Iðjuþjálfinn - 2023, Blaðsíða 4
Iðjuþjálfinn I Fagblað iðjuþjálfa I 1. tölublað 2023 4
Þóra Leósdótttir
formaður.
Kæru félagar
Veturinn er kominn og síðustu laufin hanga á bláþræði á
trjánum. Haustið hefur verið hlaðið verkefnum á vettvangi
IÞÍ og ekki sér fyrir endann á þeim, þannig á það líka að vera
í öflugu félagi. Óhætt er að segja að skemmtilegasta verk-
efnið þetta haustið hafi verið undirbúningur og þátttaka í
kvennaverkfallinu 24. október síðastliðinn. Iðjuþjálfafélag
Íslands var eitt af aðstandendum viðburðarins á vettvangi
BHM og erum við ákaflega stolt af því. Stemningin í miðbæ
Reykjavíkur var rafmögnuð og tilfinningaþrungin og enn er
titringur í lofti. Fyrir ári síðan beindi ég sjónum að Úkraínu
og afleiðingum innrásar rússa sem hófst í febrúar 2022.
Nú hafa brotist út átök í Palestínu og Ísrael og það setur
okkur öll í nýja og flókna stöðu. Það er þyngra en tárum
taki að heyra af þeim grimmdarverkum sem framin eru á
óbreyttum borgurum á Gaza sem flest eru börn. Heimssam-
band iðjuþjálfa (WFOT) leggur í yfirlýsingum sínum áherslu
á „rétt fólks til iðju“ og fordæmir allar aðgerðir og aðstæður
sem hindra einstaklinga og samfélög í að stunda þá iðju í
hversdeginum sem er nauðsynleg fyrir heilsu og velferð.
Það eru mannréttindi að hafa aðgang að iðju og tækifærum
til þátttöku. Við hugsum til kollega okkar á stríðshrjáðum
svæðum um heim allan.
Kaup og kjör
Það er kjaravetur framundan, svo sem ekkert nýtt í því. Þeir
kjarasamningar sem voru undirritaðir síðastliðið vor eru
skammtímasamningar til eins árs og eru því lausir vorið 2024.
Þessum skammtímasamningum á opinberum vinnumarkaði
fylgdi verkáætlun sem unnið er eftir. Þar kveður meðal annars
á um eftirfylgni með Betri vinnutíma, endurskoðun á veikinda-
kafla og að rýnt sé í vinnuumhverfi starfsfólks. Samhliða kjara-
samningunum var undirritað áfangasamkomulag á vettvangi
viðsemjenda og heildarsamtaka þar sem tekin eru skref í átt að
leiðréttingu á launum svonefndra kvennastétta. Starfshópur
vinnur að málinu hörðum höndum og von er á niðurstöðu
á næstu vikum. Horft er til launasetningar starfanna eins
og þau eru flokkuð og metin í stofnanasamningum (ríki) og
starfsmati (sveitarfélög). Samninganefnd IÞÍ er í startholunum
við að undirbúa komandi kjaraviðræður og formaður er í góðu
samstarfi við önnur aðildarfélög BHM innan heilbrigðisgreina.
Það er skýlaus krafa IÞÍ nú sem áður að laun iðjuþjálfa á opin-
berum vinnumarkaði séu í samræmi við menntun, reynslu og
ábyrgð. Vanmat á virði starfa háskólamenntaðra kvenna er
með öllu óásættanlegt - við nennum þessu ekki lengur.
Alþjóðavettvangur
Norrænn fundur formanna og varaformanna iðjuþjálfa félaga
var haldinn í Helsinki í lok ágúst. Fyrri daginn hlýddum við
meðal annars á fyrirlestur um umbætur og stefnumótun í
heilbrigðis- og félagsþjónustu í Finnlandi. Rauði þráðurinn
þar er samþætt þjónusta einkum hvað varðar aldraða og börn
og ungmenni. Nýtt skipulag byggir á þverfaglegum teymum
í nærumhverfi fólks. Þessar áherslur ríma svo sannarlega við
farsældarlögin íslensku sem og stefnuna í málefnum aldraðra.
Í umræðum kom fram að það er nokkur samhljómur í áherslum
allra landanna. Ársfundur SJOT var einnig haldinn þar sem
farið var yfir ársskýrslur og reikninga. Björg Þórðardóttir
verður áfram okkar fulltrúi í ritstjórn og í ritnefndinni eiga
sæti þær Guðrún Árnadóttir og Snæfríður Þóra Egilson. Við
kunnum þeim bestu þakkir fyrir þeirra framlag. Næsti norræni
fundur verður haldinn að ári hér á Íslandi.
Í október fór fram 11. aðalfundur Iðjuþjálfanefndar Evrópuþjóða
(COTEC) en hann var haldinn í Ljubljana í Slóveníu. Alls voru
mætt til leiks 23 fulltrúar iðjuþjálfafélaga í Evrópu. Daginn
áður var haldinn vinnufundur þar sem vinnuhópar stjórnar
skiluðu af sér skýrslum og þátttakendum var skipt upp í hópa
til að ræða stefnu og starfsáætlun COTEC á næsta starfsári.
Pistill formanns: