Bændablaðið - 09.02.2023, Blaðsíða 23

23Bændablaðið | Fimmtudagur 9. febrúar 2023
Mest lesna blað landsins?
Lestur Fréttablaðsins hefur hrunið eftir að útgáfu-
fyrirtækið Torg ákvað að breyta dreifingu blaðsins.
Nýjar tölur Gallup um lestur prentmiðla sýna að í
janúar var lestur Fréttablaðsins á landsvísu 15,7% og
er orðinn minni en lestur Morgunblaðsins, sem mælist
18,9%. Ástæða minnkandi lesturs Fréttablaðsins er
rakin til þess að blaðinu er nú ekki lengur dreift í hús á
höfuðborgarsvæðinu og á Akureyri, heldur liggur það frammi
í þar til gerðum stöndum á um 120 stöðum á Suðvesturlandi
og á Akureyri. Bændablaðið tók þátt í lestrarmælingu Gallup
á síðasta ársfjórðungi 2022. Þá mældist lestur þess á landsvísu
26%. Tölurnar benda því til þess að Bændablaðið sé í dag
mest lesni prentmiðill landsins.
Dreifikerfi þess nær til yfir 420 dreifingarstaða um allt
land og er upplaginu, rúmum 33.000 eintökum, dreift í vel
flestar matvöruverslanir, bensínstöðvar, sundlaugar og á
hvert lögbýli landsins. /ghp
Búgreinaþing:
Formannsskipti hjá
nautgripabændum
Nýr formaður búgreina-
deildar NautBÍ verður kjörinn
á búgreinaþingi.
Herdís Magna
Gunnarsdóttir,
bóndi á Egils­
stöðum, mun
ekki gefa kost
á sér til áfram­
haldandi for­
mannssetu.
Hún ætlar
áfram að vinna
að hagmunum
bænda sem varaformaður
Bændasamtakanna en ætlar að
láta öðrum eftir að sinna forystu
nautgripabænda.
Í áramótapistli sínum til
nautgripabænda sagði Herdís Magna
að verkefni næsta formanns og
stjórnar verði að fylgja eftir áherslum
búgreinarinnar í næstu endurskoðun
búvörusamninga.
„Hvet ég þau sem koma til með að
sitja í samninganefnd um endurskoðun
búvörusamninga til þess að hlusta
á bændur og forsvarsfólk þeirra.
Mikilvægt er að fara með opnum
hug inn í endurskoðunina og muna að
endurskoðun var upphaflega hugsuð
til að sníða agnúa af samningnum en
ekki kollvarpa þeim,“ segir Herdís
m.a. í pistli sínum.
Einnig kemur þar fram að
innleiðing á kyngreindu sæði
sé augljóst næsta stóra skref
búgreinarinnar nú í kjölfar inn­
leiðingar erfðamengisúrvals.
Herdís Magna hefur setið í stjórn
Landssambands kúabænda í rúm
sex ár og var kjörinn formaður þess
árið 2020. /ghp
Herdís Magna
Gunnarsdóttir.
Búgreinaþing:
Deild landeldis
nýr þátttakandi
Deild landeldis var stofnuð innan
Bændasamtaka Íslands síðasta
sumar og því verður búgreinin
þátttakandi í búgreinaþingi.
Þorva ldur
Arnarsson, verk­
efnisstjóri hjá
fiskeldisfyrir­
tækinu Landeldi,
er formaður
búgreinadeildar­
innar og hyggst
bjóða sig fram til
áframhaldandi
formennsku.
Landeldissamtök Íslands
(ELDÍS) voru einnig stofnuð síðasta
sumar með aðild Landeldis hf.,
Samherja hf., Geo Salmo, Matorku
og ILFS í Vestmanna­eyjum.
Undirrituð var viljayfirlýsing á
milli ELDÍS og Bændasamtaka
Íslands um að vinna sameiginlega
að fullvinnslu lífræns úrgangs til
áburðarframleiðslu á Íslandi.
„Ég er þakklátur fyrir tækifærið
og hef metnað til að gera vel á
þessum vettvangi.
Einmitt núna erum við í Landeldi
hf. eina félagið í landeldisdeild
Bændasamtaka Íslands. Við erum
nýkomin inn og deildin í sjálfu sér
nýstofnuð, og við erum að vinna í
því þessi dægrin að kynna vettvang
deildarinnar og Bændasamtakanna
í heild fyrir samstarfsaðilum
okkar í Landeldissamtökum
Íslands,“ segir Þorvaldur um
framtíð deildarinnar innan Bænda­
samtaka Íslands.
„Við höfum ekki afmarkað
sérstaka málaskrá enn sem komið
er fyrir búgreinaþingið, en við
lítum á það sem kærkomið tækifæri
til að tengjast bændasamfélaginu
og vonandi eiga samtal um leiðir
til að leggja okkar af mörkum með
hvaða hætti sem það kann að vera.
Við lítum á okkur sem
bændur þar sem við stundum
matvælaframleiðslu á okkar eigin
landi og leggjum mikinn metnað
í að ná jákvæðum umhverfis­
áhrifum af okkar framleiðslu,
vonandi til virðisauka fyrir
landbúnaðarsamfélagið allt,“ bætir
Þorvaldur við. /smh
Þorvaldur
Arnarsson.
Meðallestur prentmiðla
á landsvísu
26,0%
8,5%
5,0%
18,9%
15,7%