Skessuhorn - 15.03.2017, Blaðsíða 12

MIÐVIKUDAGUR 15. MARS 201712
Um þessar mundir er unnið hörð-
um höndum að því að breyta gamla
Húsmæðraskólanum á Varmalandi í
hótel sem áætlað er að opnað verði
í sumar. Skessuhorn var á ferðinni í
Borgarfirði á dögunum og ræddi við
Bjarna Þór Ólafsson, verkefnis- og
byggingarstjóra og Hauk Birgisson,
rekstrarstjóra Hótels Varmalands,
um framkvæmdina. „Hér er verið
að breyta gömlu skólabyggingunni í
60 herbergja hótel. Fyrst og fremst
er verið að vinna í húsinu að innan.
Haldið verður í gamlan stíl hússins
og útlit þess að utan verður meira og
minna alveg eins og Guðjón Samú-
elsson teiknaði það á sínum tíma.
Vinnan felst því fyrst og fremst í því
að brjóta niður veggi, styrkja gólf
og smíða ný herbergi auk þess sem
töluvert mikið hefur þurft að saga
vegna þess að verið er að skipta um
allar lagnir, bæði raflagnir og pípu-
lagnir. Þá verður sett lyfta í húsið,
eitthvað sem var ekki fyrir og er það
töluverð framkvæmd,“ segir Bjarni.
„Eins og alltaf þegar verið er
að breyta gömlum húsum þá reka
menn sig á eitthvað óvænt. Lítið
er til af teikningum. Við höfum til
dæmis lent í því að vera byrjaðir að
saga fyrir nýjum hurðum að her-
bergjum að lent þá inn í gömlum
hurðargötum sem einhvern tímann
var lokað, en aldrei gerð teikning af
breytingunni. Sömuleiðis var lítið
vitað um ástand lagna. Þess vegna
töldum við vænlegast að skipta ein-
faldlega um allar lagnir,“ bætir hann
við. Til þess að koma nýjum lögn-
um fyrir hefur mikið þurft að saga
úr gólfinu á jarðhæð hússins. Steyp-
unni er síðan mokað með gröfu af
smæstu gerð upp á skúffu á annarri
lítill vél og síðan ekið út. „Vélarnar
eru mjög litlar en þær þurfa hrein-
lega að geta ekið í gegnum hurð-
arop. Þess vegna er þetta seinlegt
verk en það er ekki hægt að gera
þetta öðruvísi,“ segir Bjarni.
Heimamenn koma
sterkir inn
Um þessar mundir eru um 20 menn
að störfum að Varmalandi. „En
þeim hefur farið fjölgandi undan-
farið og mun fjölga enn frekar. Mik-
ið til eru þetta iðnaðarmenn úr ná-
grenninu, enda marga góða slíka að
finna hér í kring,“ segir Bjarni. „Það
er mikilvægt að vinna svona verkefni
í sátt við íbúa í sveitinni. Fá til liðs
við sig þá góðu iðnaðarmenn sem
eru hér í nágrenninu og halda fram-
kvæmdasvæðinu snyrtilegu,“ bætir
Haukur við.
Sagan í hávegum höfð
Bjarni og Haukur segja að við hönn-
un hótelsins hafi verið ákveðið að
tengja sögu hússins við væntanlegt
hótel. „Herbergin munu til dæm-
is heita eftir bæjarnöfnum úr ná-
grenninu og þá munu stærri her-
bergin heita eftir þeim skólastýr-
um sem voru hér á sínum tíma. Þá
höfum við hugsað okkur að hafa
til sýnis ýmsa muni sem hér eru til
og tengjast sögu skólans, til dæm-
is þvottarullur og -rúllur,“ segir
Bjarni. „En þema hótelsins verð-
ur hraunið. Hönnun gerir til dæmis
ráð fyrir því að í loftinu á herbergj-
um verði innfelling með svartri línu
og „hraunflæði“ í gegnum allt hús-
ið,“ segir Haukur. „Utandyra verður
lagt upp með mjög látlausa lýsingu.
Það verður sem sagt ekki uppýst og
á ekki að vera of áberandi heldur
falla inn í þetta fallega umhverfi hér
á Varmalandi. Hófleg lýsing gerir
gestum líka kleift að upplifa norður-
ljósin með auðveldum hætti,“ bætir
hann við.
Aðgengi fyrir alla
Á jarðhæð verður bar, móttaka og
salur og þaðan verður gengt út á
útisvæðið á bakvið húsið. Herberg-
in verða þrenns konar; hefðbund-
in twin-herbergi, fjölskylduher-
bergi ætluð hjónum með tvö börn
og síðan nokkur stærri deluxe her-
bergi fyrir einstaklinga eða pör.
„Hér verða sex herbergi með að-
gengi fyrir fatlaða. Í þeim er aðeins
rýmri inngangur og baðherbergi,
svo hægt sé að snúa við og athafna
sig í hjólastól,“ segir Bjarni. „Svona
eiga hlutirnir bara að vera, það eiga
allir að hafa jafnan aðgang að hót-
elinu. Þess vegna erum við líka að
bæta við lyftu. Það er ekki hægt að
bjóða fólki í hjólastól upp á það árið
2017 að vera búið að tékka sig inn á
hótel og svo bara „úps, stigi“ og það
kemst ekki svo glatt upp á herbergi.
Það þarf að vera aðgengi fyrir alla
svo allir upplifi sig velkomna,“ bæt-
ir hann við.
Skipulag svæðisins í auglýsingu
Aðalskipulagsbreyting og deili-
skipulag fyrir Varmaland er um
þessar mundir í formlegu auglýsing-
arferli. Áður var ekki til deiliskipu-
lag fyrir svæðið, en á þeirri tillögu
sem er í auglýsingu núna er gert
ráð fyrir viðbyggingu vegna hót-
elsins. Mun í henni verða móttaka
og salur. „Þegar farið var að kanna
hvernig best væri að nýta húsið sem
hótel þá fannst mönnum strax að
það kallaði á sal, sem væri hægt að
nýta sem matsal og morgunverð-
arsal og eins móttöku. Þannig sal
hafði húsið ekki. Því var farið í það
að hanna viðbyggingu,“ segir Hauk-
ur. Þar sem ekkert deiliskipulag er
í gildi á Varmalandi eru verktökum
hins vegar sniðnar ákveðnar skorð-
ur. „Við förum auðvitað ekki í fram-
kvæmdir að utan á meðan svæðið er
ekki skipulagt,“ segir Bjarni. „En við
vonumst bara til að skipulagsferlið
gangi snurðulaust fyrir sig og við
getum hafið framkvæmdir að utan
sem fyrst,“ bætir hann við.
Sænskir bakhjarlar
Sænska ferðaskrifstofan Vulkanresor
stendur að stærstum hluta að baki
framkvæmdinni. „Það er fyrirtæki
með áratugareynslu í ferðaþjónustu.
Til dæmis skipuleggur ferðaskrif-
stofan ferðir til Íslands fyrir milli tíu
og tólf þúsund skandínavíska ferða-
menn árlega. Forsvarsmenn þessa
fyrirtækis sjá hér á Varmalandi tæki-
færi til að vera með spennandi og
notalegan gististað sem hluta af sín-
um ferðum,“ segir Haukur. „Stað-
setningin er góð og eitt af því sem
þessir aðilar horfa til. Hér er margt
að skoða í kring og spennandi af-
þreyingarmöguleikar, til dæmis
Víðgelmir, Ísgöngin í Langjökli og
Hraunfossar svo aðeins örfáir stað-
ir séu nefndir,“ segir hann, en bætir
því við að Hótel Varmaland sé vit-
anlega ekki aðeins ætlað viðskipta-
vinum Vulkanresor. „Hótelið er að
sjálfsögðu hugsað fyrir alla mark-
hópa, ekki aðeins þá sem ferðast
með Vulkan og ekki aðeins erlenda
ferðamenn heldur líka Íslendinga.
Innlendi markhópurinn er mjög
spennandi að mörgu leyti og gæti
orðið alveg jafn spennandi að þróa
hann og erlenda markhópinn. Þar
kemur saga hússins aftur mjög sterk
inn,“ segir Haukur.
Stefnt að opnun í sumar
En hvenær stendur til að opna hót-
elið á Varmalandi? „Við stefnum að
því að reyna að opna um mitt sum-
ar,“ segja Bjarni og Haukur. „En við
erum ekki með fasta dagsetningu
sem við vinnum út frá. Það er svo-
lítið erfitt að segja til um það fyrr
en skipulagsferlinu er lokið því fyrr
getum við ekki farið í framkvæmd-
ir að utan. Við getum betur sagt til
um mögulegan opnunardag seinna
í vor þegar því ferli er lokið,“ seg-
ir Bjarni. „En við erum bara bjart-
sýnir á að það gangi allt saman vel
og keyrum framkvæmdir innanhúss
áfram á meðan, vinnum dag frá degi
með þeim góðu mönnum sem við
höfum fengið í verkið. Þegar búið
verður að opna erum við sömuleið-
is bjartsýnir á að reksturinn gangi
vel. Þetta hótel mun hafa alla burði
til að verða eftirsótt og gott hótel,
á góðum stað í fallegu umhverfi þar
sem komið verður til móts við þarfir
gestanna í einu og öllu,“ segja Bjarni
og Haukur að lokum.
kgk
Húsmæðraskólinn á Varmalandi verður hótel
- breytingar á gamla skólahúsinu í fullum gangi og þar verður 60 herbergja hótel
Gamla húsmæðraskólahúsið á Varmalandi, séð frá veginum.
Bjarni Þór Ólafsson, verkefnis- og byggingarstjóri.
Það er ekki á hverjum degi sem gröfur sjást innandyra. Marga veggi hefur þurft að
brjóta niður og saga í gólfið til að geta skipt um lagnir í húsinu. Steypunni þarf að
koma út og þá þurfa tækin að vera lítil og lipur og helst að vera hægt að aka þeim
í gegnum hurðarop.
Hnulli smiður og Jan pípari voru glaðbeittir þegar Skessuhorn bar að garði.
Framkvæmdir í fullum gangi.