Ársrit Skógræktarfélags Íslands - 15.12.1990, Page 102

svar við framangreindum uppástungum Sigurðar
og áætlun um ferð tveggja manna til Arkhangelsk
í síðustu viku júní 1989.
Síðar um veturinn var ákveðið, að höfundar
þessarar greinar færu, þar eð þeir höfðu báðir
sýslað sérstaklega með lerki og Sigurður auk þess
vegna stöðu sinnar sem skógræktarstjóri.
MÓTTÖKUR EYSTRA
Við komum til Moskvu 25. júní 1989. Þar tóku
á móti okkur fyrir hönd Ríkisskógræktarnefndar
Sovétríkjanna (KGL) deildarstjóri alþjóða-
deildar nefndarinnar, Georgi Naumov, og
Nadezhda (Nadja) Larionova, sem annast f.h.
alþj óðadeildarinnar samskipti við Norðurlönd og
Norður-Ameríku. Hún var leiðsögumaður og túlk-
ur Sigurðar og Pórarins í ferð þeirra til Sovétríkj-
anna 1979. Urðu því fagnafundir við að hitta hana
nú aftur og sannfærði okkur um, að fyrirgreiðsla
við okkur yrði hin besta, enda reyndist svo.
Hafði Nadja skipulagt ferð okkar. Gist var í
Moskvu þessa fyrstu nótt, en um hádegi næsta
dag var haidið af stað með járnbrautarlest til
Arkhangelsk. Á brautarstöðinni kynnti Nadja
fyrir okkur unga konu, Élena Samolyotova, sem
skyldi vera leiðsögumaður okkar og túlkur í ferð-
inni norður. Hún reyndist okkur afbragðsferða-
félagi og leysti með prýði erfitt hlutverk túlksins.
Lestarferðin norður tók 20'/2 klst. Um 30 stiga
hiti var í Moskvu og hélst hann að deginum alla
leiðina norður. Hér gafst okkur einstakt tækifæri
til að sjá rússnesku sléttuna norður að Hvítahafi,
þar sem mestmegnis er ekið gegnum endalausan
skóg. Fyrst sumargræna laufskógabeltið með
ívafi af björk og blæösp og þegar norðar dró
rauðgreni- og skógarfuruskóginn, sem líka var
blandaður björk og blæösp, og nyrst stórum mýra-
flákum. Þá var ekið gegnum óteljandi sveitaþorp
og borgir.
Við komum til Arkhangelsk kl. 8.00 hinn 27.
júní. Á brautarstöðinni tóku á móti okkur þau
fjögur, sem höfðu nær allan veg og vanda af heim-
sókn okkar til Arkhangelskhéraðs. Þau störfuðu
hjá Ríkisskógræktarnefndinni í Arkhangelskhér-
aði. Nefnist héraðsstjórnin á ensku „The Arch-
angel Territorial Forestry and Production Associa-
Timburmóttaka á ónefndri járnbrautarstöð sunnan við
Arkhangelsk. Mynd/photo: S.Bl.
Timber depot at a railway station south of Archangel.
tion“, sem þýða mætti á íslensku Skógarþjónusta
Arkhangelskhéraðs. Þau voru: Dimitrij Odintsov,
forstjóri, Alekseij Zavolzhin, skógræktarstjóri,
Oleg Kallin, deildarstjóri nýskógræktar, og Galina
Petrovna, fulltrúi. Þetta fólk reyndist okkur
framúrskarandi gestgjafar, sem gerðu allt til þess
að gera okkur dvölina sem ánægjulegasta og gagn-
legasta.
Fyrir hádegi var tekið á móti okkur á skrifstofu
skógstj órnarinnar. Þar var okkur sagt frá skógum
og skógabúskap í Arkhangelskhéraði. Við skýrð-
um þeim frá skógum og skógrækt á íslandi. Eitt,
sem þeir sögðu okkur frá strax þennan morgun og
vakti mikinn ugg hjá okkur, var það, að lerki væri
ekki höggvið lengur á þeirra vegum og engir mögu-
leikar á að útvega fræ af því.
Eftir hádegi heimsóttum við skógrannsókna-
stofnunina í Arkhangelskborg. Þar höfðu orð
fyrir hópnum Genrik Chibisov, forstjóri, og Val-
erij Serij, rannsóknastjóri. Að því loknu fórum
við að skoða Norðlæga trjásafnið (arboretum)
utan við borgina. Þar tók á móti okkur forstöðu-
maðurinn, Vladimir Nilov.
Næsta dag, 28. júní, var haldið til skógar í fylgd
Zavolzhins skógræktarstjóra og Boris Seméo-
novs, sérfræðings í skógfræði við rannsóknastöð-
ina. Flogið var með þyrlu NA frá Arkhangelsk
115 km til staðar, sem nefnist Jorna og er um 60
km sunnan við skógarmörkin. Þar mættu okkur
þrír starfsmenn skógstjórnarinnar á því svæði.
Hinn 29. júní var flogið með þyrlu svipaða vega-
lengd og daginn áður, en nú í austur til bæjarins
100
ÁRSRIT SKÓGRÆKTARFÉLAGS ÍSLANDS 1990