Morgunblaðið - 09.02.2001, Qupperneq 19

LANDIÐ
MORGUNBLAÐIÐ FÖSTUDAGUR 9. FEBRÚAR 2001 19
Selfossi - Íbúum sveitarfélagsins Ár-
borgar fjölgaði um 180 manns á síð-
asta ári og voru samtals 5.856 hinn 1.
desember síðastliðinn og nam fjölg-
unin 3,17%. Á Selfossi búa 4.640, á
Eyrarbakka 550, Stokkseyri 462 og í
dreifbýli sveitarfélagsins 204. Af ein-
stökum stöðum fjölgaði mest á Sel-
fossi, um 170 manns. Að sögn Karls
Björnssonar bæjarstjóra hefur fjölg-
unin áhrif á rekstur og stofnfram-
kvæmdir í sveitarfélaginu þar sem
hraða þarf framkvæmdum við gatna-
gerð og fráveitur, ásamt því að þjón-
ustuþörfin við íbúana vex, svo sem
varðandi leikskóla og grunnskóla.
Fjárhagsáætlun sveitarfélagsins fyr-
ir árið 2001 var afgreidd með 97,5
milljóna króna lántöku. Í greinargerð
með fjárhagsáætluninni kemur fram
að tekjuafgangur til ráðstöfunar er
79 milljónir. Gjaldfærð og eignfærð
fjárfesting nemur aftur á móti 249
milljónum sem er 126 milljónum
meira en í fyrra.
Mikið um fyrirspurnir
„Það er skuldaaukning hjá sveit-
arfélaginu en við lítum á hana sem
tímabundna meðan verið er að ná upp
þjónustustiginu. Manni finnst stutt
síðan ekki voru neinir biðlistar við
leikskólana hjá okkur. Við reynum að
fylgja fjölguninni eftir með byggingu
leikskóla en það er erfitt að halda í við
fjölgunina á öllum sviðum, einkum
þeim sem krefjast aukinna bygginga.
Á félagsþjónustusviðinu höldum við
vel í við fjölgunina en sú þjónusta er
þess eðlis að þurfa ekki stöðugt meiri
húsakost þótt aukning verði,“ sagði
Karl Björnsson, bæjarstjóri Árborg-
ar. Hann sagði fjölgunina vekja at-
hygli og kvaðst verða var við aukinn
áhuga fólks á sveitarfélaginu. „Við
fáum mikið af fyrirspurnum um lóðir
í miðbænum og víðar í sveitarfélag-
inu. Áhugi virðist mestur á Selfossi
en það koma líka fyrirspurnir um
önnur svæði í sveitarfélaginu eins og
Stokkseyri og Eyrarbakka.“
Einkaaðilar velkomnir
„Það er mikil uppbygging hér á
vegum einkaaðila, í húsbyggingum,
uppbyggingu nýs hverfis við Eyra-
veg og síðan í sambandi við Hótel Sel-
foss og menningarmiðstöð í tengslum
við það með kvikmyndasölum og leik-
hús- og tónleikasal. Samstarf okkar
við einkaaðila er mikið og að mínu
mati gott. Við höfum átt farsælt sam-
starf við einkaaðila um uppbyggingu
og bjóðum þá velkomna til nýrra
verkefna í sveitarfélaginu. Þetta
svæði hér tengist æ meira höfuðborg-
arsvæðinu, fólk býr hér og vinnur í
Reykjavík og öfugt. Við höfum orðið
þeirrar gæfu aðnjótandi hér í Árborg
að búa við velgengni. Það er gaman
að starfa fyrir sveitarfélag sem er í
svona uppbyggingu, hér ríkir bjart-
sýni og sóknarhugur,“ sagði Karl
Björnsson, bæjarstjóri Árborgar.
Íbúum fjölgar í Árborg
Morgunblaðið/Sigurður Jónsson
Karl Björnsson, bæjarstjóri Árborgar.
Þjónustuþörf
kallar á lántökur