SSFblaðið - des. 2015, Blaðsíða 16

16
Þá var því brotið blað á ný þegar Anna G. Ívarsdóttir var kosin
formaður á 37. þingi SÍB í apríl árið 1991. Hún var áður kjörin í
stjórn sambandsins árið 1987 og hafði gegnt varaformennsku frá
árinu 1989.
Fjöldauppsögnum mótmælt
Þótt ekki hafi verið gripið til beinna uppsagna við samruna
bankanna fjögurra árið 1990 þrengdi sú ráðstöfun mjög að
bankafólki með óbeinum hætti. Smám saman jukust kröfur um
sparnað í ríkisbönkunum. Starfsöryggi bankastarfsmanna hefur farið
minnkandi og nokkrir bankar hafa sagt upp starfsmönnum. Mestu
fjöldauppsagnir urðu hjá Landsbankanum vorið 1993.
SÍB mótmælti uppsögnum í Landsbankanum sem ólögmætum og
siðlausum og aflaði sér jafnframt verkfallsheimildar. Þá var boðað til
útifundar á Lækjartorgi 27. maí og komu þangað um tvö þúsund
bankamenn og sýndu samstöðu í þrengingum.
38. þing SÍB var haldið á Selfossi þetta heita vor og var atvinnuleysið
helsta umfjöllunarefni þingsins. Þar var m.a. sýnt fram á að útlánatöp
síðustu ára væru meginástæður fyrir rekstrarvanda bankanna fremur
en launakostnaður. Frá því uppstokkunin í bankakerfinu hófst í lok
níunda áratugarins hefur bankamönnum fækkað um fimmtung.
Aðild að Atvinnuleysistryggingasjóði
Bankarnir höfðu sjálfir greitt bankamönnum bætur í atvinnuleysinu
þar sem þeir áttu ekki aðild að Atvinnuleysistryggingasjóði. Á því varð
breyting þegar Samband viðskiptabanka ákvað að hætta greiðslu
bóta 1. júlí 1993 í kjölfar nýrra laga er kváðu á um fulla aðild þess
að sjóðnum. Því sótti SÍB um aðild að Atvinnuleysistryggingasjóði
og fékk jákvætt svar skömmu síðar. 1. október 1993 fengu 89
bankamenn greiðslur úr sjóðnum. Þessi tala fór yfir 100 á árinu
1994 og jafngildir það rösklega þremur af hundraði félagsmanna SÍB.
SÍB tekur við rekstri Bankamannaskólans
Í tengslum við nýjan kjarasamning í ársbyrjun 1994 var gert
samkomulag um að SÍB tæki að sér rekstur Bankamannaskólans,
fræðslumiðstöðvar bankamanna, sem sjálfstæðrar stofnunar.
Jafnframt flutti SÍB skrifstofur sínar í rúmgott húsnæði í sambýli
við skólann að Snorrabraut 29 í Reykjavík.
Þegar hér er komið við sögu hafði Bankamannaskólinn nær lognast
út af og engin hefðbundin fræðsla verið
í skólanum veturinn 1993-1994. Segir í
SÍB tíðindum í janúar 1994 á þessa leið:
„Ekki er gert ráð fyrir að við skólann
starfi skólastjóri heldur að fræðslunefnd
beri ábyrgð á skipulagi og framkvæmd
fræðslunnar. SÍB yfirtekur reksturinn
og ræður starfsmann til skólans.
Samningurinn er til þriggja ára og
verður þá endurskoðaður ef aðilar óska
þess. Það er von samninganefndar
að þessi tími nýtist til þess að hefja
Bankamannaskólann aftur til vegs og virðingar.“
Á afmælisári SÍB árið 1995 hljóta allir bankamenn að geta tekið
undir þessar vonir því oft var þörf en nú nauðsyn á að efla og styrkja
menntun íslenskra bankamanna.
SÍB 60 ára – sterkari samtök
Þessar stiklur úr fyrstu 60 árum úr sögu Sambands íslenskra
bankamanna sýna, svo ekki verður um villst að sambandið þróaðist
smám saman úr laustengdu bandalagi starfsmannafélaga tveggja
ríkisbanka yfir í öflug stéttarsamtök allra íslenskra starfsmanna
fjármálafyrirtækja.
Aðildarfélög SÍB voru 19 talsins á afmælisárinu 1995. Félag
starfsmanna Landsbanka Íslands og starfsmannafélög Búnaðarbankans,
Byggðarstofnunar, Eyrasparisjóðs, Iðnlánasjóðs, Lánasýslu ríkisins,
Íslandsbanka, Reiknistofu bankanna, Seðlabankans, VISA-Ísland og
Þjóðhagsstofnunar auk starfsmannafélaga sparisjóða Hafnarfjarðar,
Kópavogs, Mýrarsýslu, Svarfdæla, Vestmannaeyja og Sparisjóðsins í
Keflavík, Sparisjóðs Reykjavíkur og nágrennis og Sparisjóðs vélstjóra.
Heimild: Bankamenn í sextíu ár. Stiklur úr sögu Sambands íslenskra bankamanna.
Valþór Hlöðversson – Athygli, tók saman. Prentun; Oddi. Samband íslenskra
bankamanna, 1995.