Morgunblaðið - 07.04.2001, Page 4

FRÉTTIR
4 LAUGARDAGUR 7. APRÍL 2001 MORGUNBLAÐIÐ
LANDSVIRKJUN gæti útvegað
Norðuráli raforku til að ráðast í
stækkun álversins á Grundartanga
um 90 þúsund tonn með því að
fara annars vegar út í virkjun við
Búðarháls og hins vegar Norð-
lingaöldulón og Kvíslaveitu 6.
Hægt væri að afhenda orkuna
2004-2005 ef þessir kostir til orku-
öflunar yrðu nýttir. Ekki liggur
hins vegar fyrir hvort leyfi fæst til
að fara út í gerð lóns við Norð-
lingaöldu og Kvíslaveitu 6, en
Landsvirkjun hefur heimild Al-
þingis til að virkja við Búðarháls.
Stjórnendur Norðuráls hafa
ákveðið að leggja til hliðar að sinni
áform um að stækka álverið á
Grundartanga upp í 300 þúsund
tonn en stefna að því að nýta þær
heimildir sem fyrirtækið hefur til
að stækka það um 90 þúsund tonn.
Starfsleyfi fyrirtækisins veitir því
heimild til að reisa 180 þúsund
tonna álver.
Friðrik Sophusson, forstjóri
Landsvirkjunar, sagði í samtali við
Morgunblaðið að Landsvirkjun
hefði átt í viðræðum við Norðurál
um frekari orkusölu. Farið hefði
verið yfir þá kosti sem væru í
stöðunni. Landsvirkjun hefði
heimild til að ráðast í Búðarháls-
virkjun, en unnið er að mati á um-
hverfisáhrifum virkjunarinnar.
Friðrik sagði að undirbúningur að
virkjuninni væri í eðlilegum far-
vegi.
Orka frá Búðarhálsvirkjun dug-
ar hins vegar ekki fyrir 90 þúsund
tonna stækkun álversins og því
hafa aðrir kostir verið til skoð-
unar. Friðrik sagði að ef Lands-
virkjun ætti að geta afhent Norð-
uráli orkuna innan ekki mjög langs
tíma lægi beinast við að skoða
Norðlingaöldulón og Kvíslaveitu 6.
Hann sagði að Landsvirkjun hefði
staðið að rannsóknum á þessu
svæði í tvo áratugi. Allir gerðu sér
grein fyrir að þetta væri viðkvæmt
svæði vegna nálægðar við Þjórs-
árver. Hann sagði að Landsvirkjun
gæti breytt upphaflegum áformum
og lækkað yfirborðshæð Norð-
lingaöldulóns. Markmiðið væri að
lónið hefði ekki veruleg áhrif á
náttúruverndargildi Þjórsárvera.
Ef ráðast á í Norðlingaöldulón
þarf að að leggja málið fyrir Al-
þingi. Það þarf einnig að liggja
fyrir leyfi frá Náttúruvernd rík-
isins og framkvæmdin þarf að fara
í mat á umhverfisáhrifum.
Norðlingaölduveita miðar að því
að flytja vatn úr Þjórsá yfir í Þór-
isvatn og yfir í virkjanirnar í
Tungnaá. Raforkan verður því til
án þess að byggð sé ný virkjun.
Tiltölulega skamman tíma tekur
að gera veituna og gæti hún verið
tilbúin 2004-2005 ef leyfi fæst til
að ráðast í þessar framkvæmdir.
Friðrik sagði að aðrir virkjunar-
kostir væru flóknari. Það væri
hægt að virkja í neðri hluta Þjórs-
ár. Rannsóknir á því svæði væru
hins vegar skammt á veg komnar
og óljóst hvenær hægt yrði að ráð-
ast í byggingu virkjana þar.
Orkuveita Reykjavíkur að
skoða virkjun í Henglinum
Guðmundur Þóroddsson, for-
stjóri Orkuveitu Reykjavíkur,
sagði að Norðurálsmenn hefðu
rætt við sig um orkukaup. Staðan
hjá Orkuveitunni væri hins vegar
þannig að þeir gætu ekki afhent
þeim orku fyrr en í fyrsta lagi
2005. Orkuveitan áformaði að
virkja gufuafl í Henglinum til raf-
magnsframleiðslu. Eftir væri að
gera ítarlegar rannsóknir á svæð-
inu. Áformað væri að bora þar
rannsóknarborholu í sumar, en
fyrirtækið væri ekki búið að fá
formlegt rannsóknarleyfi. Það
væri í raun ekki hægt að segja
mikið um hugsanlega orkusölu
fyrr en rannsóknarniðurstöður
lægju fyrir.
Orkuveita Reykjavíkur tekur í
sumar í notkun nýjan áfanga við
Nesjavallavirkjun. Um er að ræða
30 MW og kaupir Landsvirkjun 10
MW af þeirri orku. Ekki er áform-
að að virkja frekar við Nesjavelli í
nánustu framtíð.
Albert Albertsson, aðstoðarfor-
stjóri Hitaveitu Suðurnesja, sagði
að Norðurálsmenn hefðu rætt
óformlega við stjórnendur Hita-
veitu Suðurnesja. Frekari viðræð-
ur væru ekki áformaðar. Ástæðan
væri sú að fyrirtækið áformaði
ekki að fara út í byggingu nýrra
virkjana í bráð.
Óljóst hvernig Landsvirkjun getur mætt óskum Norðuráls
Búðarháls og
Norðlingaöldulón
til skoðunar
SÖFNUNARÁTAK
tíunda bekkjar í Rétt-
arholtsskóla fyrir
Umhyggju, samtök
langveikra barna er
hluti af lífsleikninám-
skeiði þessa árgangs
og liður í því að
krakkarnir kynnist
sjálfboðavinnu og
hjálparstarfi að sögn
Sigrúnar Ágústsdótt-
ur, námsráðgjafa við
skólann.
Morgunblaðið
greindi í gær frá Ing-
veldi Marion Hannes-
dóttur, nemenda í 9.
bekk skólans sem
haldin er sjaldgæfum ristilsjúk-
dómi og hefur m.a. gengist undir
49 aðgerðir vegna hans.
Hamingjuóskir
með framtakið
Þessa vikuna hefur Ingveldur
greint skólafélögum sínum á op-
inskáan hátt frá sjúkdómi sínum
og hvaða áhrif hann hefur haft á líf
sitt og fjölskyldu sinnar. Sigrún
segir umfjöllunina í gær hafa vakið
jákvæð viðbrögð víða og meðal
annars hafi skólinn fengið upp-
hringingu frá Fræðslumiðstöð
Reykjavíkur þar sem óskað var til
hamingju með framtakið. Þá segir
hún nemendafélag skólans hafa
fært Ingveldi blómvönd sem þakk-
lætisvott fyrir að hafa frætt nem-
endurna svona vel.
Sterk viðbrögð
Hún segir krakkana sjálfa hafa
komið með uppástungur í haust
um hvaða málefni þeir gætu hugs-
að sér að styrkja.
„Það voru þrjú eða fjögur verk-
efni sem voru oftast nefnd en síð-
an völdu þau út félagasamtökin
Umhyggju vegna þess að þeim
fannst gott að það væru íslensk
börn sem jafnvel væru þeirra jafn-
aldrar sem nytu góðs af söfnun-
inni. Við notuðum þá tækifærið til
þess að fræðast um þessi samtök
og fengum fulltrúa frá
Umhyggju til að
kynna starfið fyrir
krökkunum.“
Í framhaldi af því
fæddist sú hugmynd
að fá Ingveldi til að
segja krökkunum frá
sér og sjúkdómi sín-
um. „Við þorðum
varla að vonast eftir
jákvæðu svari en hún
var bara strax til í að
hugsa málið,“ segir
Sigrún og bætir því
við að Ingveldur hafi
verið mjög sjálfstæð í
undirbúningnum fyrir
fyrirlestrana. Við-
brögð áheyrendanna hafa líka ver-
ið sterk. „Ég held að ég muni
varla eftir að hafa verið viðstödd
kennslustund sem hafði svona mik-
il áhrif á þá sem voru þarna því
þau voru greinilega hrærð.
Og mér finnst þetta ná svo vel
þessum markmiðum sem eru í lífs-
leikninámsefninu að læra svolítið
um lífið sjálft því þarna fá þau inn-
sýn í hvaða áhrif veikindi og lang-
vinnir sjúkdómar hafa á fjölskyld-
una og á einstaklinginn sem er
með sjúkdóminn.“
Vantar ennþá vinnustaði
En út á hvað gengur sjálft verk-
efnið? „Verkefnið felst í því að við
fáum foreldra í lið með okkur til
þess að leita að vinnustöðum sem
eru tilbúnir til að taka krakka í
vinnu í tvo daga núna í maímánuði.
Við erum svona rétt að byrja að
leita hófanna með vinnustaði og
okkur vantar vinnustaði enn þá
sem væru tilbúnir að taka við
tveimur til allt að sjö krökkum í
einu í tveggja daga vinnu og í
staðinn að styrkja þessa söfnun
sem við ætlum að standa fyrir til
styrktar Umhyggju.“
Sigrún segir krakkana taka
söfnunina mjög alvarlega enda hafi
tilgangur hennar orðið mun raun-
verulegri vegna heimsóknar Ing-
veldar.
Söfnunarátak tíunda bekkjar
Réttarholtsskóla
Fannst mikil-
vægt að styrkja
íslensk börn
Sigrún Ágústsdóttir
námsráðgjafi.
ÞAÐ er margt spennandi sem börnin fá að reyna í
Húsdýragarðinum og þangað er gaman að sækja á
góðviðrisdögum. Þar eru mörg skrýtin og skemmti-
leg kvikindi á ferð sem gaman er að fylgjast með.
Ekki er síður spennadi að fá að gefa dýrunum að
éta og gefa þeim jafnvel úr lófanum. Þessi mynd-
arlegi hani virti gaumgæfilega fyrir sér góðgætið
sem gestirnir reiddu fram og lét sér vel líka, þótt
hann sé líklega vanari því að gæslufólk garðsins
beri fram hnossgætið.
Morgunblaðið/Ómar
Hana boðið hnossgæti í Húsdýragarðinum
FJÖLSKIPAÐUR dómur Héraðs-
dóms Reykjavíkur dæmdi í gær tvo
tæplega þrítuga karlmenn í fangelsi
fyrir peningaþvætti í tengslum við hið
svokallaða stóra fíkniefnamál. Annar
þeirra var dæmdur til 15 mánaða
fangelsisvistar en hinn hlaut sex mán-
aða fangelsi, fjórir mánuðir af refs-
ingunni eru skilorðsbundnir.
Sannað þótti að sá sem hlaut
þyngri dóminn hefði skipt rúmum 12
milljónum krónum í erlenda mynt
þótt hann hlyti að vita að féð væri af-
rakstur fíkniefnabrota. Sakfelldi
dómurinn ákærða fyrir 61 brotatilvik
á tveggja ára tímabili, 1997-1999
Í niðurstöðu dómsins kemur fram
að ákærði hafi skipt 100 til 500 þús-
und krónum í hvert skipti, en það
voru peningar sem Sverrir Þór Gunn-
arsson, einn aðalsakborninga í stóra
fíkniefnamálinu, aflaði í fíkniefnavið-
skiptum. Upplýst var að suma daga
hafi ákærði farið margar ferðir í
banka sama daginn. Stundum liðu fáir
dagar á milli, oft um hálfur mánuður
en stundum einn til þrír mánuðir.
Taldi dómurinn að hér væri um að
ræða samfellda háttsemi og var brot-
ið því metið sem framhaldsbrot.
Ákærði hefur frá árinu 1990 alls 13
sinnum hlotið refsingar fyrir ýmis
brot.
Hinn maðurinn sem héraðsdómur
sakfelldi í gær flutti jafnvirði rúmlega
fjögurra milljóna króna frá Íslandi til
Hollands sumarið 1999. Hann var þá
skipverji á Helgafelli. Þetta gerði
hann að beiðni Rúnars Bens Maits-
land sem var í fyrra dæmdur í fjög-
urra ára fangelsi fyrir aðild sína að
stóra fíkniefnamálinu en féð var
ávinningur fíkniefnaviðskipta Sverris
Þórs Gunnarssonar.
Í niðurstöðum dómsins kemur
fram að Rúnar Ben hafi áður beðið
hann um að flytja fíkniefni til landsins
en hann ávallt neitað. Þá var hann eitt
sinn með Rúnari Ben í bifreið þegar
lögreglan stöðvaði hana og gerði leit
að fíkniefnum. Honum hafi einnig
verið kunnugt um að Rúnar Ben hafði
ekki atvinnu. Í dómnum segir að mað-
urinn hefði mátt gera sér ljóst að féð
tengdist fíkniefnaviðskiptum.
Maðurinn neitaði að hafa vitað að
féð tengdist fíkniefnaviðskiptum en
dómnum þóttu útskýringar hans ekki
trúverðugar.
Héraðsdómararnir Hjördís Há-
konardóttir, dómsformaður, Finnur
Torfi Hjörleifsson og Ólafur Börkur
Þorvaldsson kváðu upp dómana.
Tveir dæmdir fyrir peningaþvætti
Annar var dæmdur
í 15 mánaða fangelsi