Skessuhorn - 04.04.2022, Blaðsíða 38

MIÐVIKUDAGUR 4. MAÍ 202238
Hvað ætlaðir þú að verða
þegar þú yrðir stór?
Spurning
vikunnar
(Spurt á Akranesi)
Rán Höskuldsdóttir
„Ljósmóðir eða dýralæknir.“
Dröfn Guðmundsdóttir
„Hestabóndi.“
Trausti Gylfason
„Sauðfjárbóndi.“
Aldís Ýr Ólafsdóttir
„Lögfræðingur.“
Kristín Edda Búadóttir
„Búðarkona.“
Víkingur Ólafsvík hefur spilað í
Lengjudeildinni síðustu fjögur
tímabil en féll úr deildinni í fyrra
og leikur í 2. deild í sumar. Guðjón
Þórðarson tók við liðinu um mitt
sumar á síðasta tímabili og þjálfaði
liðið einnig tímabilið 2020. Blaða­
maður Skessuhorns sló á þráðinn
til Guðjóns og spurði hann fyrst
hvernig undirbúningstímabilið
hefði gengið hjá þeim? „Það hefur
verið brösótt, þetta var erfiður vet­
ur og veðrið var að stríða okkur. Það
var mikill snjór á vellinum og hann
varð ekki snjólaus fyrr en í endað­
an mars. Svo er hópurinn tvískiptur,
fimm leikmenn sem eru að æfa með
liðum í Reykjavík, hinir fyrir vestan
og svo hafa útlendingarnir verið að
koma á sitt hvorum tímanum.“
Hafa orðið miklar breytingar á
liðinu frá síðasta tímabili? „Mjög
miklar, það er kominn ákveðinn
kjarni af heimamönnum og það er
mjög jákvætt. Það eru ungir strákar
sem hafa verið að æfa vel í vetur og
eru að koma inn í hópinn. Þeir eru
mjög jákvæðir, hafa lagt mikið á sig
og eru tilbúnir í slaginn. Æfinga­
hópurinn telur um 16­18 leikmenn,
það er ekki meira en það. Við erum
komnir með miðvörð frá Spáni,
miðjumann frá Þýskalandi og kant­
mann frá Englandi. Svo er spurning
hvort við náum að bæta við hóp­
inn á síðustu metrunum með að fá
menn að láni, það er verið að skoða
það en það er ekki auðvelt núna að
fá menn vestur. Menn bíða ekki í
röðum að koma í Ólafsvík því við
erum ekki eins aðlaðandi og þegar
við vorum í Lengjudeildinni.“
Menn verða að
standa í lappirnar
Hver eru markmið liðsins fyrir
tímabilið? „Markmiðið er að tapa
eins fáum leikjum og nokkur kostur
er. Hvert það fer með okkur verður
svo að koma í ljós en við viljum nátt­
úrulega vera að berjast við toppinn
en þá verða menn að standa í lapp­
irnar ef þeir ætla að vera þar, það er
alveg á hreinu. Mörg lið í deildinni
hafa bætt vel við sig af mönnum og
hafa verið að byggja á sama liði og
árið á undan. Á sama tíma og við
erum með nánast nýtt lið, meira
en helmingurinn af liðinu eru nýir
og það hefur reyndar verið svolítið
trend að menn hafi verið að koma
og fara í Ólafsvík. Það er erfitt að
skapa stöðugleika með útlendingun­
um því þeir eru eins og farfuglarn­
ir, þeir koma og fara og svo veist
þú ekki hvort þeir koma aftur. En
upphafið er að menn vilji standa í
þessari baráttu sem farið er fram á
og það er ágætis kjarni af heima­
mönnum sem myndar undirstöðuna
í þessum hóp. Svo vonast maður til
að útlendingarnir blómstri með
okkur og þá er alltaf möguleiki.“
Stemningin ekki
enn komin
Hvað með stemninguna og stuðn­
inginn í bæjarfélaginu? „Ég hef ekki
mikið fundið fyrir því, mér finnst
vanta upp á stuðninginn. Þetta
er borið upp af nokkrum mönn­
um sem eru í stjórninni og harð­
duglegum mönnum sem standa að
liðinu. Það eru örfáir sem standa
að þessu liði og allt sjálfboðaliðar
en með mikla ástríðu fyrir fótbolta.
En þeir eru ekki nógu margir,
það mætti finna fyrir meiri stuðn­
ingi í samfélaginu. Stemningin er
ekki enn komin en vonandi kem­
ur hún fyrir fyrsta leik gegn Völs­
ungi næsta laugardag sem er einn
af úrslitaleikjunum í upphafi móts.
Völsungur var nálægt því að kom­
ast upp í fyrra og ætla sér eflaust
stærri hluti í sumar og ég vona að
það verði góður stuðningur við
liðið í þessum mikilvæga leik.“
Guðjón segir að lokum að hann sé
spenntur fyrir sumrinu: „Ég hlakka
til og það er alltaf fiðringur í belgn­
um á mér. Ég hlakka til hverrar
æfingu og hvers leiks og það breyt­
ist ekkert. Eina sem ég vonast eftir
er stuðningur úr þessu litla sterka
samfélagi og að sýna það í verki því
við gerum þetta ekki einir. Það þarf
stóran og breiðan stuðning til þess
að standa að liði sem vill vinna leiki
og það er ekki verk örfárra manna,
það þarf breiða samstöðu og stuðn­
ing í samfélaginu til að ná árangri.“
vaks
Knattspyrnufélagið Kári á Akranesi
leikur í 3. deild karla í sumar í fyrsta
skipti síðan árið 2017 þegar liðið
sigraði deildina með miklum yfir­
burðum. Á síðasta tímabili endaði
Kári í neðsta sæti í 2. deildinni með
aðeins níu stig og féll ásamt Fjarða­
byggð niður um deild. Ásmund­
ur Guðni Haraldsson tók við liði
Kára í nóvember árið 2020 og
stýrir liðinu því sem þjálfari ann­
að árið í röð í sumar. Blaðamaður
Skessuhorns heyrði í Ása í vikunni
um tímabilið sem hefst um næstu
helgi. Fyrsta spurningin varðar
undirbúningstímabil Kára í vet­
ur og segir Ási að það hafi gengið
bara nokkuð vel, þeir hafi æft vel,
fengið góða leiki og ágætis úrslit og
frammistöðu. Þeir hafi einnig feng­
ið góða viðbót í Dúnu (Guðrúnu
Þórbjörgu Sturlaugsdóttur) sem
hafi reglulega í vetur verið völd að
vel þéttum harðsperrum sem sér­
legur styrktarþjálfari Kára.
En hafa orðið miklar breytingar
á liðinu frá síðasta tímabili? „Já, það
hafa orðið töluverðar breytingar
á liðinu. ÍA hefur kallað til baka
sína samningsbundnu leikmenn að
mestu leyti og gaman að sjá nokkra
þeirra sem hluta af núverandi leik­
mannahópi meistaraflokks ÍA. Ein­
hverjir hafa horfið á braut og við
höfum líka fengið reynda leikmenn
til baka eins og Dino Hodzic, Ingi­
mar Elí Hlynsson. Hafþór Péturs­
son og Aron Inga Kristinsson sem
styrkja hópinn gríðarlega. Einnig
hafa þeir Ísak Örn Elvarsson og
Finnbogi Laxdal komið til okkar
frá ÍA. Liðið verður aðeins eldra
í sumar og við fáum kannski að
sjá færri 2. flokks stráka spila með
okkur en síðasta sumar. En von­
andi verða einhverjir sem koma til
með að spila sína fyrstu deildarleiki
í meistaraflokki í sumar.“
Vonandi náum við okkar
markmiðum
Liðin tólf sem leika í 3. deildinni í
sumar koma víðs vegar af landinu
þó flest liðin komi af Stór­Reykja­
víkursvæðinu. Að sunnan koma
Augnablik úr Kópavogi, Elliði úr
Árbænum, ÍH úr Hafnarfirði, KFG
úr Garðabæ, KH frá Hlíðarenda
og Vængir Júpíters úr Grafar vogi.
Að norðan koma Dalvík/Reyn­
ir og Kormákur Hvöt, að austan
kemur Sindri frá Höfn í Horna­
firði og að síðustu eru það KFS
frá Vestmannaeyjum, Víðir úr
Garði og Kári. Hvernig líst Ása á
deildina í sumar? „Okkur líst bara
vel á deildina í sumar. Síðasta sum­
ar var erfitt, við vorum með ungt
lið en áttum nokkra góða leiki. Sú
reynsla hjálpar okkur inn í þetta
tímabil. Markmið liðsins fyrir sum­
arið er einfaldlega að koma liðinu
aftur upp í 2. deild. Við vonandi
náum okkar markmiðum með öfl­
ugum hóp og reynslumiklu liði og
komum Kára á þann stað sem við
viljum vera á. Þá vil ég bara að lok­
um hvetja fólk til að koma á völlinn
í sumar og sjá uppalda Skagamenn
spila af lífsins hjarta og sál fyrir
klúbbinn sinn.“ segir Ási að lokum.
Kári spilar í fyrstu umferð
Íslandsmótsins við Sindra á laugar­
daginn næstkomandi á Sindra­
völlum á Höfn og hefst leikurinn
klukkan 15. vaks
Ásmundur Haraldsson, þjálfari Kára. Ljósm. vaks
Markmiðið að koma liðinu aftur upp
Guðjón Þórðarson, þjálfari Víkings. Ljósm. af
„Alltaf fiðringur í belgnum á mér“