Morgunblaðið - 27.07.2016, Blaðsíða 20

Morgunblaðið/Sigurður Ægisson
Safnari Siglfirðingurinn Ásta Henriksen hefur náð fjölda fallegra mynda af hjörtum í umhverfinu á gönguferðum sínum.
VIÐTAL
Sigurður Ægisson
sae@sae.is
Ásta Henriksen fæddist á Siglufirði
árið 1964 og ólst þar upp, fór eftir
skyldunám í Menntaskólann á Ak-
ureyri og þaðan svo í enn frekara
nám að honum loknum og hefur und-
anfarna tvo áratugi verið ensku-
kennari við Verzlunarskóla Íslands.
Þegar tækifæri gefast leggur hún
stund á göngur til að halda líkam-
anum í góðu formi og ekki síður þó til
að dreifa huganum frá ys og þys
hversdagsins. Þá er myndavélin
ómissandi förunautur og alltaf tilbú-
in, því Ásta á sér það einstaklega fal-
lega áhugamál að safna hjörtum úr
íslenskri náttúru.
„Þetta byrjaði fyrir um 10 árum,“
segir hún þegar blaðamaður sest nið-
ur með henni til að forvitnast um
þessa sérstæðu og heillandi tóm-
stundaiðju.
„Fyrsta hjartað sem ég tók myndir
af var í fjörunni í Héðinsfirði. Á þeim
tíma var ég ekkert að hugsa um það
neitt sérstaklega, heldur var þetta
bara þarna. En svo fór ég að labba
með gönguhópi árið 2009, Topp-
förum, og gekk með þeim á fjöll tölu-
vert mikið, einu sinni í viku, og oft
lengri ferðir um helgar, og þá fór ég
bara að sjá hjörtu út um allt. Þannig
að þetta var orðinn brandari í hópn-
um, að þegar ég lagðist á hnén til að
mynda, þá var spurt: Jæja, sástu nú
hjarta? En ég er ekkert að leita að
þeim, þau eru bara þarna.“
Á um 300 hjörtu
Ásta segist alltaf hafa tekið mikið
af landslagsmyndum, þessum hefð-
bundnu, með fjöllum, dölum, ám og
þess háttar, en eftir því sem vikur,
mánuðir og ár liðu fór hún líka út í ab-
strakt.
„Ég fór að reyna að ná áhugaverð-
um bútum út úr því sem fyrir augu
bar í víðáttunni, eltast við liti og mis-
munandi samsetningu þeirra, og held
að það hafi orðið til þess að ég fór að
sjá hjörtun, því þá skoðar maður
náttúruna í kringum sig dálítið öðru-
vísi en ella, því maður er þá jafnframt
að horfa niður fyrir tærnar á sér,
skoða náttúruna í nærmynd. Og ég
man að þegar ég setti myndir inn á
sameiginlega netsíðu hjá okkur í
hópnum að ég fékk gjarnan spurn-
inguna: Bíddu, varst þú í sömu ferð
og við?“ segir hún og hlær .
Hún kveðst eiga um 300 hjörtu og
vera rétt að byrja.
„Oft finnst mér þau blasa við,
hreinlega æpa á mig. Þau geta verið
steinar eða mynduð úr blómum, flétt-
um og skófum, hrími, klaka, leir,
mosa, snjó eða í raun hverju sem er.
Og þetta getur verið hvar sem er.
Einu sinni var ég að hoppa yfir læk
þegar ég sá allt í einu hjarta í honum
og stökk því yfir aftur til að mynda
það. Þetta eru allt hjörtu einhvers
staðar í náttúru Íslands, myndirnar
aðallega teknar í fjallgöngum en þó
líka öðrum göngum hér og þar. Um
þarsíðustu helgi gekk ég til dæmis
um Sogin á Reykjanesi, í námunda
við Keili, þetta er háhitasvæði, eins
og smækkaðar Landmannalaugar,
þar er mikil litadýrð og þar rakst ég á
hjartalaga leirhver.
Það er annars gengið allt árið, yfir
vetrarmánuðina oftast á fjöllin í
grennd við höfuðborgina, þannig að
akstur er innan við hálftíma, stundum
þó á Akrafjallið eða eitthvað svoleiðis,
það eru svona þessar vikulegu göng-
ur, en svo er farið einu sinni í mánuði
eitthvert lengra, mikið á Snæfells-
nesið og svo víðar um land. Og oftar
en ekki eru norðurljósin dansandi yf-
ir höfðum okkar.“
Ásta fór í sínar fyrstu fjallgöngur
ung að aldri og gekk á flest fjöll við
Siglufjörð á unglingsárunum. Hún
hefur tvisvar sinnum farið Glerár-
dalshringinn, sem er 24 tindar á 24
tímum.
Hvíld fyrir sálartetrið
„Ég er að sækja mér orku í þessari
útiveru og er í hálfgerðri leiðslu þeg-
ar ég er að ganga, er svo mikið að
njóta þess að vera þar sem ég er.
Það er svo gríðarlegt stress í hinu
daglega lífi manns, ég er á þönum,
gjarnan í kapphlaupi við klukkuna,
svo að ég fæ ofboðslega mikið út úr
því að vera úti í náttúrunni. Þetta er
ekki bara hreyfingin heldur líka feg-
urðin sem alls staðar blasir við
manni og sem maður tekur inn og
gerir manni gott. Þetta er hreinsun;
hvíld fyrir sálartetrið. Maður er
staddur þarna einhvers staðar í fal-
legu umhverfi, og á meðan eru
áhyggjur heimsins skildar eftir,
maður er bara í núinu, maður gleym-
ir sér í þessu flæði.“
Ásta kveðst eiga sér nokkur uppá-
halds hjörtu. Stundum sé það stað-
urinn sem geri það að verkum að
eitthvert hjarta sé í uppáhaldi eða
einhverjar aðstæður sem hún hafi
verið í þegar þau sáust, að þau allt í
einu hafi blasað við þar sem hún átti
engan veginn von á slíku. Þá sé þetta
enn ánægjulegra og eftirminnilegra.
„Það er svo mikil fegurð í þessu
smáa. Og það er svo mikilvægt að
gefa sér tíma til að njóta, en ekki
þjóta, þá opnast manni nýr heimur.
Ég gekk inn í einn slíkan þegar ég
fór að líta íslenska náttúru þeim aug-
um,“ segir hún og bætir við:
„Það skemmtilega við þetta allt
er, að þetta er smitandi, vegna þess
að nú eru fleiri í hópnum farnir að
sjá hjörtu og taka af þeim myndir.
Þetta er svo jákvætt tákn, og meira
en það, eitthvað sem hefur áhrif líka,
kærleikur og ást. Þetta er þéttur
hópur, góðir vinir og við eigum þetta
saman.“
Hafnarfjall Á milli körfuboltaleikja í Borgarnesi hjá syninum í
apríl 2014 fór Ásta í göngutúr og sá þá hjarta í klakaböndum.
Ljósmyndir/Ásta Henriksen
Kleifarvatn Á göngu sinni með Toppförum á sjö tinda í desem-
ber 2010 og kringum Kleifarvatn rakst Ásta á hrímaðan stein.
Hengillinn Á göngu með Toppförum á Hengilinn í j́úní 2012
rakst Ásta á þennan sérstaka stein á toppi Vörðu-Skeggja.
Héðinsfjörður Á ferð sinni í uppáhaldsfjörðinn, Héðinsfjörð,
náði Ásta þessari mynd árið 2012 af hjarta við mosavaxið lyng.
Reykjanes Á rölti um Sogin núna nýverið, ekki langt frá Keili,
sá Ásta þennan litla leirhver, þar sem hjartað sló ótt og títt.
„Svo mikil fegurð í þessu smáa“
 Ásta Henriksen safnar ljósmyndum af hjörtum í íslenskri náttúru  Á í kringum 300 hjörtu og er
rétt að byrja  Áhugamálið smitandi  Segir mikilvægt að gefa sér tíma til að njóta en ekki þjóta
20 FRÉTTIRInnlent
MORGUNBLAÐIÐ MIÐVIKUDAGUR 27. JÚLÍ 2016
Suðurhrauni 4, Garðabæ | Furuvellir 3, Akureyri | Sími 575 800 | samhentir.is
Heildarlausnir
í umbúðum og öðrum rekstrarvörum
fyrir sjó- og landvinnslu
◆ KASSAR
◆ ÖSKJUR
◆ ARKIR
◆ POKAR
◆ FILMUR
◆ VETLINGAR
◆ HANSKAR
◆ SKÓR
◆ STÍGVÉL
◆ HNÍFAR
◆ BRÝNI
◆ BAKKAR
◆ EINNOTA VÖRUR
◆ HREINGERNINGAVÖRUR
Allt á
einum
stað