðrir
þættir sem ætti að skoða vel og skipuleggja gætu t.d. verið markaðsmál,
söluáætlun, þjónusta við vöruna, afhendingaferli og gjaldfærsla svo eitthvað
sé nefnt. Eitt er að þróa vöruna og annað er að koma henni á framfæri - en
hvorutveggja er jafn mikilvægt.
Við hverju máttu
búast sem stofnandi nýs
sprotafyrirtækis?
Ragnheiður H. Magnúsdóttir, Msc í
framleiðsluverkfræði