Gerðir kirkjuþings - 2018, Qupperneq 28

28 29
Nefndarálit allsherjarnefndar um skýrslu kirkjuráðs.
Nefndin hefur fjallað um skýrslu kirkjuráðs og fylgigögn með henni ásamt ávörpum og
ræðum við upphaf kirkjuþings.
Magnús E. Kristjánsson forseti kirkjuþings setti þingið og fjallaði um að kirkjan væri
enn að leggja á djúpið. Viðræður hafi nú staðið yfir milli ríkis og kirkju um aukið sjálfstæði
þjóðkirkjunnar og að fjárhagsleg samskipti milli ríkis og kirkju væru einfölduð. Þjóðkirkjan
taki við öllum sínum málum, að prestar verði starfsmenn kirkjunnar og fjármál verði ekki
á ábyrgð ríkisins heldur kirkjunnar. Hann talaði um hve viðamikið starf kirkjunnar er og
að kynna þurfi starfið betur í samfélaginu, sem og að upplýsa í hvað fjármunir kirkjunnar
fara. Að lokum þakkaði hann fyrir að hafa í gegnum starf sitt í kirkjunni fengið að kynnast
mörgu hæfileikaríku og skemmtilegu fólki.
Bjarni Benediktsson, fjármálaráðherra, ávarpaði kirkjuþing í fjarveru dómsmálaráðherra
Sigríðar Á. Andersen, og lagði áherslu á að þjóðfélagsumræðan kallaði á að kirkjan fái
aukið sjálfstæði. Hann nefndi að ekki mætti skerða gagngjald vegna fasteigna kirkjunnar
og var ánægður með gang mála í viðræðum ríkis og kirkju.
Agnes M. Sigurðardóttir biskup Íslands ræddi í ávarpi sínu um kirkjuþing og hvernig
forsetar þess hafa tekið þátt í að móta starfshætti þingsins á breytingartímum. Hún þakkaði
Magnúsi E. Kristjánssyni fyrir hans störf. Hún vitnaði til sögu kirkjuráðs og kirkjuþings
og að lengi hefur verið rætt var um sjálfstæði kirkjunnar sem nú er að verða að veruleika.
Ljóst er af lögfræðiálitum að biskupsstofa er embættisskrifstofa biskups Íslands sem hefur
vald um skipulag og starfslið stofnunarinnar. Hún ræddi hlutverk kirkjuráðs sem hefur
umsjón með fjármálum kirkjunnar og fjárhagsáætlunum kirkjuþings. Þá talaði hún um að
við verðum öll að vinna saman til að koma fagnaðarerindinu til skila. Biskup fjallaði um
sameiningu prestakalla, að aukin samvinna presta skili faglegri vinnubrögðum. Biskup
ræddi umhverfis- og fræðslumál. Allar manneskjur þurfa að vinna saman fyrir umhverfið
og náttúruna. Fræðsla um skírnina verður í brennidepli á næstu árum. Kirkjan er stærsta
trúfélag landsins og þarf að tala við samtíð sína á því tungumáli sem skilst og varpa kristnu
ljósi á málefni líðandi stundar.
Allsherjarnefnd þakkar skýrslu kirkjuráðs. Nefndin leggur til að málið verði samþykkt
með ályktun á þskj. 42.