Morgunblaðið - 06.02.2002, Page 10

FRÉTTIR
10 MIÐVIKUDAGUR 6. FEBRÚAR 2002 MORGUNBLAÐIÐ
SALA hlutabréfa ríkisins í Landssíma
Íslands kom enn til umræðu á Alþingi í
gær, nú við upphaf þingfundar. Össur
Skarphéðinsson, formaður Samfylk-
ingarinnar, vakti þá máls á því að í
fréttaskeyti Reuters-fréttastofunnar
væri haft eftir forstjóra Tele Danmark
(TDC), Henning Dyremose, að viðræð-
ur um kaup fyrirtækisins á Landssím-
anum stæðu ekki yfir og ljóst væri að
ekkert yrði af þeim miðað við það verð
sem sett væri upp.
„Eru viðræður um söluna sigldar í
strand eða ekki? Eru viðræðurnar
sjálfdauðar? Eru viðræður í gangi?
Er verið að selja Símann eða er ekki
verið að selja Símann?“ spurði Össur
sem sagði allt söluferli Símans „sög-
una endalausu“ og „fullkomið klúður“
og vísaði til þess að samgönguráð-
herra hefði í síðustu viku haldið því
fram að allt væri í fullum gangi og rík-
isstjórnin héldi sínu striki.
Sagði hann vá fyrir dyrum; fram-
ganga ráðherrans væri með ólíkind-
um en mest væri ábyrgðin þó einka-
væðingarnefndar sem haft hefði
íslensku þjóðina að fíflum og ætti að
skammast sín.
Sturla Böðvarsson (D) samgöngu-
ráðherra vísaði í svari sínu til yfirlýs-
ingar framkvæmdanefndar um einka-
væðingu þar sem fram kemur m.a. að
viðræður við TDC um viðskipti með
fjórðungshlut í Landssíma Íslands
standi enn. Jafnframt áskilji nefndin
sér rétt til viðræðna við aðra aðila
sem sýnt hafa sölunni áhuga.
„Í tilkynningu til Verðbréfaþings
um málið kemur fram að Pricewater-
houseCoopers hefur fyrir hönd fram-
kvæmdanefndar um einkavæðingu
sent TDC bréf þar sem fyrirtækinu
var greint frá að á næsta viðræðu-
fundi yrði farið yfir niðurstöðu árs-
reiknings 2001 og endurskoðaða
rekstraráætlun 2002 en hvort tveggja
verður tilbúið fljótlega,“ sagði sam-
gönguráðherra.
Hann sagði einnig að TDC hafi verið
greint frá því að framkvæmdanefnd
um einkavæðingu áskildi sér rétt til að
eiga viðræður við aðra aðila sem sýnt
hafa sölunni áhuga að undanförnu.
„Því er rangt að viðræðum við TDC
hafi verið slitið af hálfu nefndarinnar.
Þá er það miður að TDC virðist að und-
anförnu kjósa að bera nefndinni skila-
boð í gegnum fjölmiðla. Nefndin mun á
fundi síðar í vikunni taka ákvörðun um
framhald málsins.“
Ummæli samgönguráðherra vöktu
mikla athygli og voru þeir Össur
Skarphéðinsson og Steingrímur J.
Sigfússon, formaður Vinstri grænna,
sammála um að þau fælu í sér ákaf-
lega mikil pólitísk tíðindi. Í reynd
hefði viðræðum við TDC verið slitið
og opnað á það að ræða um söluna við
fleiri aðila. Hvöttu margir úr röðum
stjórnarandstöðunnar til þess að
stjórnvöld létu sér þetta að kenningu
verða, hægðu nú á söluferlinu og end-
urmeti stöðuna. Sagðist Steingrímur
J. gráta það þurrum tárum að viðræð-
ur við danska „einokunarfyrirtækið“
hefðu nú siglt í strand og hver einasta
frétt af söluferlinu hafi falið í sér klúð-
ur og vandræðagang.
„Vandinn er mikill, enda verðið í
lágmarki og kaupendur týna tölunni,“
sagði Guðmundur Árni Stefánsson
(S) sem sagði rétt að gaumgæfa nú
næstu skref og að því verki þyrfti Al-
þingi að koma, enda væri ljóst að rík-
isstjórnin geti ekki klárað það verk og
„allra síst samgönguráðherra“ eins
og hann orðaði það. Stjórnarandstað-
an kallaði mjög eftir sjónarmiðum
framsóknarmanna í umræðunni og
sagði Guðmundur Árni að þögn
þeirra væri hrópandi. Tók þó enginn
þeirra til máls.
„Hvaða vá er fyrir dyrum?“
Davíð Oddsson (D) forsætisráð-
herra gat þess þó að ummæli Magn-
úsar Stefánssonar (B) varaformanns
stjórnar Símans á þingi í fyrri viku
hefðu verið fullkomlega eðlileg, enda
hefði hann aðeins sagt að ef ekki feng-
ist rétt verð yrði fyrirtækið ekki selt.
Taldi hann aldeilis fráleitt að tala sem
svo að mikil vá væri fyrir dyrum og
bað menn að spara þau stóru orð sem
notuð hefðu verið í umræðunni.
„Menn selja þetta fyrirtæki ef þeir
eru sáttir við verðið. Ella verður það
ekki selt. Hvaða vá er fyrir dyrum,
ekki nokkur einasta,“ sagði hann.
Forsætisráðherra ítrekaði að við-
ræður stæðu enn yfir við fulltrúa
danska fyrirtækisins. „Viðræður eru
þessa stundina í gangi og allt er í góðu
lagi, vegna þess að að það er í fínu lagi
að viðræður séu í gangi meðan menn
vita hvað þeir eru að gera og ætla ekki
að selja fyrirtækið nema þeir fái það
verð sem þeir vilja. Og það er ekki
nokkur vá fyrir dyrum,“ sagði hann.
Sala hlutabréfa ríkisins í Landssíma Íslands enn rædd á Alþingi í gær
Einkavæðingarnefnd
geti rætt við fleiri aðila
ÞEIR voru kampakátir á göngum
alþingishússins eftir atkvæða-
greiðslu í gær, bræðurnir Gunnar
Birgisson og Kristinn H. Gunn-
arsson, enda höfðu þingmenn
samþykkt með ríflegum meiri-
hluta að senda frumvarp um lög-
leiðingu ólympískra hnefaleika til
þriðju og síðustu umræðu. Bræð-
urnir hafa lengi barist fyrir þessu
máli á þingi, fyrst Kristinn H. fyr-
ir mörgum árum en svo Gunnar
bróðir hans sl. þrjú ár. Hér fagna
þeir niðurstöðunni í gær og
standa þeir Guðmundur Hall-
varðsson, Kristján L. Möller og
Magnús Stefánsson á milli þeirra.
Athygli vakti að Guðmundur
studdi frumvarpið í gær, en hann
hefur til þessa verið einn helsti
andstæðingur þess á þingi.
Morgunblaðið/Sverrir
Kampakátir
eftir
atkvæða-
greiðslu
SÓLVEIG Pétursdóttir (D) dóms-
málaráðherra mælti í gær fyrir
frumvarpi til laga um breytingar á
lögum um kirkjugarða, greftrun og
líkbrennslu.
Í frumvarpinu er m.a. lagt til að
dreifing ösku verði heimiluð sam-
kvæmt nánari reglum. Einnig er
lagt til að breyting verði gerð á
skipan skipulagsnefndar kirkju-
garðanna sem einnig taki við hlut-
verki stjórnar Kirkjugarðasjóðs.
Þá er lagt til að skyldur sveitarfé-
laga í tengslum við nýja kirkju-
garða verði skilgreindar nánar og
ráðgert að sett verði almenn reglu-
gerð um umgengni í kirkjugörðum
sem allir kirkjugarðar geti notast
við ef þeir sjái ekki ástæðu til að
setja auknar eða sérstakar reglur.
Ekki krafa úr samfélaginu um
að dreifa megi ösku
Í umræðunni í gær tóku tveir
prestlærðir þingmenn Samfylking-
arinnar, þeir Karl V. Matthíasson
og Gunnlaugur Stefánsson vara-
þingmaður, til máls og lýstu efa-
semdum sínum um breytingar að
því er varða rétt til þess að dreifa
ösku látinna manna. Guldu þeir
varhug við slíkum breytingum án
vandlegrar umræðu, enda lægi
ekki fyrir krafa um þær úr sam-
félaginu.
Í athugasemd með þeirri grein
frumvarpsins er á það bent, að er-
lendis sé algengt að ösku látinna
manna sé dreift á tiltekið afmarkað
svæði í kirkjugarði án þess að
nokkur nafngreining eigi sér stað
um það hverjir hvíli þar. Margir
óski þess að askan sé látin hvíla
innan um ösku annarra ónafn-
greindra látinna manna. Nokkur
dæmi séu um að beiðni hafi komið
fram um slíkt hér, en í 3. mgr. 27.
gr. laganna sé að finna heimild fyr-
ir greftrun líka á slíku svæði. Eðli-
legt þyki að sama eigi við, hvort
heldur um ösku eða jarðneskar
leifar látinna manna er að ræða.
Öskudreifing heimil
á Vesturlöndum, þó
ávallt með skilmálum
„Núgildandi lög heimila ekki
dreifingu ösku. Margir hafa bent á,
og skírskota þá í því sambandi m.a.
til trúfrelsis, að þeir sem vilja af
trúarlegum ástæðum láta dreifa
öskunni ættu að geta fengið þá ósk
uppfyllta. Í flestum vestrænum
ríkjum hefur almenna þróunin orð-
ið sú að heimila öskudreifingu, en
þó ávallt með skilmálum. Sums
staðar er þess krafist að fyrir liggi
skrifleg beiðni eða samþykki hins
látna, en annars staðar er talið
nægilegt að nánustu aðstandendur
staðfesti að það hafi verið vilji hins
látna að öskunni yrði dreift,“ segir
þar ennfremur og lögð til sú breyt-
ing á lögunum að ráðherra geti
samkvæmt nánari reglum heimilað
að ösku verði dreift. Gert er ráð
fyrir að þá er beiðandi leggur fram
umsókn verði honum gert ljóst að
ekki sé heimilt að dreifa ösku yfir
byggð eða væntanlega byggð, held-
ur aðeins yfir haf og óbyggðir. Þá
verði einnig gerð grein fyrir því að
dreifingin skuli fara fram með
sómasamlegum hætti þar sem ask-
an geymi jarðneskar leifar látins
manns.
Lagafrumvarp kirkjumálaráðherra um
kirkjugarða, greftrun og líkbrennslu
Leggur til að
dreifing ösku
verði heimiluð
ALÞINGI samþykkti í gær að vísa
frumvarpi til laga um lögleiðingu
ólympískra hnefaleika til 3. og síð-
ustu umræðu. Jafnframt var sam-
þykkt að breyta nafni frumvarpsins
þannig að það vísi til áhugahnefa-
leika en ekki ólympískra hnefaleika,
eins og upphaflega stóð í frumvarp-
inu. Breytingartillaga Katrínar
Fjeldsted (D) var felld, en hún
gerði ráð fyrir banni við keppni í
hnefaleikum en þó mætti þjálfa og
stunda æfingar á þeim.
Ríflegur meirihluti var fyrir
ákvörðuninni og sé eitthvað að
marka atkvæðagreiðsluna í gær,
má búast við því að bann við hnefa-
leikum áhugamanna verði fellt úr
gildi með lagasetningu Alþingis
fljótlega eftir helgi, en þriðja um-
ræða um frumvarpið fer fram á
mánudag.
Gunnar Birgisson, þingmaður
Sjálfstæðisflokksins, er fyrsti flutn-
ingsmaður frumvarpsins sem lagt
var fram á Alþingi í þriðja sinn
óbreytt sl. haust.
Nokkur styrr hefur jafnan staðið
um efni þess þegar það hefur komið
til umræðu í þingsal og afstaða þess
verið þverpólitísk. Stuðningsmönn-
um þess hefur greinilega fjölgað frá
því það kom til afgreiðslu á Alþingi
fyrir tveimur árum. Þá var það fellt
í atkvæðagreiðslu eftir aðra um-
ræðu 14. maí með 27 atkvæðum
gegn 26. Nokkrir þingmenn sem
greiddu atkvæði gegn frumvarpinu
þá voru meðal stuðningsmanna
þess nú.
Hnefaleikar áhugamanna
Bann fellt úr
gildi eftir helgi?
Lög um
útlendinga
DÓMSMÁLARÁÐHERRA
mælti í gær fyrir viðamiklu
frumvarpi til laga um útlend-
inga. Það kom fram á síðasta
þingi en varð ekki útrætt í mikl-
um önnum sl. vor. Frumvarpið
felur í sér heildarendurskoðun
á lögum um eftirlit með útlend-
ingum, nr. 45 12. maí 1965, og er
því ætlað að leysa þau af hólmi.
Í því er að finna reglur um rétt-
arstöðu útlendinga hér á landi,
við komu þeirra, dvöl og brott-
för.
Gert er ráð fyrir breyttu
heiti á Útlendingaeftirlitinu
sem farið hefur með fram-
kvæmd laga um eftirlit með út-
lendingum. Þá eru í frumvarp-
inu settar reglur um rétt
flóttamanna til hælis hér á
landi og um vernd gegn ofsókn-
um.
Baráttan gegn
hryðjuverkum
Sólveig Pétursdóttir dóms-
málaráðherra mælti einnig fyr-
ir frumvarpi um breytingu á al-
mennum hegningarlögum og
lögum um refsiábyrgð lögaðila
vegna mútugreiðslu til opin-
bers starfsmanns (hryðjuverk).
Markmið frumvarpsins er að
gera nauðsynlegar breytingar
á lögum til þess að íslenska rík-
ið uppfylli skuldbindingar sam-
kvæmt þremur alþjóðasam-
þykktum á vegum Sameinuðu
þjóðanna gegn hryðjuverkum.