Morgunblaðið - 05.04.2018, Síða 52
MORGUNBLAÐIÐ FIMMTUDAGUR 5. APRÍL 2018
Bæjarlind 2, 201 Kópavogur | SÍMI 577-4700 | bilalindin.is
Svampþvottastöð
Afkastamikil sjálfvirk
þvottastöð sem getur þvegið
allt að 50 bíla á klukkustund.
Opið virka daga kl. 8 -19
helgar kl. 10 – 18.
Hafrannsóknastofnun leggur til að
heildaraflamark af grásleppu í ár
verði ekki meira en 5.487 tonn, en í
fyrra veiddust 4.542 tonn og 5.425
tonn á vertíðinni 2016. Síðustu tvö ár
hefur afli verið undir ráðgjöf.
Grásleppuveiðum er stýrt með
sóknartakmörkunum. Árin 2011 og
2012 voru veiðar leyfðar í 50 daga, 32
daga árin 2013-2016 og 46 daga í
fyrra, en þá var dögum fjölgað úr 36
er nokkuð var liðið á vertíð. Í ár var
lagt af stað með 20 daga, en ákvörðun
um endanlegan dagafjölda verður
tekin í framhaldi af þessari ráðgjöf.
Ráðgjöf um endanlegt heildarafla-
mark er byggð á stofnvísitölu úr
stofnmælingu botnfiska í mars 2018.
Þær niðurstöður liggja nú fyrir og
reyndist vísitalan vera 6,9 sem er
töluvert lægra gildi en mældist á
sama tíma í fyrra en þá var vísitalan
8,2.
„Stofnvísitala grásleppu hefur
sveiflast mikið milli ára og því er mik-
ilvægt að afli hvers árs taki mið af
stofnstærð sama árs, frekar en ársins
á undan. Hins vegar, vegna óvissu í
mælingunum, er tekið tillit til vísitölu
fyrra árs með vægi 30% á móti nýrri
mælingu með vægi 70% við útreikn-
ing ráðlagðs hámarksafla,“ segir í
ráðgjöf Hafrannsóknastofnunar.
Fjöldi báta sem taka þátt í veið-
unum er breytilegur frá ári til árs,
m.a. vegna aðstæðna á mörkuðum
grásleppuhrogna, og hefur það áhrif
á heildarafla. Á árunum 2005-2016
var fjöldi báta sem tóku þátt í veið-
unum á bilinu 144-369 á ári. Árið 2017
tóku 243 bátar þátt, sem var aukning
um fjóra báta frá fyrra ári.
Jafnframt leggur stofnunin til að
aukin áhersla verði lögð á skráningu
meðafla og eftirlit með brottkasti við
grásleppuveiðar. Stofnunin leggur til
að upphafsaflamark á næsta ári verði
1.557 tonn. aij@mbl.is
Stofn grásleppu
hefur gefið eftir
Stofnvísitala grásleppu
er um 16% lægri í ár en
hún mældist í fyrra.
Ákvörðun um dagafjölda
verður tekin á næstunni.
„Það er mesta furða hvað hægt hefur
verið að róa, alla vega miðað við veð-
urspána,“ sagði Jón Tómas Svansson,
útgerðarmaður og skipstjóri á Vopna-
firði, í gær um upphaf grásleppu-
vertíðar. Hann er með tvö grá-
sleppuleyfi og byrjaði vertíðina á
Sæborgu NS 40, en þegar dagafjölda
Sæborgar verður náð rær hann á Tóta
NS 36.
Á grásleppuvertíð rær Jón frá
Bakkafirði og kaupir HB Grandi grá-
sleppuna heila. Hún er skorin og
hrognin söltuð á Vopnafirði, en síðan
fullunnin á Akranesi. Hveljan hefur
einkum verið seld til Kína. Vertíð
mátti byrja 20. mars og hefur Jón náð
sjö túrum til þessa. Suma daga hefur
verið sótt í leiðindaveðri. Hvorki var
róið í gær né í fyrradag og honum leist
ekki vel á daginn í dag. Hann er kom-
inn með um 12 tonn af grásleppu og
hefur mest fengið 2,3 tonn í róðri.
Loðna enn í þorskinum
Spurður hvort ekki fáist þokkalegt
verð fyrir grásleppuna í ár, segir Jón
svo alls ekki vera. „Núna er talað um
190 krónur á kílóið og það er skárra
heldur en í upphafi vertíðar í fyrra, en
verðið hækkaði síðan er leið á. Ef við
skoðum hins vegar málið nokkur ár til
baka og reiknum út frá nýtingu á grá-
sleppunni þegar menn skáru hana
sjálfir ætti verðið að vera í 300-330
krónum,“ segir Jón. Hann bætir því
við að það hafi verið vond ákvörðun að
fjölga dögum á síðasta ári þegar tals-
vert var liðið á vertíðina.
Jón segir athyglisvert að stór þorsk-
ur sé á grásleppuslóðinni. Í honum sé
loðna og hún hafi verið víða fyrir Norð-
urlandi í vetur. „Loðnan er alveg hætt
að fara fulla sprautu suður fyrir land,
sem er í raun jákvætt því það er þá alla
vega fæða fyrir þorsk á norðursvæð-
inu í lengri tíma.“
Er líður á apríl fer Jón að svipast
um eftir hákarli, en hann rekur fyrir-
tækið Íslandshákarl á Vopnafirði. Í
fyrra veiddi hann 22 hákarla frá maí
og fram eftir júlímánuði og verkar
aflann sjálfur. Vegna rigninga gekk
verkunin hins vegar illa hjá Jóni, eins
og fleirum á norðausturhorninu og
Norðurlandi. Í gær var Jón að verka
sel sem honum áskotnaðist og segir
selinn vera gæðabeitu á hákarlalínuna.
Þurfum að hafa okkur alla við
„Ætli ég verði ekki að gaufa eitt-
hvað á hákarli fram eftir sumri á Sæ-
borgu, en Tótinn fer á strandveiðar.
Við kvótalausu karlarnir þurfum að
hafa okkur alla við að synda því stjórn-
völd vinna skipulega að því að drepa
okkur niður,“ segir Jón Tómas Svans-
son, trillukarl á Vopnafirði. aij@mbl.is
Á Vopnafirði Hákarl þrifinn við
löndun, en þessi gæti hafa verið um
eitt tonn þegar hann veiddist.
Fyrst grásleppu-
vertíð, síðan hákarl
og strandveiðar
Eitt tekur við af öðru hjá
Jóni Tómasi Svanssyni,
trillukarli á Vopnafirði.
Ágúst Ingi Jónsson
aij@mbl.is
Norðmenn tóku formlega við nýju
rannsóknaskipi í síðustu viku. Skipið
ber nafnið Krónprins Hákon og
helstu verkefni þess verða fjölþættar
rannsóknir í Norðurhöfum og við
Suðurskautslandið. Skipið er þó ekki
endanlega tilbúið, en reiknað er með
að það fari í sinn fyrsta leiðangur í
júní í sumar.
Skipið er smíðað í ítölsku skipa-
smíðastöðvarinnar Fincantieri og
kom til Noregs frá Ítalíu á nýársdag.
Þá stóð til að Ítalirnir myndu ljúka
verkefnum um borð í skipinu, en í síð-
ustu viku var ákveðið að Norðmenn
myndu taka við skipinu og ljúka því
sem út af stendur.
Til þeirra verka halda þeir eftir
tæplega þremur milljörðum ísl. króna
eða 25 milljónum evra af samnings-
upphæðinni. Áætlað verð fyrir skipið
var 1,4 milljarðar norskra króna, að
því er fram hefur komið í Fiskaren,
sem nemur hátt í 18 milljörðum ís-
lenskra króna. Skipið átti upphaflega
að vera tilbúið sumarið 2016, en af-
hendingu þess hefur ítrekað seinkað.
Rannsóknir í Norðurhöfum
og við Suðurskautslandið
Skipið ber nafnið Krónprins Há-
kon og helstu verkefni þess verða
rannsóknir í Norðurhöfum og við
Suðurskautslandið. Skipið er 100
metra langt, sérstaklega styrkt til
siglinga í hafís og verður meðal full-
komnustu rannsóknaskipa. Sextán
manns verða í áhöfn og tveir tækni-
menn, en að auki er pláss fyrir 37 vís-
indamenn um borð og þar eru 14
rannsóknastofur.
Skipið verður afhent norsku heim-
skautastofnuninni (Norsk Polar-
institutt) þegar það verður tilbúið, en
verður rekið af Norsku hafrann-
sóknastofnunni sem fær 20% af rann-
sóknatíma skipsins. Helsti notandi
skipsins verður Háskólinn í Tromsö.
Fyrsti rannsóknaleiðangur er
skipulagður í sumar, en á verkefna-
skránni í ár eru meðal annars þrír
lengri leiðangrar á vegum verkefn-
isins „Arfurinn eftir Nansen“ með að-
komu tíu rannsóknastofnana. Þá er á
döfinni 140 daga leiðangur til Suð-
urskautslandsins, þar sem á meðal
annars að gera rannsóknir á átu.
Styttist í að krónprins-
inn hefji rannsóknir
Ljósmynd/Øystein Mikelborg/Norsk Polarinstitutt
Fullkomið Nýja skipið kom til Noregs frá Ítalíu um áramótin, en nokkrar tafir hafa orðið á afhendingu skipsins.
Stórhugur einkennir nýtt norskt rannsóknaskip, en á ýmsu hefur gengið á
byggingartímanum. Nú er reiknað með að þetta tæplega 18 milljarða skip haldi
til hafs í byrjun júní. Verkefnin verða í Norðurhöfum og við Suðurskautslandið.