Morgunblaðið - 15.08.2003, Blaðsíða 14
ERLENT
14 FÖSTUDAGUR 15. ÁGÚST 2003 MORGUNBLAÐIÐ
BANDARÍSKIR landgönguliðar
taka sér stöðu á Robertsfield-
flugvelli utan við Monróvíu, höf-
uðborg Líberíu, eftir að hafa ver-
ið flogið í land í þyrlum af her-
skipum bandaríska flotans.
Um 200 landgönguliðar fóru í
land til að styrkja friðargæzlulið
sem komið er til landsins og lýtur
forystu Nígeríumanna. Friðar-
gæzluliðið tók við yfirráðum yfir
Monróvíuhöfn í gær til að sjá til
þess að flutningar á matvælum
og vistum þaðan til þurfandi
fólks gengi eðlilega fyrir sig.
Robert Blah, nýr forseti Líb-
eríu sem tók til bráðabirgða við
embættinu af stríðsherranum
Charles Taylor er hann fór í út-
legð til Nígeríu í byrjun vik-
unnar, hélt til Ghana í gær til að
eiga þar viðræður við leiðtoga
helztu hreyfinga uppreisnar-
manna, sem um árabil stóðu í
stríði við stjórnarher Taylors og
krefjast nú aðildar að nýrri rík-
isstjórn.
Fragtskipahöfnin í Monróvíu
hafði verið í höndum uppreisnar-
manna frá því 19. júlí. Síðan þá
hafa ekki borist þaðan vistir til
svæða sem voru á valdi stjórnar-
hersins og hundruð þúsunda
manna hafa soltið, þ.á m. fjöldi
flóttamanna.
Land-
göngulið-
ar lenda
í Líberíu
AP
TALSMENN franska heilbrigðis-
ráðuneytisins greindu frá því í gær
að allt að 3.000 mann hefðu dáið í
landinu af völdum hitabylgjunnar
sem gengið hefur yfir Evrópu und-
anfarinn hálfan mánuð. Staðfesti
ráðuneytið þar með tölur yfir
dauðsföll sem læknar rekja til hit-
anna, en læknar, lögregla og útfar-
arþjónustur höfðu sakað stjórn-
völd um að vanmeta umfang
vandans.
„Tölurnar (yfir látna) eru háar,
jafnvel mjög háar … Þetta er
sannkallaður faraldur, með öllu
sem það þýðir hvað varðar fjölda
dauðsfalla,“ sagði Jean-Francois
Mattei, heilbrigðisráðherra Frakk-
lands, í útvarpsviðtali.
Í tilkynningu frá heilbrigðis-
ráðuneytinu í París segir að „áætla
megi að fjöldi dauðsfalla sem beint
eða óbeint má rekja til hitanna á
þessu tímabili sé um 3.000 í öllu
Frakklandi“. Þessi viðurkenning
ráðuneytisins fylgdi í kjölfar þess
að læknar, lögregla og útfarar-
stjórar sögðu að lík hefðu hrann-
ast upp í landinu frá því hitabylgj-
an skall á, en síðustu tvær vikur
hefur hitinn farið daglega upp
undir 40 gráður.
Samtök bráðamóttökulækna,
AMUHF, höfðu sakað stjórnvöld
um að vanmeta vandann sem þetta
skapaði. „Dánartölurnar eru að
verða skelfilega háar,“ sagði for-
maður samtakanna, Patrick
Pelloux.
Neyðaráætlun um fjölgun
sjúkrarúma og líkhúsa
Sögðu sjúkrahússstarfsmenn að
þótt nú virtist hitabylgjan vera í
rénun mætti vænta þess að margir
til viðbótar myndu andast úr hita-
slagi næstu daga.
Pelloux skoraði á stjórnvöld að
hrinda í framkvæmd í öllu landinu
neyðaráætlun sem annars er hugs-
uð til að bregðast við ástandi sem
farsóttir, hamfarir eða hryðjuverk
kunna að valda. Áætlunin felst
meðal annars í því að fjölga
sjúkrahúsrúmum og hjúkrunar-
fólki og að koma upp bráðabirgða-
líkhúsum.
Slík áætlun tók gildi á Stór-
Parísarsvæðinu á miðvikudag.
Talsmaður verkalýðsfélags lög-
reglumanna í París sagði að „gríð-
armargir“ hefðu dáið í borginni á
síðustu vikum. Einn forystumanna
félagsins, Mohamed Douhane,
sagði það hafa beðið yfirstjórn lög-
reglunnar um að fara fram á lið-
veizlu hersins við að sækja lík
fólks sem dáið hefði heima hjá sér
í hitanum; svo óvenjumörg væru
dauðsföllin að útfararþjónustur
hefðu ekki undan. Auk þess væru
aðstæður oft erfiðar þar sem lík
hefðu legið í hitanum jafnvel sólar-
hringum saman.
Frönsk dagblöð hafa tekið sam-
an dánartölur. Í Parísarblaðinu Le
Parisien í gær sagði að samkvæmt
þeim upplýsingum sem fyrir lægju
um fjölda þeirra sem létu lífið á
sjúkrahúsum, elliheimilum, í
heimahúsum og annars staðar í
borginni í síðustu viku væru
dauðsföllin um 2.000 fleiri í þessari
hitabylgjuviku en á sama tíma á
síðasta ári. „Svo mikill munur tek-
ur af allan vafa: það var hitinn sem
gekk að þessu aldraða fólki
dauðu,“ fullyrðir blaðið.
Allt að 3.000 dauðs-
föll rakin til hitans
Frönsk stjórnvöld gagnrýnd fyrir
að hafa vanmetið umfang vandans
París. AFP.
ÍSRAELSKAR hersveitir felldu í
gærmorgun háttsettan meðlim hins
Íslamska Jihad, herskárra samtaka
Palestínumanna, í skotbardaga við
felustað hans í Hebron á Vesturbakk-
anum. Samtökin hóta hefndum vegna
atburðarins. Yfirvofandi hefndir
Jihad ógna enn frekar vopnahléi sem
talið hefur verið nauðsynlegt til að
hægt sé að hrinda hinum svokallaða
Vegvísi til friðar í framkvæmd.
Eftir að Jihad-liðinn, Mohammed
Sidr, hafði verið felldur var hann
dreginn út úr húsinu sem hann faldi
sig í og húsið sprengt í loft upp. Hann
var sagður hafa verið einn í húsinu.
Skotbardagi ísraelska hersins og
Sidr hafði staðið í nokkrar klukku-
stundir. Ísraelar reyndu að fella Sidr
í desember sl. með þeim afleiðingum
að tveir palestínskir drengir, þriggja
og tólf ára, létu lífið. Sidr tókst að
flýja.
Íslamska Jihad hefur hótað hefnd-
um sem munu að þeirra sögn verða
eins og „jarðskjálfti“ í hjarta sam-
félags síonista í Ísrael.
Shaul Mofaz, varnarmálaráðherra
Ísraels, kallaði Sidr „tifandi
sprengju“ en Ísraelsstjórn segir
hann bera ábyrgð á dauða 19 Ísraela,
auk tveggja alþjóðlegra eftirlits-
manna, sem hafa fallið í fjöldamörg-
um sprengingum og skotárásum. Þá
segir Ísraelsher 82 hafa særst í þeim
átökum.
Ísraelar
fella hátt-
settan með-
lim Jihad
Hebron. AP.
JARÐSKJÁLFTI sem mældist
6,4 á Richter skók grísku eyj-
una Lefkas í gær. Enginn lét
lífið en 30 manns slösuðust
lítillega og skemmdir urðu á
húsum, vegum og vatns-
bólum.
Skjálftinn varð klukkan
8.15 að staðartíma og fannst
einnig á eyjunni Korfu og á
vesturströnd Grikklands án
þess þó að valda þar tjóni.
Upptök skjálftans voru á
hafi úti um 30 km frá strönd
Lefkas og 290 km norðvestur
af Aþenu, höfuðborg Grikk-
lands.
Eyjan er vinsæll ferða-
mannastaður og er þar mikið
af ferðamönnum frá Bret-
landi, Þýskalandi og Norður-
löndunum. Þeim var að von-
um brugðið er þeir vöknuðu
við skjálftann en jöfnuðu sig
fljótt og voru farnir á strönd-
ina um miðjan daginn.
Sumir yfirgáfu þó eyjuna
eftir skjálftann, aðallega
grískir ferðamenn. Sam-
kvæmt upplýsingum frá
ferðaskrifstofum sem
Morgunblaðið ræddi við er
ekki vitað til þess að Íslend-
ingar dvelji nú á þessu svæði. EPA
Snarpur jarðskjálfti á
grísku eyjunni Lefkas