Tölvumál - 01.11.2009, Blaðsíða 26

2 6 | T Ö L V U M Á L
Hvers vegna hafa
krakkar og unglingar
ekki áhuga á að læra
tölvunarfræði?
Nemendum í tölvunarfræði hefur ekki fjölgað jafnmikið og í öðrum greinum á síðustu árum og var sú
þróun kveikjan af verkefni sem að undirritaðir framkvæmdu í námi sínu í tölvunarfræði síðasta vor. Það
er visst áhyggjuefni að á meðan nemendum fjölgar í háskólum fjölgi nemendum í tölvunarfræði ekki
hlutfallslega jafnmikið. Markmið verkefnisins var að kanna hvernig hægt er að vekja áhuga almennt á
tölvunarfræðináminu og á faginu.
Eftir viðræður við tvo námsráðgjafa, annars vegar framhaldsskóla og hins
vegar grunnskóla, var ákveðið að nálgast efnið með þeim hætti að gera
stutta könnun á meðal nemenda í efstu bekkjum grunnskóla.
Framkvæmd var könnun meðal grunnskólanema í tveimur skólum á
höfuðborgarsvæðinu þar sem þekking þeirra á starfi tölvunarfræðinga
var könnuð. Einnig var athugað hvaða ímynd krakkarnir hafa af tölvunar-
fræðingum. Skólarnir þar sem kannanirnar voru lagðar fyrir voru Hagaskóli
og Engjaskóli.
Staðan í grunn- og framhaldsskólum
Hvers vegna eru unglingar ekki að velja tölvunarfræði í háskólanámi? Af tali
okkar við námsráðgjafana þá komumst við að því að þeir telja að langflestir
sem koma í framhaldsskóla séu þegar búnir að ákveða hvað þeir ætla að
læra í háskóla. Kynningarefnið frá háskólunum inn í framhaldsskólana sé
góð leið til að kynna námið en betra væri að fara inn í gagnfræðaskólana og
kynna námið betur þar. Í kynningum þyrfti að koma fram hvað námið hefur
upp á að bjóða og hvaða námsgreinar nemendur þurfa að leggja áherslu á
í því námi sem þeir velja í háskóla. Nemendur gagnfræðaskólanna hafa t.d.
mikinn áhuga á tölvuleikjum, tónlist og kvikmyndum og með þeim hætti
væri hægt að vekja áhuga þeirra á þessari grein. Ein hugmynd gæti verið að
heimsækja hugbúnaðarfyrirtæki sem eru að framleiða tölvuleiki eins og CCP.
Eins væri hugmynd að senda nemendur í tölvunarfræði í gagnfræðaskólana
þar sem þeir myndu kynna hvað þeir væru að gera í sínu námi.
Könnunin – framkvæmd
Út frá viðtölum okkar við námsráðgjafana lögðum við fram könnun fyrir 126
nemendur í tveimur gagnfræðaskólum á höfuðborgarsvæðinu. Þetta var gert
til að fá hugmyndir um viðhorf krakka í gagnfræðaskólum til tölvunarfræði.
Könnunin var lögð fyrir vikuna 30. mars – 5. apríl 2009 og urðu Hagaskóli
og Engjaskóli fyrir valinu.
Könnunin innihélt 10 spurningar sem áttu að gefa niðurstöður um ímynd
krakkanna af tölvunarfræði og hvort þau vissu hvað tölvunarfræðingar gera.
Einnig var kannað hvort þau hefðu áhuga á að læra tölvunarfræði í háskóla.
Alls svöruðu 126 nemendur, eða 69 stúlkur og 57 strákar (sjá mynd 2).
Könnunin skiptist á milli bekkjadeilda og svöruðu 64 í 8. bekk, 41 í 9. bekk
og 22 í 10. bekk (sjá mynd 1).

Sigurður Örn Jónsson tölvunarfræðingur, Eyrún Ýr Guðmundsdóttir
tölvunarfræðinemi, Rúnar Grétarsson tölvunarfræðingur
Mynd 1: Hlutfall nemenda eftir
bekk
Mynd 2: Fjöldi nemenda eftir kyni