Goðasteinn - 01.06.1986, Side 73

einstakt í sinni röð, þá má segja að allt viðmót og velgjörningur í
okkar garð hjá fólki því sem við hittum væri hvarvetna með miklum
ágætum. í stuttu máli verður ekki annað sagt en að við nytum
einstakrar gestrisni og höfðingsskapar, hvar sem við komum. Ég hef
áður sagt að samkvæmt reynslu minni sé hvergi betra að vera
útlendingur en í Bandaríkjunum og vil bæta því við í þessu sam-
hengi að hvergi sé betra að vera útlendingur í Bandaríkjunum en í
einnar stjörnu ríkinu Texas suður við sólgylltan Mexíkóflóann, þar
sem golfstraumurinn á upptök sín.
Texasbúar eru talsvert drjúgir með sig yfir landi sínu og sögu og
hafa ástæðu til þess. Landið er stórt og gjöfult. Veðurfarið er milt
og hlýtt og möguleikar til vaxtar og grósku virðast næstum
takmarkalausir. Þá skera Texasbúar sig nokkuð úr öðrum Banda-
ríkjamönnum í málfari og i klæðaburði er þeir líka dálítið sérstakir,
þótt ýmsir reyni ef til vill að stæla þá. Háir og barðastórir hattar,
hálfhá og oft mjög skrautleg leðurstígvél og breið og skreytt leður-
belti eru meðal þess sem helst einkennir klæðaburð karlmanna í
Texas.
Veiðiskapur er talsvert stundaður og sjálfsagt þykir að menn eigi
byssur og það stundum margar. Skotfélög og klúbbar starfa víða og
komum við til æfinga á nokkrum slíkum stöðum og skutum eins og
allir aðrir. Einkum fengust menn við að skjóta leirdúfur með hagla-
byssum og einnig í mark með skammbyssum. Þótti þá skipta miklu
máli að menn væru fljótir að sigta og helst að þeir hittu í miðjan
hringinn. Var þetta oft hin besta skemmtun.
Þá er golfíþróttin vinsæl í landinu og víða ágætir vellir. Tókum
við einnig nokkurn þátt í þeirri íþrótt og höfðum gaman að.
Athyglisvert þótti mér að oftast nær vóru menn ekki að slíta sér út
á að ganga og bera kylfur og annan útbúnað eða aka þessu dóti i
handkerrum. Þess í stað notuðu flestir ágæta og rafknúna bíla til
að ferðast um vellina. Er það að sjálfsögðu mesti munur og þá
einkum, þegar heitt er í veðri eins og oft gerðist þessa vordaga í
Texas.
Loks má geta þess að stöðuvötn og uppistöðulón eru víða í
landinu og hvers kyns siglingar, sjóbretta- og sjóskíðaferðir meðal
vinsælustu íþrótta. Ekki má heldur gleyma alls konar hraðbátum,
Goðasteinn
71