Morgunblaðið - 13.08.2002, Qupperneq 15

AKUREYRI
MORGUNBLAÐIÐ ÞRIÐJUDAGUR 13. ÁGÚST 2002 15
Skógarhlíð 18, sími 595 1000. www.heimsferdir.is
Heimsferðir bjóða einstakt
tækifæri til að ferðast til eins frægasta heilsubæjar á Ítalíu,
Salsomaggiore. Í næsta nágrenni eru 7 golfvellir og einstök aðstaða er til
heilsuræktar og heilsubaða á hótelum Heimsferða og í miðbænum. Hér
er stórkostlegt umhverfi, gamli bærinn
í 5 mínútna göngufæri frá hótelunum
með veitingastöðum, verslunum,
skemmtistöðum og heillandi mannlífi.
Aðeins 50 sæti í boði
Spa-ið
Dæmi um heilsumeðferðir á
hótelum Heimsferða:
Leirbað og háþrýstinudd: EUR: 52.
Spa, bað og heilnudd: EUR: 63.
Spa-húsið í Salsomaggiore, Terme
Salsomaggiore, er víðfrægt. Það er í
hjarta bæjarins, stór, glæsileg
bygging þar sem þú getur valið um
margvíslegar heilsumeðferðir.
Vatnið í bænum er frægt fyrir
efnainnihald sitt.
Golfið
6x18 holu og 1x9 holu golfvellir í næsta
nágrenni, í u.þ.b. 5–90 kílómetra fjarlægð.
Vallargjald á hring EUR 33.50.
4 daga golfpakki á eftirtalda velli:
· Salsomaggiore Golf and Country Club.
· Golf Club Sastell 'Arquato.
· La Rocca Golf Club.
· Salsomaggiore Golf and Country Club.
Verð 19.900 kr. á mann.
Innifalið: Vallargjöld og akstur til og frá
golfvöllum.
Hótel Heimsferða
Hotel Valentini ****
Fallegt hótel í gamaldags stíl við gamla
bæinn í Salsomaggiore. Þægileg herbergi
með allri þjónustu, bað, sjónvarp, sími. Á
hótelinu er veitingastaður, bar og
spa/heilsurækt.
Verð kr. 49.950.
Grand Hotel Porro ****+
Fallegt 4 stjörnu hótel við hliðina á hótel
Valentini í glæsilegum gömlum stíl. Öll
herbergi nýinnréttuð. Sjónvarp, sími, loft-
kæling, minibar. Á hótelinu er
veitingastaður, bar og spa/heilsurækt.
Verð kr. 62.850.
Innifalið í verði:
Flug, gisting með morgunverði í 7 nætur,
fararstjórn, ferðir til og frá flugvelli
erlendis, flugvallarskattar og gjöld.
Ekki innifalið:
Spa, heilsumeðferðir, vallargjöld á
golfvöllum, akstur til og frá golfvöllum
og kynnisferðir.
Golf og spa á
Ítalíu
frá kr. 49.950
19. september – 7 nætur
Glæsilegir golfvellir
Golfvöllurinn í Salsomaggiore
GRÍÐARLEGUR áhugi er fyrir
hugmyndum um jarðgöng undir
Vaðlaheiði en húsfyllir var á kynn-
ingarfundi um málið sem Eyþing
stóð fyrir á Hótel KEA í gær. Sveit-
arfélög á svæðinu hafa sýnt málinu
mikinn áhuga og fyrir um einu ári
samþykkti Hálshreppur að leggja
fram 10 milljónir króna í hlutafélag
sem fyrirhugað er að stofna og vinni
að gerð og rekstri jarðganga undir
Vaðlaheiði. Kristján Þór Júlíusson,
formaður stjórnar Eyþings og bæj-
arstjóri á Akureyri, sagði á fundinum
að stefnt væri að stofnun hlutafélags
fyrir næstu áramót. Gísli Gíslason,
formaður Spalar og bæjarstjóri á
Akranesi, fór yfir sögu Spalar og
sagði m.a. að Hvalfjarðargöngin
hefðu breytt hugarfari á Vesturlandi.
Hreinn Haraldsson, framkvæmda-
stjóri þróunarsviðs Vegagerðarinn-
ar, kynnti fyrirliggjandi rannsóknir
Vegagerðarinnar vegna Vaðlaheið-
arganga, varðandi frumskoðun á
byggingu og rekstri ganganna sem
einkaframkvæmd. Í máli Hreins kom
fram að það væri vel þess virði að
skoða Vaðlaheiðargöng í einkafram-
kvæmd enda væri ljóst að slík jarð-
göng væru ekki á dagskrá í það
minnsta næsta áratuginn eða lengur,
ef ríkið ætti alfarið að taka að sér
verkefnið. Þó væri ljóst að fjárhags-
leg þátttaka ríkisins í verkefninu
sem einkaframkvæmd væri óhjá-
kvæmileg. Hefur þar verið skoðað að
framlag ríkisins af stofnkostnaði
gæti verið 25–75%.
Jarðfræðilegar
aðstæður hagstæðar
Hreinn sagði jarðfræðilegar að-
stæður almennt hagstæðar, bergið
væri víðast þétt og vatnsleki ætti því
að verða lítill. Eins og fram hefur
komið er gert ráð fyrir að göngin
verði 7,2 km löng og stytti vega-
lengdina um 15 km frá leiðinni yfir
Víkurskarð.
Hreinn sagði að umferðin væri
veigamikill þáttur, sérstaklega þegar
verið væri að reikna arðsemi í einka-
framkvæmd. Umferðin um Víkur-
skarð er að meðaltali um 800–900
bílar á dag. Samkvæmt umferðarspá
er gert ráð fyrir 25% aukningu við
opnun Vaðlaheiðarganga, 10% aukn-
ingu næsta ár á eftir, 3% aukningu
næsta ár þar á eftir og 1,4% aukn-
ingu eftir það.
Heildarkostnaður við fram-
kvæmdina, tvíbreið jarðgöng, gjald-
stöð með búnaði, rannsóknir, hönnun
og eftirlit, er áætlaður 4,4 milljarðar
króna á verðlagi síðasta árs. Árlegur
viðhalds- og rekstarkostnaður er
áætlaður 50 milljónir. „Stofnkostn-
aðurinn er nokkuð föst stærð og við
vorum t.d. aldrei hræddir við þann
lið í Hvalfirðinum á sínum tíma. Það
er hins vegar mun erfiðara að spá
fyrir um tekjuhliðina, þ.e. umferðina
um göngin.“ Hreinn sagði að Víkur-
skarð yrði áfram opið og að Grenvík-
ingar og fleiri myndu nota það áfram
en að þó færi vetrarumferðin vænt-
anlega öll í gegnum göngin.
Hreinn sagði að varðandi veggjald
um göngin hafi mörg dæmi verið
skoðuð. Sú upphæð sé háð framlagi
ríkisins og lánstíma og komi vissu-
lega til með að hafa áhrif á það
hversu margir noti göngin, líkt og í
Hvalfirði. Hann sagði Hvalfjörðinn
fyrirliggjandi dæmi en að styttingin
þar væri mun meiri en í gegnum
Vaðlaheiði.
„Við höfum talið raunhæft að tala
um að veggjald hér væri um helm-
ingur af gjaldinu í Hvalfjarðargöng-
um. Það sem skiptir líka miklu máli
er áskriftin en í lok síðasta árs voru
yfir 50% bíla sem fara um Hvalfjarð-
argöng í áskrift, þannig að meðal-
gjaldið er um 600 kr. á fólksbíl en
ekki 1.000 kr. eins og margir halda.
Við höfum stillt því upp að meðal-
gjald fyrir fólksbíl í gegnum Vaðla-
heiði yrði 300 kr. en 500 kr. fyrir ein-
stakt gjald, ef hlutfall áskriftar yrði
svipað og í Hvalfirði. Þá væru stórir
bílar að borga 1.250 kr. En hversu
langt duga þessar tekjur og ef þetta
dugir ekki, hversu hátt þarf þá gjald-
ið að vera til að tryggja afkomu fé-
lagins en þar kemur aðkoma ríkisins
til sögunnar.“
Hreinn sagði að þótt skoðaður hafi
verið mislangur endurgreiðslutími,
þ.e. tími sem vegfarandur þurfi að
greiða veggjald, hafi menn stað-
næmst við 20 ár.
Gísli Gíslason, formaður stjórnar
Spalar, sagði að í upphafi hefðu þeir
ekki verið margir sem höfðu trú á því
að unnt væri tæknilega að gera göng
undir Hvalfjörð, hvað þá að hægt
væri að láta þau borga sig með inn-
heimtu veggjalds. Hann sagði að
verkefnið hefði gengið vel, mun bet-
ur en menn þorðu að vona. Skipti þar
miklu máli vandaður undirbúningur.
Gísli sagði að umferðin um göngin
hafi aukist ár frá ári og að áhrifin séu
mun meiri en menn hafi gert ráð fyr-
ir í upphafi.
Spölur var stofnaður 1991 og í
kjölfarið var gerður samningur við
ríkið um að hafa forgöngu um verk-
efnið í ákveðinn tíma. Um 1995–1996
lá fjármögnun fyrir og var samning-
ur þá gerður við Fossvirki um verkið
í alútboði. Gísli sagði að í upphafi hafi
verið gert ráð fyrir að göngin yrðu
greidd upp á 20 árum. Miðað var við
um 1.500 bílar færu um göngin á sól-
arhring og að veggjaldið yrði um
1.000 kr. á bíl. Kostnaðurinn var
áætlaður um 5 milljarðar og stóðst
nánast upp á krónu, að sögn Gísla.
Erlend fjármögnum var um 50% og
um 48% frá lífeyrissjóðum. Eftir um
16 ár, þegar lánin hafa verið greidd,
fær ríkið göngin endurgjaldslaust til
baka.
Gísli sagði að undirbúningur
verksins hefði verið eins og best
verður á kosið og bar hann sérstakt
lof á íslensku verk- og jarðfræðinga-
stéttina. Hann sagði að alútboð
verksins, þar sem borgað var fyrir
fullgerðan hlut, hafi verið mjög dýr
aðferð. Heildarkostnaður var um 5
milljarðar króna en kostnaður við
gerð ganganna var um 3,6 milljarðar
króna. Því fóru um 1,4 milljarðar
króna í ýmis konar undirbúning, auk
þess sem lán Spalar er lúta að ganga-
gerðinni eru án ríkisábyrgðar og
vextir því hærri en ella. Gísli sagði að
lífeyrissjóðirnir hefðu komið að
þessu máli með mjög myndarlegum
hætti.
„Vegfarendur voru ekki andvígir
því að greiða gjald við að stytta leið-
ina og fara undir Hvalfjörðinn. Við
opnun ganganna kom hins vegar
strax fram gagnrýni og mönnum
fannst gjaldið of hátt. Þar sem um-
ferðin varð strax meiri en gert var
ráð fyrir gátum við lækkað gjaldið og
það hefur verið friður um gjald-
skránna.“
Gísli sagði jafnframt að töluverð
umræða hafi verið um öryggismál í
göngunum og því mikilvægt að sátt
væri um þau mál.
„Göngin hafa valdið byltingu varð-
andi búsetuskilyrði, ekki aðeins á
Akranesi, heldur nær áhrifasvæðið
til Vesturlands og Norðurlands. Það
eru úrtöluraddir og hindranir alls
staðar en þá reynir á þá sem trúa og
draga vagninn,“ sagði Gísli.
Eftir er að kanna áhuga
einkaaðila og fjárfesta
Kristján Þór Júlíusson sagði að á
síðustu 2–3 árum hafi umræða um
gerð jarðganga undir Vaðlaheiði far-
ið vaxandi. Unnið hefur verið að mál-
inu innan stjórnar Eyþings og ein-
stakar sveitarstjórnir hafa ályktað
um málið og lýst yfir áhuga á að
koma að stofnun fyrirhugaðs félags.
Hins vegar sé ókannað hvort og hve
mikill áhugi sé á meðal einkaaðila,
fjárfesta, fyrir því að koma að verk-
efninu.
Kristján Þór sagði að af hálfu Ey-
þings hafi alla tíð verið lögð á það
áhersla að hugmyndum um jarðgöng
undir Vaðlaheiði verði ekki stillt upp
gegn þeim framkvæmdum sem þeg-
ar eru áformuð milli Ólafsfjarðar og
Siglufjarðar, heldur horft til þess að
hér gæti orðið um að ræða einka-
framkvæmd í samstarfi við ríki og
sveitarfélög.
Að lokinni framsögu voru almenn-
ar umræður og allir þeir sem tóku til
máls lýstu sig fylgjandi jarðganga-
gerð undir Vaðlaheiði og töldu að slík
framkvæmd myndi styrkja svæðið
mikið.
Stefnt að stofnun hlutafélags um gerð og rekstur jarðganga undir Vaðlaheiði fyrir áramót
Þátttaka ríkisins
óhjákvæmileg
Morgunblaðið/Kristján
Húsfyllir var á kynningarfundi Eyþings um jarðgöng undir Vaðlaheiði
og meðal viðstaddra var Guðmundur Hallvarðsson, formaður sam-
göngunefndar Alþingis.