Morgunblaðið - 31.12.2020, Qupperneq 46

MORGUNBLAÐIÐ FIMMTUDAGUR 31. DESEMBER 2020
Morgunblaðið / Hari
Stefán Svan Aðalheiðarson fatahönnuður og verslunarmaður segir að ef kórónuveirufaraldurinn
hafi kennt sér eitthvað þá sé það að elska sjálfan sig og finna síðan þessari ást fleiri farvegi.
Elínrós Líndal
elinros@mbl.is
Stefán er um þessar mundir að hvíla sig eftir jólaversl-
unina. Hann er annar eigandi Stefánsbúðar þar sem finna
má fallega merkjavöru frá alls konar tímabilum. Hann er
ánægður með viðskiptin á jólunum þótt hann dragi ekki
úr því að tíminn undanfarið hafi verið óvanalegur fyrir
alla.
„Í verslunarrekstri er tíminn milli jóla og nýárs notaður
til þess að hvíla sig eftir jólatraffíkina og safna kröftum
fyrir nýtt og spennandi ár. Eins og hjá flestum hefur árið
mitt verið einkennilegt en ég átti mjög gott ár þrátt fyrir
það. Ég ferðaðist mikið um landið og styrkti fjölskyldu-
böndin.“
Hvað ætlarðu að gera um áramótin?
„Áramótin verða róleg þetta árið eins og hjá vonandi
flestum. Ég held upp á áramótin og afmæli systur minnar
með kampavíni og góðum mat. Þetta verða hugguleg ára-
mót.“
Hvað mælirðu með að fólk geri tengt fatnaði á gamlárs-
kvöld?
„Gamlárskvöld er tilvalið til þess að klæða sig einstaklega
mikið upp á. Hvort sem maður er einn eða í fjölmenni er
hollt og gott fyrir sálina að ganga skrefinu lengra en vana-
lega í klæðaburði.“
Stefán Svan vonar að lífið verði eins eðlilegt og það getur
hugsanlega orðið á nýju ári.
„Auk þess er ástin ofarlega á listanum hjá mér. Ég vænti
þess að finna ástina á nýju ári. Ég er óviss með hver það
verður, en það mun koma mér á óvart því ástin er alls kon-
ar. Ég hef fengið tíma á þessu ári til að kynnast sjálfum
mér og finnst ég þannig tilbúnari til að elska aðra mann-
eskju eins og ég elska mig.“
Hvað er á óskalistanum tengt tísku á næstunni?
„Þessa stundina erum við í búðinni að bíða eftir næstu
línu Maison Margiela 6 og grunar mig að þar leynist eitt-
hvað sem ég hef augastað á. Ég man sérstaklega eftir
gallajakka sem mig langar í. Mig fer að vanta flotta striga-
skó enda er vorið á næsta leiti.“
Stefán Svan segir jólin hafa verið dásamleg. Hann flutti í
nýja íbúð og hefur komið sér vel fyrir.
„Ég átti dásamlegt aðfangadagskvöld með fjölskyldunni.
Ég hvíldi mig svo líka vel því á jólum má maður vera lat-
ur.“
Stefán er á því að árið 2021 verði spennandi í búðinni þar
sem þau eru að vinna að nýjungum og fara í spennandi
samstarf sem hann hlakkar til að kynna viðskiptavinum
betur.
„Þetta er samstarf sem við ætluðum að frumsýna á árinu
2020, en við frestuðum því og betrumbættum út af ástand-
inu. Mig langar ekki að segja of mikið þessu tengt, en þetta
verður fyrir viðskiptavini okkar, sem eru alls konar fólk
með góðan smekk fyrir gæðavörum.“
Ætlar að finna ástina
í lífinu á árinu 2021
Tilbúinn fyrir ástina Stefán Svan
Aðalheiðarson ætlar að leggja
drög að því að finna ástina 2021.