Skólavarðan - 01.12.2015, Blaðsíða 28

28 DESEMBER 2015
sínum að leika saman, bjóða hver öðrum í
kaffi og skiptast á skoðunum. Allir á sínum
forsendum,“ segir Sara.
Hún kveðst alltaf hafa verið sannfærð
um að fjölmenningarhátíð myndi hafa
tilætlaðan árangur, svo lengi sem hún fengi
skólastjórnendur í hverfinu til liðs við sig
svo hægt yrði að virkja foreldra og börn frá
mismunandi löndum til þátttöku, en það
var ekki hlaupið að því í fyrstu. „Stærsta
áskorunin var að sannfæra allt þetta góða
fólk, þennan falda félagsauð sem ég kalla
svo, um að stökkva um borð og stíga út úr
þægindahringnum. Þessi faldi félagsauður
er hvorki fulltrúar í foreldrafélögum skól-
anna né mætir á fundi þeirra. Eina tengingin
mín við þau var í gegnum tómstundarstarf
og fataklefa skólanna þar sem börnin
þeirra eru með mínum börnum á þessum
tveimur skólastigum. Mesta vinnan fór í
að sannfæra fólk um að vera með og þetta
samtal var maður á mann í heita pottinum
í Breiðholtslauginni, á fótboltavelli ÍR og á
göngum skólanna. Hreinna grasrótarstarf
finnst ekki.“
Breiddu út faðminn og veggir féllu
Í aðdragandanum þurftu skipuleggjendur
hátíðarinnar að breiða út faðminn í átt að
þeim fjölmörgu erlendu þjóðarbrotum sem
búa í Neðra-Breiðholti. Marga þurfti að
sannfæra og þá voru góð ráð dýr. „Ég vissi
að um leið og ég hefði fundið tengilið inn í
hvert land fyrir sig, hópinn þaðan, þá myndi
þetta smella saman. Ég hvatti því þá sem ég
talaði við til að taka vini eða vinkonur með
á fundina, bæði til að fá stuðning hvert frá
öðru og til að virkja þeirra innra samfélag.
Ég spurði þau, hvað gerir ykkur stolt? Hvað
viljið þið að börnin mín læri af ykkur? Gólfið
var þeirra. Allt í einu voru yfir fjörutíu
manns komnir á fundi hjá okkur, allir
komnir um borð í þessa vegferð og farnir að
trúa á að þetta myndi ganga upp. Og þetta
gekk upp,“ segir Sara.
Hún segir að viðtökurnar hafi verið
ævintýri líkastar og skipuleggjendum
hátíðarinnar hafi borist fjölmargar þakkir
og hamingjuóskir, jafnt frá þeim sem
tóku þátt sem og öðrum íbúum hverfisins.
„Ég hef gert ýmislegt um ævina en önnur
eins viðbrögð hef ég sjaldan fengið frá
ókunnugu fólki. Það hefur stoppað mig og
manninn minn til að þakka fyrir daginn
á göngum Breiðholtsskóla, í fatahengi
leikskólans, í heita pottinum eða úti á
fótboltavelli.“
Sara er sannfærð um að fjölmenn-
ingarhátíðin í Neðra-Breiðholti sé komin
til að vera, enda sé brýn þörf fyrir hátíð af
þessu tagi. „Þörfin fyrir svona er svo miklu
meiri en mig óraði fyrir og styrkur þessarar
hugmyndar er að hún er fyrir staðbundinn
hóp af samfélagi. Nærsamfélagið er miklu
betra þýði en þegar þessi hátíð er haldin í
Ráðhúsi Reykjavíkur, því í nærsamfélaginu
hittast allir í hversdagsleikanum, í búðinni,
í tómstundum, á göngum skólans og í
fatahengi leikskólans.“
Til marks um það hversu vel hátíðin
hafi lukkast nefnir Sara stutta dæmisögu.
„Sem dæmi þá heyrði ég af einum þátt-
takanda sem stóð vaktina fyrir land sitt. Á
borðið hans kom maður og heilsaði. Í ljós
kom að þeir bjuggu í sama stigagangi. Þeir
höfðu oft hist en aldrei talað saman eða
boðið góðan daginn. Eftir hátíðina heilsast
þeir alltaf og spjalla saman ef svo liggur á.
Þessi stutta dæmisaga segir allt sem segja
þarf um þessa hátíð,“ segir Sara.
„Ég held að nærsamfélagið mitt sé
miklu ríkara, fordómalausara og betra en
það var fyrir 31. október 2015. Þennan
laugardag féllu veggir milli nágranna,
foreldra og barna í hverfinu og úr varð betra
samfélag í Bakka- og Stekkjahverfinu,“ segir
Sara að endingu.
Sara Björg Sigurðardóttir, aðalsprauta fjölmenningarhátíðarinnar, hæstánægð með hvernig til tókst.
Yngsti aldurshópurinn bauð upp á skemmtileg og þjóðleg dansatriði.
H
N
O
T
S
K
Ó
G
U
R
g
ra
fí
s
k
h
ö
n
n
u
n
Umsóknarfrestir 2016
Rannís auglýsir umsóknarfresti í menntahluta Erasmus+
Nám og þjálfun – umsóknarfrestur 2. febrúar 2016
Nám og þjálfun veitir starfsfólki menntastofnana og fyrirtækja á öllum skólastigum,
sem og nemendum í starfsmenntun og á háskólastigi, tækifæri til að sinna námi, starfsþjálfun
og kennslu í 33 Evrópulöndum.
Fjölþjóðleg samstarfsverkefni – umsóknarfrestur 31. mars 2016
Samstarfsverkefni eru 2-3 ára þematísk verkefni sem eiga að stuðla að nýsköpun í menntun
á öllum skólastigum og yfirfærslu þekkingar og reynslu á milli Evrópulanda
(minnst 3 samstarfslönd).
Sjá nánar á www.erasmusplus.is