Gerðir kirkjuþings - 01.01.2017, Qupperneq 77

77
4. og 15. mál kirkjuþings 2017
voru sameinuð og afgreidd með eftirfarandi þingsályktun:
Ályktun
um frumvarp til laga um þjóðkirkjuna (4. mál) og
frumvarp til laga um úrskurðarnefnd þjóðkirkjunnar (15. mál).
Kirkjuþing 2017 samþykkir eftirfarandi ályktun vegna frumvarps til laga um þjóðkirkjuna
(4. mál) og frumvarps til laga um úrskurðarnefnd þjóðkirkjunnar (15. mál).
Síðastliðin tíu ár hefur kirkjuþing unnið að samningu frumvarps til nýrra þjóðkirkjulaga
er koma skyldu í stað laga um stöðu, stjórn og starfshætti þjóðkirkjunnar nr. 78/1997.
Mikill þungi hefur verið í starfinu á síðustu missirum eftir að löggjafarnefnd kirkjuþings
tók við þessari vinnu. Störfum nefndarinnar er nú svo komið að góður samhljómur er
með fulltrúum kirkjuþings um meginatriði frumvarpsins.
Kirkjuþing 2017 lítur svo á að nú sé tímabært fyrir þjóðkirkjuna að fá frekari upplýsingar
frá ríkisvaldinu um þær viðræður sem ríkið óskaði eftir við kirkjuna um fjárhagsleg
samskipti íslenska ríkisins og íslensku þjóðkirkjunnar. Í því skyni fól kirkjuþing 2015
sérstakri nefnd að annast viðræður af kirkjunnar hálfu við ríkisvaldið um þessi málefni.
Kirkjuþing 2017 ályktar, í ljósi þess sem að framan greinir, að beina því til ríkisvaldsins
að ofangreindar viðræður verði leiddar til lykta sem fyrst svo kirkjuþing fái betri yfirsýn
um þessi mál. Að þeim viðræðum loknum mun kirkjuþing gera tillögu að frumvarpi til
nýrra þjóðkirkjulaga svo leggja megi það fyrir dómsmálaráðherra.
Þá vill kirkjuþing 2017 beina því til dómsmálaráðherra að hann heimili starfsfólki sínu
og kirkjuþings að fjalla um fyrirliggjandi drög að frumvarpi til þjóðkirkjulaga. Ástæðan er
sú að í þessum drögum er gert ráð fyrir að ákvæði núgildandi laga um úrskurðarnefnd - er
varða ágreining á kirkjulegum vettvangi - verði færð í sérstakt frumvarp um úrskurðarnefnd
þjóðkirkjunnar, en þar yrði nefndarskipan og úrræði nefndarinnar með öðrum hætti en
nú.