Skólavarðan - 01.12.2015, Qupperneq 4

4 DESEMBER 2015
Í tengslum við Alþjóðadag kennara, 5. október síðast-
liðinn, lét Kennarasambandið gera stutt myndband þar
sem nokkrir vegfarendur í Reykjavík nefndu uppáhalds-
kennarann sinn. Sjálfur tók ég viðtölin, sem varð til
þess að ég fór að hugsa hvað ég hefði sagt. Svarið kom
mér nokkuð á óvart – en allir sem ég hefði nefnt eru
karlmenn. Í grunnskóla var ég til dæmis þeirrar gæfu
aðnjótandi að sitja í tímum hjá þeim Sveini Herjólfs-
syni og Berki Vígþórssyni. Í framhaldsskóla voru
það Finnur N. Karlsson og Jón Ingi Sigbjörnsson
sem í minningunni reyndust mér betur en aðrir.
Ég var reyndar svo heppinn að njóta leiðsagnar
frábærra kennara af báðum kynjum í gegnum
mína skólagöngu. En fyrir ungan dreng í grunn-
skóla og síðar brothættan ungling í framhaldsskóla
skipti það afar miklu máli að hafa aðgang að þessum
sterku, rólegu, flottu og kláru körlum. Þessum frábæru
fyrirmyndum.
Því það er einmitt það sem börn og unglingar þurfa
– fyrirmyndir. Af báðum kynjum.
Um þetta held ég að allir séu sammála. Það vekur
því áhyggjur að þróunin í kennarastétt hefur verið
stöðug og viðvarandi í þá átt síðustu áratugi að konum
fjölgar á meðan körlunum fækkar. Í dag eru meira en
80% félagsmanna KÍ konur og hlutfall þeirra á eftir að
hækka enn frekar á næstu árum verði ekkert að gert.
Þetta sýna útreikningar Odds S. Jakobssonar, hag-
fræðings KÍ, sem fjallað er um hér í blaðinu. Við þessu
þarf að bregðast, ekki vegna þess að karlar séu betri
kennarar en konur, heldur vegna þess að í skólakerfinu
þurfum við jafnrétti alveg eins og annars staðar í
samfélaginu.
Íslendingar eru í dag afar meðvitaðir um mikilvægi
jafnréttis. Það er talað um mikilvægi þess að fjölga
konum í stjórnum fyrirtækja og stofnana. Það er talað
um að fjölmiðlar þurfi að passa að jafn margar konur
veljist sem viðmælendur og karlar. Það þurfi að fjölga
konum meðal verkfræðinga, tölvunarfræðinga, lögreglu-
þjóna og vörubílstjóra. Á sama tíma fer nánast engin
umræða fram um að fjölga þurfi körlum í hefðbundnum
kvennastörfum, svo sem kennslu, umönnunarstörfum
og annars staðar þar sem á þá hallar. Sem kemur á óvart
því við þurfum fjölbreytni og jafnrétti á öllum stöðum.
Ekki bara sums staðar.
Það má heldur ekki gleyma því að það hefur
áhrif þegar hópar fá á sig þann stimpil að þeir sinni
kvennastörfum. Þeir sem stjórnað hafa samfélaginu
síðustu áratugi og aldir, sem eru aðallega karlmenn,
hafa komist upp með að borga konum lægri laun fyrir
vinnuframlag sitt en körlum. Vegna þess fá þeir sem
vinna hefðbundin kvennastörf oftar en ekki lægri laun
en þeir sem vinna hefðbundin karlastörf. Konur fá síðan
í allt of mörgum tilfellum lægri laun en karlar sem vinna
nákvæmlega sömu vinnu, sem er algerlega óskiljanlegt.
Allt þetta þarf að laga en til þess duga engin
skammtíma- eða átaksverkefni. Það sem þarf til er
breytt hugarfar alls staðar í samfélaginu. Sú þróun þarf
að eiga sér stað jafnt og þétt yfir lengri tíma. Aðeins
þannig sköpum við raunverulegt jafnrétti og lögum um
leið einstaka skekkjur í samfélaginu. Ein þeirra er að allt
of fáir karlar velja í dag að verða kennarar. Á því þarf að
verða breyting sem fyrst.
Aðalbjörn
Sigurðsson
útgáfu- og
kynningarstjóri KÍ.
ÓHEILLAÞRÓUN
„Á sama tíma fer nánast
engin umræða fram um að
fjölga þurfi körlum í hefð-
bundnum kvennastörfum.“
LEIÐARI
Atlantsolía / Lónsbraut 2 / 220 Hafnarfjörður / Sími 591 3100 / www.atlantsolia.is
Birgðastöð
Hafnarfjarðarhöfn
Kaplakrika
Kópavogsbraut
Búðakór
BYKO Breidd
Bíldshöfða
Mosfellsbæ
Öskjuhlíð
Skeifunni
Skúlagötu
Hveragerði
Selfossi
Stykkishólmi Egilsstöðum
Mosfellsbæ
Borgarnesi
Akureyri
(Glerártorgi og
Baldursnesi)
Reykjanesbæ
7 KRÓNUR
Á ÞINNI STÖÐ
Með KÍ-dælulykli Atlantsolíu fá félagsmenn
7 kr. afslátt á öllum sjálfsafgreiðslustöðvum félagsins.
Á afmælisdegi dælulykilshafa veitir dælulykill 15 kr. afslátt.
Sæktu um lykil eða uppfærðu afsláttarkjörin á www.ki.is