Fréttablaðið - 17.09.2004, Blaðsíða 57
45FÖSTUDAGUR 17. september 2004
„Við stefnum að því að þetta verði
svolítið grand tónleikar,“ segir
Úlfur Eldjárn í orgelkvartettinum
Apparat, sem verður með lang-
þráða tónleika í húsakynnum
Klink og Bank í kvöld.
„Það er orðinn fáránlega langur
tími síðan við spiluðum síðast í
Reykjavík. Síðast spiluðum við í
Neskaupstað í sumar og þar vor-
um við að prufukeyra ný lög.“
Úlfur segir kvartettinn, sem er
skipaður fjórum orgelleikurum
ásamt trommuleikara, ætla að
flytja töluvert af nýju efni á tón-
leikunum í kvöld, ásamt eldra efni
af einu plötu kvartettsins, sem
kom út fyrir tveimur árum.
Sú plata verður reyndar gefin
út í Bandaríkjunum og Japan á
næsta ári, og væntanlega í Evrópu
líka. Í október ætlar kvartettinn
að halda í tónleikaferð til Evrópu,
og væntanlega mun hann þá spila
víðar í kjölfarið.
„Við ætlum okkur að komast
aftur í þennan tónleikagír. Á tón-
leikum prófum við nýju lögin, og
það á svo eftir að enda í ennþá
fleiri lögum sem svo enda á plötu
einhvern tímann.“
Úlfur segir nýja efnið vera ein-
hvers konar framhald á eldri lög-
unum.
„En þetta fer samt svolítið í all-
ar áttir, þetta nýja. Sum lögin eru
miklu poppaðri og önnur tormelt-
ari en gamla efnið. Á fyrstu plöt-
unni vorum við svolítið uppteknir
af því að búa til okkar eigið sánd,
en núna erum við að taka það skre-
fi lengra í ýmsar áttir. Við erum
núna í dágóðan tíma búnir að vera
að semja lög og spila fyrir sjálfa
okkur, en þegar maður er í orgel-
kvartett tekur þetta sinn tíma. Við
erum búnir að fara í ansi marga
hringi með tónlistina og það sem
við vorum að gera fyrir fimm
árum, þegar við byrjuðum, er
orðið ansi ólíkt því sem við erum
að gera núna.“
Úlfur lofar því að mikið muni
ganga á í kvöld. Búið verður að
skreyta húsnæðið með gulli, boðið
verður upp á drykk hljómsveitar-
innar, sem er hunangsvodka sem
meðlimirnir blanda sjálfir, plötu-
snúðurinn DJ Bomb sér um að
koma fólki í rétta stemningu og svo
verður heilmikið gítarsóló rétt áður
en orgelkvartettinn stígur á stokk.
„Svo erum við nýbúnir að festa
kaup á sápukúluvél, líklega eina
hljómsveitin á landinu sem hefur
yfir slíkum grip að ráða.“ ■
■ TÓNLEIKAR
Nýbúnir að fjárfesta í sápukúluvél
ORGELKVARTETTINN APPARAT Hefur haft hægt um sig en býður til sannkallaðra stórtónleika í Klink og Bank í kvöld, þar sem nýtt
efni verður kynnt í bland við gömlu lögin.
EGÓ Það er nóg að gera hjá hljómsveit-
inni Egó eftir að hún reis upp frá löngum
dvala. Hún mun skemmta norðlendingum
í kvöld í Sjallanum, Akureyri.