Morgunblaðið - 25.01.2002, Blaðsíða 12

FRÉTTIR
12 FÖSTUDAGUR 25. JANÚAR 2002 MORGUNBLAÐIÐ
EKKI voru teknar ákvarðanir í gær
á stjórnarfundi Varðar, fulltrúaráðs
sjálfstæðisfélaganna í Reykjavík,
um hvort fallið verður frá hug-
myndum um að halda forustu-
prófkjör á vegum Sjálfstæðisflokks-
ins í Reykjavík fyrir borgarstjórnar-
kosningarnar í vor. Stjórnin hafði
áður samþykkt að leggja til við full-
trúaráð að halda leiðtogaprófkjör
um 1. sætið á framboðslistanum en í
ljósi þess að Inga Jóna Þórðardóttir
og Eyþór Arnalds hafa bæði hætt
við þátttöku og lýst stuðningi við
Björn Bjarnason, hefur verið rætt
um að falla frá tillögunni um próf-
kjör.
Gengið verður formlega frá hvaða
aðferð verður viðhöfð um val á fram-
boðslista sjálfstæðismanna fyrir
borgarstjórnarkosningarnar á kjör-
dæmisþingi næstkomandi laugardag
en þar mun stjórn fulltrúaráðsins
leggja tillögu sína fyrir aðalfund.
Höldum okkar striki
Margeir Pétursson, formaður
stjórnar fulltrúaráðsins, sagði eftir
fundinn í gær að ekki hafi verið
ákveðið á þessum fundi að falla frá
fyrirhuguðu leiðtogaprófkjöri og
benti hann jafnframt á að það hafi í
sjálfu sér aldrei verið samþykkt
formlega að halda slíkt prófkjör.
Auk þess hafi heldur ekki verið aug-
lýst eftir framboðum. ,,Við vorum
bara að ræða stöðu mála,“ sagði
hann um fundinn og sagði að málin
myndu skýrast á kjördæmisþinginu
um helgina. ,,Það er engin pressa á
okkur. Við bara höldum okkar
striki,“ sagði hann.
Stjórn fulltrúaráðsins beindi því
til kjörnefndar fyrr í þessum mán-
uði að fulltrúaráðsmenn, sem eru
um 1.400 að tölu, verði beðnir um að
stinga upp á 2 til 4 nöfnum sem þeir
vilja sjá ofarlega á lista flokksins í
vor. Að sögn Margeirs er þessi
vinna nú í fullum gangi og eiga nið-
urstöður að liggja fyrir hjá kjör-
nefnd 6. febrúar. Margeir sagði að
þessi tilnefningaraðferð hefði fallið í
góðan jarðveg og gengi vel. ,,Í sjálfu
sér hefði prófkjör um fyrsta sætið
leitt það í ljós úr hvað miklu mann-
vali er að spila hjá Sjálfstæðis-
flokknum hér í borginni,“ sagði
Margeir.
Reglurnar ekki hugsaðar fyrir
einstaka frambjóðendur
,,Við vorum bara að ræða málin
og þá breyttu stöðu sem komin er
upp,“ sagði Stefanía Óskarsdóttir,
formaður Hvatar, félags sjálfstæð-
iskvenna í Reykjavík og fulltrúi í
kjörnefnd í gær. Hún sagði að fram-
boðsmálin í Reykjavík væru á góðri
siglingu. ,,Þegar við gerðum tillögur
um hvernig við myndum haga okkar
framboðslista og reglum um val full-
trúa á hann þá vorum við ekkert að
hugsa þær reglur fyrir einstaka
frambjóðendur, heldur að setja upp
ákveðna aðferð sem við töldum að
myndi virka best og tryggja sem öfl-
ugastan lista,“ sagði hún.
Stefanía sagði aðspurð að ákvörð-
un Ingu Jónu um að draga framboð
sitt til baka hafi komið henni á
óvart. ,,Það er augljóst að hún taldi
að þetta væri flokknum fyrir bestu.
Hún er ennþá með í leiknum og býr
yfir mikilli reynslu og er öflugur
talsmaður fyrir Sjálfstæðisflokkinn.
Hún á marga stuðningsmenn og það
er gott að vita að hún er ennþá
með,“ sagði Stefanía.
Er hún var spurð um þá yfirlýs-
ingu Ingu Jónu Þórðardóttur að
lýsa sig reiðubúna að skipa 8. sætið
sagði Stefanía að ef ákveðið verði að
viðhafa uppstillingu í Reykjavík sé
það algerlega í höndum kjörnefnd-
ar. ,,Þetta er ein af þeim mörgu
ábendingum sem kjörnefnd mun
taka við en við búumst við ábend-
ingum frá 1.400 manns um eitt til
fjögur nöfn þannig að það verður
sjálfsagt úr mjög mörgum nöfnum
að velja.“
Morgunblaðið/Ásdís
Stjórn Varðar, fulltrúaráðs sjálfstæðisfélaganna í Reykjavík, kom saman til fundar í Valhöll í hádeginu í gær til
að ræða stöðu framboðsmála vegna borgarstjórnarkosninganna í vor. 20 fulltrúar eiga sæti í stjórninni.
Afstaða til leiðtogapróf-
kjörs tekin á laugardag
Rætt var um framboðsmál á stjórnarfundi Varðar í gær
„OKKUR þykir leitt að farþegar
okkar hafi orðið fyrir óþægindum
og er eðlilegt að þeir hafi orðið ótta-
slegnir,“ segir Guðjón Arngrímsson,
upplýsingafulltrúi Flugleiða, um
það atvik þegar flugmenn vélar
Flugleiða, Boeing 757, hættu
skyndilega við lendingu á Gard-
ermoen- flugvellinum í Ósló í Noregi
á þriðjudag og „kipptu“ vélinni
snöggt aftur upp, flugu einn hring í
kringum flugvöllinn áður en þeir
lentu vélinni „með eðlilegum hætti“.
Að sögn Guðjóns voru um 75 farþeg-
ar í vélinni þegar þetta gerðist.
Frá atvikinu er greint í norska
netmiðlinum Dagsavisen og vitnað í
einn farþeganna, Helge H. Wilter
sem lýsir því að mikil skelfing hafi
gripið um sig meðal farþeganna
þegar vélin hafi verið „rifin“ upp
aftur. „Einhverjir hrópuðu og æptu
og aðrir báðu til Guðs...“, er m.a.
haft eftir Wilter sem lýsir því einnig
að farangur, bækur, blöð, bjórdósir
og annað lauslegt hafi kastast til um
farþegarýmið. Wilter segir að hann
hafi haldið að vélin væri að hrapa og
því verið þeirri stund fegnastur
þegar vélin var loksins lent.
„Þegar vélin snerti loksins flug-
brautina föðmuðum við hvert annað
í gleði yfir því að vera á lífi.“ Wilter
gagnrýnir það að farþegarnir hafi
ekki fengið skýringar á því hvað
hefði gerst. „Ég hélt um tíma að
þetta væri mitt síðasta.“
Grunur um bilun
í aðflugsbúnaði
Guðjón segir í samtali við Morg-
unblaðið að flugvélin hafi verið í
venjulegu áætlunarflugi til Ósló
þegar atvikið varð. Klukkan var
rúmlega tíu um morgun og var að
sögn Guðjóns fremur lágskýjað yfir
borginni og slydda. „Þegar vélin var
í rúmlega þúsund feta hæð fengu
flugmenn grun um bilun í að-
flugsbúnaði. Þeir tóku því ákvörðun
um að hætta við lendingu og kipptu
vélinni upp aftur,“ segir hann og
skýrir frá því að þegar flugvélin er
„rifin“ svo snöggt upp þrýstist far-
þegarnir ofan í sætin. Þegar síðan
vélinni er náð upp og jafnvægi næst
lyftast farþegarnir upp aftur og þeir
fá eins konar „sviftilfinningu“ og
lausir hlutir færast til. „Það er mjög
eðlilegt að fólk verði skelkað við
þessar aðstæður,“ útskýrir hann.
Guðjón segir það mjög sjaldgæft
að svona atvik eigi sér stað en hann
bendir á að flugmennirnir hafi
brugðist hárrétt við. „Flugmenn-
irnir töldu að aðflugsbúnaðurinn
gæfi ekki til kynna réttar upplýs-
ingar og því var ákveðið að kippa
vélinni upp aftur. Það voru fyr-
irbyggjandi aðgerðir til að forðast
hættu.“ Guðjón segir að flugmenn-
irnir hafi síðan flogið vélinni einn
hring og lent henni nokkrum mínum
síðar með eðlilægum hætti. „Vélin
var skoðuð í Ósló og búnaðurinn
prófaður. Hann reyndist í lagi þann-
ig að vélin hélt áfram til Stokkhólms
svo heim til Íslands síðdegis sama
dag.“
Flugstjóri skýrði frá atvikinu
Aðspurður segir Guðjón það ekki
rétt sem haft er eftir Wilter í norska
netmiðlinum Dagsavisen að farþeg-
ar hafi ekki fengið neinar upplýs-
ingar um það sem gerðist. „Flug-
stjórinn skýrði frá því sem gerðist
áður en vélin lenti í Ósló en ef til vill
hafa farþegarnir verið í það miklu
uppnámi að þau boð hafi ekki kom-
ist nægilega vel til skila,“ segir Guð-
jón og bætir því við að flugfreyj-
urnar hafi auk þess rætt við farþega
á leið út úr vélinni. „Auðvitað er þó
atvik sem þetta hvimleitt en það er
ekki við neinn að sakast. Viðbrögð
flugmannanna voru hárrétt.“
Í Dagsavisen er haft eftir fulltrúa
Flugleiða í Noregi að félagið muni
hafa samband við alla farþega vél-
arinnar og útskýra hvað hefði gerst
en aðspurður segir Guðjón að engin
ákvörðun hefði verið tekin um það
meðal stjórnenda félagsins.
Flugleiðavél með um 75 farþega innanborðs hætti skyndilega við lendingu í Ósló
Farþegar föðmuðust þegar
vélin var lent heilu og höldnu
Eðlilegt að fólk verði skelkað
við þessar aðstæður, segir
upplýsingafulltrúi Flugleiða
LÖGREGLAN í Reykjavík hefur
lokið rannsókn sinni á flugslysinu í
Skerjafirði hinn 7. ágúst árið 2000
þegar einshreyfils flugvélin TF-
GTI hrapaði í sjóinn. Sex manns
létust af völdum flugslyssins.
Á næstu dögum verður tekin
ákvörðun um hvort og þá hver
verður ákærður og fyrir hvaða.
Einnig kemur til greina að senda
málsgögnin til ríkissaksóknara.
Rannsókn lögreglu hófst eftir að
aðstandendur þeirra sem létust í
flugslysinu kærðu flugrekanda og
flugrekstrarstjóra Leiguflugs Ís-
leifs Ottesen og forstöðumann við-
haldsverkstæðis flugvéla fyrir
refsiverðan verknað.
Að sögn Egils Stephensens, sak-
sóknara hjá lögreglustjóranum í
Reykjavík, hefur rannsóknin verið
tímafrek m.a. sökum þess að um af-
ar óvenjulegt mál er að ræða fyrir
lögreglu og ákæruvald.
„Þetta varðar mjög flókna lög-
gjöf, bæði loftferðalögin og aragrúa
fyrirmæla sem gefin hafa verið út
af Flugmálastjórn sem aftur styðj-
ast við reglur frá Alþjóðaflugmála-
stofnuninni,“ segir hann. Í löggjöf-
inni séu víða að finna almennar
lýsingar sem gefa nokkuð svigrúm
á því hvaða reglur gilda um flug-
rekstur. Þá sé ekki að fullu ljóst
hvernig farið er eftir reglunum í
reynd og hvaða kröfur Flugmála-
stjórn gerir til flugrekanda. Því
geti reynst erfitt að átta sig á því
hvort tiltekið atvik í rekstri flug-
félags sé refsivert. Sömuleiðis þurfi
að ganga úr skugga um að merking
reglna hafi ekki brenglast þegar
þær voru þýddar úr ensku í ís-
lensku. Segir Egill að m.a. af þess-
um sökum hafi allmörgum spurn-
ingum verið beint til Flugmála-
stjórnar.
Áður en lögregla gat lokið rann-
sókninni varð skýrsla rannsóknar-
nefndar flugslysa að liggja fyrir
auk þess sem bíða þurfti eftir svör-
um frá Flugmálastjórn. Eftir að
skýrslan og svörin bárust lögreglu
þurfti ennfremur að taka afstöðu til
þess hvaða áhrif þau hefðu á gang
rannsóknarinnar.
Að auki bárust lögreglu fjöl-
margar ábendingar frá aðstand-
endum þeirra sem létust í flugslys-
inu og tók nokkurn tíma að vinna
úr þeim. Ein slík ábending laut að
framburði kafara frá Slökkviliði
höfuðborgarsvæðisins en aðstand-
endur beindu því til samgönguráð-
herra að þeir gæfu skýrslu hjá lög-
reglu og varð lögregla við því.
Auk þess sem hinir kærðu hafa
verið yfirheyrðir hafa verið teknar
skýrslur af vitnum, þeim sem komu
að fluginu bæði í Reykjavík og í
Vestmannaeyjum og fleirum.
Lögreglurannsókn á
flugslysinu í Skerjafirði lokið
Ákvörðun um
framhald tekin
á næstu dögum
HÉRAÐSDÓMUR Reykjavíkur
úrskurðaði í fyrradag tvítugan
mann í sex vikna gæsluvarðhald,
að kröfu lögreglunnar í Reykjavík
vegna ítrekaðra auðgunarbrota að
undanförnu
Hann var handtekinn ásamt öðr-
um manni á miðvikudagsmorgun
eftir innbrot í verslunina Office 1 í
Skeifunni. Um er að ræða síbrota-
gæslu og eru fleiri mál á hendur
honum í ákærumeðferð. Stefnt að
því að dómur gangi í málum hans
áður en gæsluvarðhaldið rennur
út.
Hinn maðurinn var frjáls ferða
sinna að loknum yfirheyrslum hjá
lögreglu.
Í gæslu-
varðhaldi
vegna auðg-
unarbrota
♦ ♦ ♦
LÖGREGLAN í Hafnarfirði var
kölluð til átta sinnum, frá morgni til
klukkan 17 í gær, vegna sinuelda
víðsvegar í umdæminu. Um minni-
háttar bruna var að ræða en fjöldi
útkalla í vikunni er orðinn um tveir
tugir og hefur Slökkviliðið á höfuð-
borgarsvæðinu verið beðið um að-
stoð í nokkrum tilvikanna.
Lögreglan segir að krakkar séu að
fikta við íkveikju og hvetur foreldra
til að fyrirbyggja slíkan óvitaskap
sem getur farið úr böndunum með
ófyrirséðum afleiðingum.
Átta útköll
vegna
sinuelda
SEX innbrot höfðu verið tilkynnt til
lögreglunnar í Reykjavík seinnipart-
inn í gær, þar af fjögur í bíla við Sól-
tún, Jórufell, Nóatún og Kringluna.
Brotist var inn í tvo söluturna en
engu var stolið. Úr bílunum var hins
vegar stolið verðmætum, þar á með-
al voru teknir 100 geisladiskar og
magnari úr bíl við Kringluna. Er
tjónið talið nema 150 þúsund krón-
um.
100 geisladisk-
um stolið úr bíl
♦ ♦ ♦