SSFblaðið - des. 2015, Blaðsíða 21

21
Sauðárkróki. „Starfsumhverfið var skemmtilegt og krefjandi. Þetta
var tiltölulega nýtt fyrir mér, þarna ríkti mikil óvissa í rauninni og
rennt mjög blint í sjóinn, þar sem takmörkuð þekking flutti með
stofnuninni. Hver dagur var ævintýri út af fyrir sig. Við byrjuðum á
því að taka upp úr kössum sem aðrir höfði pakkað ofan í og reyndum
að koma skipulagi á hlutina. Við fengum sem betur fer smá aðstoð
í upphafi frá fráfarandi starfsfólki sem kom norður og leiðbeindi
okkur, það var auðvitað nauðsynlegt. Þetta var mjög erfiður tími
fyrst um sinn, við unnum frá morgni til kvölds við að standsetja
og hvert skref var mikilvægt. Þegar ég lít til baka þá tókst okkur
ótrúlega vel að byggja upp stofnunina á nýjum stað með nýju fólki.
Það tók um tvö ár að koma þessu í rétt horf, læra og tileinka sér ný
vinnubrögð og koma öllu skipulagi og öllum verkferlum á réttan stað.
byggðasToFnun
Lovísa starfaði hjá Byggðastofnun frá árinu 2001 og fram til síðustu
áramóta, 2014/2015. Á þeim tímapunkti var hún eini starfsmaðurinn
sem hafði unnið hjá Byggðastofnun fyrir sameiningu stofnunarinnar.
„Byggðastofnun hefur breyst gríðarlega á þessum tíma“ segir Lovísa.
„Ekki síst á undanförnum árum, eftir að stofnunin varð sjálfstæðari.
Ég hafði um tíma á tilfinningunni að stofnunin væri háð, að vissu
leyti, pólitískum gæluverkefnum. En í dag er það mitt mat að
hún er orðin sjálfstæðari, gagnsæ og mjög fagleg í vinnubrögðum,
verkefnum og ákvarðanatökum. Auðvitað breyttist stofnunin alltaf
að eitthverju leyti með nýjum stjórnarformönnum.“
Hún segir að tímabilið hjá Byggðastofnun hafi verið frábær
tími. „Þetta er mjög góður vinnustaður og ég er gríðarlega stolt
af stofnuninni og þeim breytingum sem hún hefur tekið. Þetta er
gríðarlega þéttur hópur starfsfólks og hópurinn hefur haldist mjög
vel, nánast engin starfsmannavelta sem auðveldar alla teymisvinnu
sem er þónokkur. Þetta eru svo fjölbreytt verkefni sem stofnunin
vinnur að og allt mjög spennandi verkefni. Það gerir vinnustaðinn
svo heillandi.“
ákveðin í að hæTTa
„Ég hef alltaf verið ákveðin í að hætta 67 ára“ segir Lovísa. „Ég sé
ekki eftir því að hafa hætt á þessum
aldri, ég hef nóg fyrir stafni og ég kveið
aldrei því að hætta að vinna. Maður á
ekki að vera að hanga á eitthverjum
vinnustað þangað til maður verður fyrir.
Það er ekki mjög spennandi þegar fólk
fer að hugsa, ætlar kerlingin ekkert að
fara að koma sér héðan út“ segir Lovísa
hlæjandi og bætir því við að hún voni
að það hafi ekki verið tilfellið hjá sér,
„ég varð allavega ekki vör við það, nema
þá að allir hafi verið svona hógværir“.
„Svo eru allir að spyrja, og hvað ertu
svo að gera, hvað gerir þú á daginn og
þar fram eftir götunum. Nú, ég segi
auðvitað, að ég sé að hvíla mig, loksins,
eftir ævistarfið, njóta lífsins og nú geri
ég það sem mig langar til að gera þegar
mig langar til að gera það. Ég er ekkert
að eltast við nein áhugamál, ég sækist
sko ekkert í hluti þar sem ég þarf að vera eitthversstaðar á ákveðnum
tímapunkti. Ég er frjáls og geri það sem ég vil þegar ég vil“. Lovísa
segist þó vera orðin föst á Króknum þrátt fyrir að vera aðflutt og
sér fyrir sér að vera þar áfram, þrátt fyrir að synir hennar, sem eru
orðnir fullorðnir, séu fyrir sunnan.
Hún segir að fólk á sínum aldri sé óþarflega kvíðið því að hætta
að vinna. „Það eru alltaf einhverjir sem eru kvíðnir fyrir öllum
breytingum en lífið er kaflaskipt og það er ekki til neins að vera
kvíðinn breytingum í lífinu. Það á ekki að vera að mikla fyrir sér
breytingar eins og mér finnst fólk almennt gera of mikið. Þetta er
ekkert til þess að kvíða fyrir, það er svo margt sem lífið hefur upp
á að bjóða fyrir fólk á öllum aldri.“
ssF
Aðspurð um stéttarfélagið sitt segist hún ánægð með alla þá þjónustu
sem hún hefur fengið í gegnum tíðina hjá SSF. Að hennar mati hefur á
undanförnum árum „verið erfitt að vera fjármálastarfsmaður, einkum
eftir fjármálakreppuna, erfiðara, eflaust, fyrir starfsfólk bankanna
og erfiðara en fólk gerir sér almennt grein fyrir. Ég þekki margt fólk
sem hefur hætt á undanförnum árum og það hefur talað um það að
það gerði sér ekki almennilega grein fyrir því hversu erfitt þetta var
fyrr en það var komið annað, vegna áreitisins, innan og utan vinnu
og ég óttast að það sé ekki búið ennþá“ segir Lovísa.
Hún telur að stytting vinnuvikunnar og aukin vetrarfrí ættu
að vera helstu baráttumál SSF á næstu árum. Hún segir að innan
fjármálageirans sé mikið af ungu fjölskyldufólki sem þarf á vetrarfríum
að halda vegna uppeldisins og aukinnar áherslu á samverustundir
fjölskyldunnar. Starfsdagar grunn- og leikskóla leggja einnig
aukinn þunga á þetta baráttumál að mínu mati.
Hún telur að SSF ætti að vera leiðandi í umræðum um
vinnumarkaðinn, styttingu vinnuvikunnar, starfsumhverfi,
fjölskylduvænni vinnustaði o.s.frv. „Með því er ég ekki að gagnrýna
SSF í dag, að mörgu leyti hefur SSF verið leiðandi í gegnum tíðina
en við gætum verið sýnilegri“ segir Lovísa.