SSFblaðið - des. 2015, Blaðsíða 30

30
það að haFa öFlugT sTarFsmannaFélag FinnsT mér
vera gæðasTimpill Fyrir FyrirTæki og gera FyrirTæki
eFTirsóknarverðari sem vinnusTað. En til að geta rekið
öflugt starfsmannafélag þarf skilning og vilja þeirra sem
stjórna fyrirtækinu. Ég er svo lánssöm að vinna í Arion
banka þar sem þessi skilningur er til staðar. Stjórnendur
skilja mikilvægi öflugrar liðsheildar. En til að reka öflugt
félagsstarf þarf fjármagn. Það að fyrirtæki styðji við starf-
semi starfsmannafélaga er fjárfesting sem skilar sér beint
í ánægðari starfsmanni.
Ég hef í mörg ár starfað í Ferðanefnd Skjaldar. Ferða-
nefndin skipuleggur gönguferðir af öllum toga allt frá stuttum hella-
ferðum til krefjandi fjallganga og jöklaferða. Dagsferðir, trússaðar gön-
guferðir, stuttar ferðir í nágrenni höfuðborgarinnar, enn styttri ferðir
innan borgarmarkanna og margt fleira. Við höfum leitast við að hafa
verkefnin sem fjölbreyttust til að sem flestir geti notið og tekið þátt. Það
þarf ekki að fjölyrða um hversu gott og heilsusamlegt það er að vera úti í
náttúrunni, hvað það gefur manni mikla gleði og ánægju að takast á við
landslag, veður, óvæntar aðstæður og svo mætti lengi telja. Við höfum
líka tök á að taka maka okkar, börn eða vini með okkur í ferðirnar og
kynnast þannig fjölskyldum samstarfsfélaganna.
Í öllum ferðum er megin áherslan lögð á það að við erum hópur sem
höfum sett okkur markmið sem við ætlum að klára í sameiningu. Hvert
svo sem markmiðið er þá styðjum við hvert annað ef á þarf að halda, þeir
sem eru lofthræddir geta óhikað leitað aðstoðar hinna sem ekki kljást
við það svo dæmi sé tekið. Við miðlum reynslu okkar og hjálpumst að. 
Tengslamyndun er ótvíræð í ferðum sem þessum. Andrúmsloftið er
afslappað, þó er tilhlökkun í loftinu, allir hlakka til að
takast á við verkefnið sem framundan er. Það er ótrúlega
nærandi að vera saman úti í allt öðrum aðstæðum en við
erum í dags daglega. Upplifa saman náttúrufegurðina,
skiptast á skoðunum um hvað sé gott að hafa í nesti, deila
vitneskju um örnefni, útbúnað og hvað eina sem við kemur
ferðalaginu. Að góðu dagsverki loknu þegar t.d. komið
er í skála, hefst mannskapurinn handa við að útbúa mat,
halda kvöldvöku og rifja upp ferð dagsins og skipuleggja
næsta dag. Það er einstakur andi sem skapast í hópnum,
mikil samheldni, umhyggja, gleði, skoðanaskipti og svo
mætti lengi telja.
Allt sem að ofan er talið getum við heimfært upp á vinnuna okkar þó
verkefnin séu ólík því sem við gerum dags daglega í vinnunni. Útgang-
spunkturinn er þó alltaf sá sami, að klára verkefnið saman sem hópur. 
Beinn ávinningur fyrirtækis af góðu og öflugu starfsmannafélagi er
sú tengslamyndun sem verður til í gegnum félagsstarfið. Við kynnumst
fólki af öllum sviðum, þekkjum það með nafni og getum óhikað sett
okkur í samband við það aftur með það í fararteskinu að hafa upplifað
saman ánægjulegar stundir úti í náttúrunni. Þessi sameiginlega upplifun
og samvera sem starfsmenn eiga sín á milli skilar góðri vináttu og gleði
sem síðan skilar sér beint í vinnunni og samskiptum á vinnustaðnum. Það
að ganga á vit ævintýranna án áreitis frá síma, tölvu og fjölmiðlum skilar
orkumeiri og endurnærðum starfsmanni aftur til starfa.
Þórhalla Sólveig Sigmarsdóttir
Starfsmaður Arion banka
eF vinnupósThólFið þiTT er seTT upp í símanum þínum þá
eru Talsverðar líkur á því að það sé einnig njósnaFor-
riT í símanum. Tilgangur þessarar tegundar njósnaforrita
er hinsvegar ekki að njósna um starfsmanninn heldur að
verja þær viðkvæmu upplýsingar sem fyrirtækjatölvu-
póstur er. Þessi forrit gegna því hlutverki nokkurs konar
umsjónarkerfis sem gefur kerfisstjórum fyrirtækisins
möguleika á að laga villur sem geta komið upp, tryggja
gagnaöryggi og tryggja viðbrögð við því ef síminn týnist
eða honum er stolið. Þannig getur kerfisstjórinn til að
mynda brugðist við þjófnaði á símanum með því að
eyða af honum öllum gögnum, jafnvel þó slökkt hafi verið á símanum.
Vandamálið við slík umsjónarkerfi er að snjallsíminn er svo miklu
meira en bara sími. Raunar má ganga svo langt að segja að snjallsímar í
dag séu hluti af persónunni sem notar þá. Facebook, Snapchat, Twitter,
SMS, ljósmyndir, GPS staðsetningarferill og svo mætti lengi telja, eru
allt upplýsingar sem síminn geymir. Og þá komum við að aðal vanda-
málinu. Umsjónarkerfin sem fyrirtæki nota til að tryggja gagnaöryggi á
símanum gera ekki endilega greinarmun á tölvupóstforritinu og öðrum
forritum í símanum og því má með réttu kalla slík forrit njósnaforrit.
Með öðrum orðum, um leið og kerfisstjórinn virkjar umsjónarkerfið
getur viðkomandi skoðað öll þau gögn sem vistuð eru á símanum, til
dæmis símtalaskrá, SMS, ljósmyndir og GPS staðsetningu, viðkomandi
getur einnig virkjað forrit og raunar nánast notað símtækið á sama hátt
og notandinn. Þegar hér er komið er rétt að taka skýrt fram að þó þessir
möguleikar séu til staðar er ekki þar með sagt að kerfisstjórinn nýti þá,
enda er það ekki tilgangurinn með því að setja kerfið upp á símann.
Tilgangurinn er að tryggja öryggi þeirra gagna sem vistuð
eru á símanum og fyrirtækið á með réttu.
En er um að ræða brot á persónuvernd? Hér stangast á tvenn
sjónarmið, annarsvegar réttur starfsmannsins til síns einkalífs
og hinsvegar réttur fyrirtækisins til að tryggja viðkvæmar
upplýsingar. Það er skoðun undirritaðs að með einföldum
hætti sé hægt að fara bil beggja og tryggja rétt allra sem að
málinu koma. Það sé til að mynda gert með eftirfarandi hætti:
Ef slík umsjónarkerfi eru sett upp á snjallsíma starfsmanna
sé viðkomandi með skýrum hætti, helst skriflega, gerð grein
fyrir tilvist kerfisins og þeim eiginleikum sem það býr yfir.
Fyrirtæki sem gera kröfu um uppsetningu slíkra umsjónarkerfa á
snjallsíma starfsmanna setji reglur um notkun forritanna og tryggi að
öll notkun sé skráð með rekjanlegum hætti.
Tilgangurinn með þessum pistli er fyrst og fremst að vekja bæði
starfsmenn og forsvarsmenn fyrirtækja til umhugsunar. Tæknin er
á hraðferð og stundum þarf að staldra við og skoða hvort hagnýting
tækninnar feli í sér að upp komi einhver fyrirsjáanleg vandamál, sem
oft á tíðum má fyrirbyggja með einföldum hætti. Þá er rétt að taka fram
að slík umsjónarkerfi sem lýst er í þessum pistli eru í stöðugri þróun og
sum þeirra bjóða nú þegar upp á aðgangsstýringar sem takmarka aðgang
kerfisstjóra að tilteknum gögnum og forritum. Þetta vandamál er þó
aðeins einn angi af miklu stærra máli sem er að tæknin hefur valdið
því að skilin milli einkalífs og vinnu eru orðin nokkuð óljós. Hvort sú
þróun heldur áfram skal ósagt látið en einhver mörk þurfa að vera þarna
á milli, eða er það ekki?
Hilmar Vilberg Gylfason, fjármálastjóri SSF.
TENGSLAMYNDUN Í GEGNUM FÉLAGSSTARF,
BEINN ÁVINNINGUR FYRIR FYRIRTÆKI
ER NJÓSNAFORRIT Í SÍMANUM MÍNUM?