Fréttablaðið - 05.10.2006, Page 46

4
Stóðréttir finnast mörgum hesta-
mönnum einn af hápunktum ársins
en ekki er síður gaman fyrir þá sem
lítið sem ekkert vita um hesta að
upplifa stóðréttir í öllu sínu veldi. Í
Laufskálarétt, sem er ein af nokkr-
um stóðréttum á Norðurlandi, eru
réttuð um 600 hross. Mannfjöldinn
eykst þó ár frá ári og er talið að í
þetta sinn hafi hátt í þrjú þúsund
manns fylgst með fræknum stóð-
bændum draga hrossin sín í réttan
dilk.
Réttarstörf hófust um eittleytið
á laugardegi en þá um morguninn
höfðu tugir reiðmanna farið af stað
inn í Kolbeinsdal til að sækja mörg
hundruð hesta sem reknir höfðu
verið af fjalli viku áður. Þegar hross-
in höfðu verið rekin yfir í réttina í
Hjaltadal fóru margir heimamanna
til síns heima og gæddu sér á heitu
hangikjöti að hætti Skagfirðinga og
mættu fílefldir til að draga í dilka.
Mannfjöldinn tafði á köflum
fyrir réttarverkunum enda reynir
fólk sem mest það má að fylgjast
með bæði í dilkunum og í almenn-
ingnum. Verður oft mikill handa-
gangur í öskjunni þegar líflegir
folar eru handsamaðir svo hægt sé
að skoða markið. Stundum slæðast
hross inn í ranga dilka en yfirleitt
er það leiðrétt fyrir lok dags enda
eru bændur hestglöggir menn og
þekkja sitt stóð.
Braskarar geta fengið töluverða
útrás í stóðréttum enda hægt að
ganga á milli dilka og falast eftir
folöldum eða tryppum. Sumt er ekki
falt, á öðru má skipta og annað selt
fyrir beinharða peninga.Svo eru
sumir sem koma bara til að sýna sig
og sjá aðra og syngja hátt og snjallt
meðan etinn er harðfiskur sem skol-
að er niður með viskílögg úr pela.
Um næstu helgi fara fram síðustu
stóðréttir ársins þegar réttað verð-
ur í Víðdalstungurétt í Húnaþingi
vestra og Unadalsrétt í Skagafirði.
- sgi
Undir dalanna sól
Laufskálaréttir voru haldnar síðustu helgi. Þær eru fjölsóttustu stóðréttirnar á landinu.
Ljósmyndari Fréttablaðsins Heiða Helgadóttir fangaði nokkur skemmtileg augnablik.
Í stóðréttum verður oft mikill hamagangur.
Í hestamennsku sameinast kynslóðir og hinir ungu læra af hinum öldnu.
Halldór Steingrímsson á Brimhóli var réttarstjóri í Laufskálaréttum. Hér fylgist hann með að allt fari rétt fram.
Það er magnað að fylgjast með hrossunum hlaupa um í réttinni. FRÉTTABLAÐIÐ/HEIÐA
Um sex hundruð hross komin af fjöllum og rekin í Laufskálarétt.
■■■■ { útivist & hreyfing } ■■■■■■■■■■■■■■■■■■■■■■■■■■■■■■■■■■■■■■■■■■■■■