Morgunblaðið - 05.04.2018, Side 42

42 FRÉTTIRErlent
MORGUNBLAÐIÐ FIMMTUDAGUR 5. APRÍL 2018
Guðmundur Sv. Hermennsson
gummi@mbl.is
Hvernig á að spila Evrópuleik í
knattspyrnu í brunagaddi?
Það kunna að vera ýmsar leiðir til
þess en ein er sú að verja jafnvirði
tuga milljarða króna til að byggja
leikvang sem hægt er að loka með
færanlegu þaki.
Þessa leið fóru rússneska fyrir-
tækið Gazprom og borgaryfirvöld í
St. Pétursborg til að tryggja að
knattspyrnuliðið Zenit gæti æft og
spilað við bestu aðstæður í borginni
allt árið um kring. Gazprom er eitt
stærsta fyrirtæki Rússlands og er
að meirihluta í eigu ríkisins og þótt
helsta viðfangsefni þess sé að vinna
og selja gas og olíu á það fjölda dótt-
urfyrirtækja sem síðan eiga m.a.
fjármálastofnanir, fjölmiðla og
íþróttafélög, þar á meðal Zenit.
Leikvangurinn, sem er á Krest-
ovskí-eyju í St. Pétursborg, er einn
sá glæsilegasti í öllu Rússlandi.
Hann er baðaður himinbláu ljósi,
einkennislit Zenit, og minnir helst á
risastóran fljúgandi disk sem svífur
yfir jörðinni. Leikvangurinn var tek-
inn í notkun haustið 2017 en fram-
kvæmdir við hann hófust árið 2006.
Upphaflega átti hann að kosta rúma
sex milljarða rúblna, jafnvirði rúm-
lega um 10 milljarða króna, en end-
anlegur reikningur er sagður hafa
verið um 47 milljarðar rúblna, jafn-
virði um 80 milljarða króna ef miðað
er við gengi sem íslenski Seðlabank-
inn skráir. Þegar allt er talið komast
67 þúsund áhorfendur fyrir á vell-
inum.
Mér bauðst að fara á leik Zenit og
Leipzig í Evrópudeildinni um miðjan
mars sl. Það verður leikið á þessum
velli í sumar þegar heimsmeistara-
mótið í knattspyrnu fer fram, bæði í
riðlakeppninni og í úrslitum. Ef
framkvæmd þessa leiks og aðbún-
aður á leikvanginum eru til marks
um hvað íslenska landsliðið og áhorf-
endur eiga í vændum í Rússlandi í
sumar geta þeir farið að hlakka til.
Raunar er hugsanlegt að íslenska
liðið spili í St. Pétursborg en þá þarf
það að komast í undanúrslit. Einnig
verður leikið um þriðja sætið á HM á
þessum velli.
Ströng gæsla
Það var ströng öryggisgæsla við
leikvanginn, sprengjuleitarhundar
voru við öllu búnir og starfsmenn
skoðuðu undir bíla með speglum.
Þegar inn var komið tók við enn
meiri öryggisgæsla og vopnaleit.
Þetta marskvöld var 10 stiga frost
úti en undir þakinu var vorhiti, 15
stig, og góð stemning. Það voru
44.092 áhorfendur á leiknum þetta
kvöld og um fjórðungur þeirra var á
öðrum enda áhorfendasvæðisins.
Þetta var vel þjálfaður hópur, sem
veifaði fánum, barði bumbur, hróp-
aði og dansaði í takt allan leikinn og
tók m.a. hálft víkingaklapp.
Aðrir áhorfendur, sem nánast allir
voru á bandi Zenit, voru hljóðlátari
og hegðuðu sér almennt vel vel. Að
vísu var litlum flugeldi skotið út á
völlinn í einni sókn Leipzig en eng-
inn virtist taka eftir því og leikurinn
hélt áfram eins og ekkert hefði
ískorist. Það hefur kannski haft sitt
að segja að það var algert áfengis-
bann inni í byggingunni, bjórinn sem
seldur var á börunum var 0,0%.
Leikurinn fór 1-1, heimaliðið hafði
tapað fyrri leiknum í Leipzig 1-2 og
þurfti því að vinna með meiri mun til
að komast í átta liða úrslit. En þótt
úrslitin væru heimamönnum ekki að
skapi hélt stuðningsmannahópurinn
samæfði dampi og hvatti sína menn
áfram þar til lokaflautan gall.
Morgunblaðið/GSH
Eins og geimskip Leikvangurinn í St. Pétursborg er tilkomumikill og glæsilegur enda kostaði hann sitt. Hann er baðaður bláu ljósi og virðist úr fjarlægð svífa í lausu lofti líkt og fljúgandi diskur.
Fótbolti í fljúgandi diski
 Splunkunýr yfirbyggður íþróttaleikvangur í St. Pétursborg verður einn af keppnisvöllunum
á HM í Rússlandi í sumar  Vel þjálfaðir stuðningsmenn setja svip sinn á rússneska fótboltaleiki
Áhyggjur Stuðningsmenn Zenit
áhyggjufullir undir lok leiksins.
Knattspyrnufélagið Zenit í St. Pét-
ursborg á sér langa sögu. Opinbert
stofnár er 1925 en hægt er að
rekja forsögu liðsins til ársins 1914.
Raunar mun fyrsti knattspyrnu-
leikurinn í Rússlandi hafa farið
fram í borginni árið 1897 milli
heimamanna og ensks áhuga-
mannaliðs, sem vann leikinn 6-0.
Rússneska stórfyrirtækið Gaz-
prom eignaðist ráðandi hlut í Zenit
árið 2005 og hefur síðan lagt því til
mikla fjármuni til að byggja leik-
vang, kaupa leikmenn og ráða
heimsþekkta þjálfara.
Zenit varð síðast rússneskur
meistari árið 2015 og bikarmeistari
2016. Núverandi þjálfari liðsins er
Ítalinn Roberto Manhini sem hefur
m.a. þjálfað ítalska landsliðið og
þekkt félagslið á borð við Man-
chester City á Englandi, Galatas-
aray í Tyrklandi og Inter Milan á
Ítalíu.
Líflegir Stuðningsmannnakjarni Zenit er vel þjálfaður og samhæfður hópur
og heldur uppi líflegri stemningu á leikjum liðsins með trumbum og fánum.
Knattspyrnufélag
á gömlum merg
EXPLORE WITHOUT LIMITS
®
ARCTIC TRUCKS ÍSLAND EHF.
KLETTHÁLSI 3
110 REYKJAVÍK
SÍMI: 540 4900
NETFANG: info@arctictrucks.is
www.arctictrucks.is
DEKKJAÞJÓNUSTA
TÍMABÓKANIR
Í SÍMA 540 4900
JEPPADEKK
fyrir íslenskar aðstæður
VÖNDUÐ OG HLJÓÐLÁT
DEKK UNDIR FLESTAR GERÐIR
JEPPA OG JEPPLINGA.